1 Ami Pọọl, isʌñutom Abasi ye abọsịd Yisọs Krais, emmekke nọ nsọọñọ mbuọdidem mbon A-Abasi amekke ye ifiọk akpanikọ a-adatta aka uwem ke Abasi, 2 a-akọñọke ke idodanyen nsi-nsi uwem, A-Abasi i-imiisʌhọke nsu akenwọñọke mbemiso aditọọñọ ini. 3 Ndin ke adikem ini anye a-ayaara ikọ amọ ato ke adikwọrọ ikọ e-ekeyakka ennọọ ke ewʌhọ Abasi Andinyaaña ñnyịn.

4 Ami ñwet nnọ Taitọs, ataa ayịn mmi ke mbuọdidem a-ñnyịn iwanake. Mfọn ye emem a-atooho Abasi Ete ye Krais Yisọs Andinyaaña ñnyịn aba ye afo.

5 Ntak a-ami ñkukpọññọ fiin ke Kret akedo nọ afo aneeñe mme ñkpọ se awo imiikikweeñeke anịm, anyʌñ amek mme ñkpisọñ ke afịd abio, kpa naña ñkutemme. 6 Adaiwuod ufọkabasi ana anana ndo, ado ebe anwaan keed, awodeen a-nditọ amọ enịmme Abasi ke akpanikọ, ndin idoññoke se esịn ke ibad atu mbon e-efaiyake afai enyʌñ etịt utọñ. 7 Sia emaeyaak utom Abasi esịn ke ubọk etubom, ana anye anana ndo, inieghe nsọñido, isọppọ iyadesịd, ikpaaha mmịn, ibaaha afai-afai, idooho awo a-ayemme udod ke usʌñ ñwo. 8 Utu ke ado, anye ana ado awo a-adaarake isenawo, awo a-amaaha se ifọn, anie mfadidem, ado adinen, adu adisana uwem anyʌñ akpono idem amọ. 9 Ana anye amʌm eti etob naña ekekpeep akama ke akpọsọñ ubọk, nọ ato do anye akan asọọñọ mbon mfen idem ke ataa eti ukpeeb anyʌñ asua anọ mbon e-ebiọọñọke ikọ Abasi.

10 Uwak mbon eniin ebañña, mbon utañ ikọ ikpu-ikpu ikọ ye mbon abiaña, akpan-akpan mbon e-esịneke ke ñka ufọọrọ edʌd. 11 Ana ekʌp ammọ inua, sia ammọ ebiat ufọk mme awo ato ke ammọ adikpeep se imiikpinaaha ekpeep, ndin enam ami ke ntak udod abiaña. 12 Keed ke atu mme prọfed ke Kred a-atañ abo, "Afịd ini mbon Kred etak ke nsu, mme ibak ndoom, mme adiauyʌkkọ ifu."* 13 Ikọ ntiense ami ado akpanikọ. Ke ntak ado, sua nọ ammọ akpọsọñ-akpọsọñ, nọ ato do ammọ enie nsọọñọnda ke mbuọdidem 14 ndin idiikpañña utọñ inọ mme mbʌk esed mme Yuu ye mme ewʌhọ mbon e-esịnne akpanikọ. 15 Afịdñkpọ ado adisana anọ mbon e-esanake, ado mbon edoññoke abʌd-abʌd awo, i-imiinyʌññọ inịm ikọ Abasi ke akpanikọ, ñkpọ ndomokeed isanake. Ke akpanikọ, afịd esịd ammọ ye akikere ammọ edo abʌd-abʌd. 16 Ammọ edat ke mmimọ imidiọọñọ Abasi, ado ato ke eduuwem ammọ, ammọ ekañ anye. Ammọ edoñño mbon mbubiam, etre utọñ, ndin ikanna inam ñkpọ se ifọn.