1 Afo anie adikpeep se isaña ikikem ye nti ukpeebñkpọ. 2 Kpeep mme ñkaan ideen adinie ifuuro-ifuuro ido a-adotto ukpono, mfadidem, ye nsọñọnda ke mbuọdidem, ke ima ye ke adiyọ ukuud.

3 Kpa ntoro ñko, kpeep mme ikpọ ibaan adinie ukpono ke eduuwem ammọ. Kpeep ate ekuudoñño mme abiat awo anyịñ me mbon edʌkkọ afʌn enọ mmịn, ado ekpeep se ifọn. 4 Ndin ammọ eyaekan ekpeep mme ntək ibaan adima mme ebe ye nditọ ammọ, 5 adinie mfadidem ñnyʌñ ndu adisana uwem, ema adinam ñkpọ ke ufọk, efọn ido, enyʌñ esuuk iwuod enọ mme ebe ammọ mbaak awo ndomokeed aditañ se idiọọk adian ikọ Abasi.

6 Kpa ntoro ñko, sọọñọ ñkparawa idem bo ammọ enie mfadidem. 7 Ke afịd ñkpọ nam ammọ enie uwọdñkpọ ke adinam se ifọn. Ke ukpeebñkpọ mfo wọt akpanikọ, usịnne mbre 8 nyʌñ tañ ikọ ke usʌñ a-awo imiikanna ikịt ndudue, nọ ato do mbon se ibiọọñọ ndufo ekop abuud, sia ammọ inieghe idiọọkñkpọ ndomokeed se etañ idian ñnyịn.

9 Kpeep mme ifʌn adisuuk iwuod nnọọ mme eteufọk ammọ ke afịd ñkpọ, edomo adinam se inem eteufọk ammọ esịd, ekuubọọrọ ammọ ikọ, 10 ndin ekuunyʌñ eyịp ñkpọ ammọ, ado ewọt nte ke e-ekeme inịm ammọ ke akpanikọ, nọ ato do ammọ ekpenam ukpeebñkpọ a-abañake Abasi Andinyaaña ñnyịn ado uyaiya-uyaiya.

11 Sia mfọn Abasi a-adatta adinyaaña anọ afịd awo awuọ awọt idem. 12 Ado i-ikpeep ñnyịn adibo "iyoo" mbaña unana adisana ido ye akpọsọñ idiọọk udọñ ñkpọ ederimbod, ndin idʌñ ke mfadidem, inie nnen-nnen uwem ye mme eti ido ke ayio mfịn ami, 13 ke ini ñnyịn ibette mfọnmma idodanyen adiwuọ ñwọt idem, adiyaara ubọọñ akwa Abasi ye Andinyaaña, Yisọs Krais. 14 Ado anye akeyaak idem amọ anọ nọ ifak ñnyịn asio ke afịd idiọọkñkpọ anyʌñ iyet ñnyịn isana, ido ake amọ, inyʌñ inie udọñ adinam se ifọn.

15 Ami ndin ado mme ñkpọ se ana nte afo akpeep. Nọ nsọọñọidem nyʌñ sua nọ ke afịd adudu. Kuuyak awo ndomokeed usọọn fiin.