1 Toiyo afịd awo ate esuuk iwuod enọ mme andikara ye mme adaiwuod, ekop item, ebeeñe idem adinam se ifọn, 2 ke esappa awo ndomokeed ke edem, eba ke emem enyʌñ ekere ñkpọ ebaña mbon mfen, ndin eba ukeed ini ke ifuuro ye afịd awo.

3 Ini keed koo, ñnyịn ñko ikido ndisịme, mbon nsọñiwuod, mbon e-ebiañake ndin inyʌñ idʌk ufʌn inọ afịd uduud udọñ ederimbod ye inem. Ñnyịn imainie udu ye ufịb ke esịd ke ntak a-adooho emaisua ñnyịn, ñnyịn ñko inyʌñ isua emọ-emọ. 4 Ado ke ini mfọn ye ima Abasi Andinyaaña ñnyịn amaakewuọ ada, 5 anye amainyaaña ñnyịn ado itooho ke ntak nti ñkpọ a-ñnyịn ikinamma, ado ato ke ntak mbọm a-anye anieghe ibaña ñnyịn. Anye akinyaaña ñnyịn ato ke adiyet ufa emana anyʌñ anam ido ufa ato ke Adisana Sịbidịd, 6 a-anye akenwaññake ke ntadubọk idot ñnyịn ke idem ato Yisọs Krais Andinyaaña ñnyịn, 7 nọ ato do, sia imainen ato ke mfọn amọ ñnyịn ido mme adiaakpa e-enieghe idodanyen nsi-nsi uwem. 8 Ami ado ikọ mbuọdidem e-eketañña. Ndin ami ñyem afo asọọñọ mme ñkpọ ami, nọ ato do mbio e-ebuọttọ idem ke Abasi enekke esịn idem ke adinam se ifọn. Mme ñkpọ ami edo se ifọn ikan ndin anyʌñ ado ke ufọn afịd awo.

9 Ado ifeghe ikpọñ mme ndisịme akpọsọñ eniin ye anyan udịm anyịñ emana ye mme mfaaña ye mme utọk a-abañake mbed, sia mme ñkpọ ami ibaaha udod, anyʌñ ado ikpu-ikpu. 10 Dʌt awo a-asịnne ubakka utọñ akañ keed, ndin maana dʌt ammọ utọñ ayọhọ akañ iba. Ado amaaboiyo, kuunie ñkpọ ndomokeed adinam ye ammọ aba. 11 Afo amediọọñọ ke utọ ibon ado ifọnnọ, edo mme anam idiọọkñkpọ; ammọ e-ebiom idem ammọ ikpe.

12 Ami mmaasʌk ndọdọñ Atemas me Taikikọs ubịne fiin, domo ukeme adimbịne miin ke Nikopolis, sia ami mmebiere aditie ke udo ke ini ekarika. 13 Nam afịd ñkpọ se afo akan adinwam Senas akpe ikpe, ye Apọlọs ke usʌñ ammọ nyʌñ kịt ke ammọ enie afịd se ammọ eyem.

14 Mbon ñnyịn ana ekpeep adisịn idem ammọ ke adinam se ifọn, nọ ato do ammọ ekeme adinie ñkpọ se ammọ eyem ke usen ke usen, mbaak ammọ edidu uwem i-imiibaaha ufọn inọ ammọ.

15 Afịd awo e-ebaaha ye ami e-edọñ ekọọm.

Kọọm mbon se ima ñnyịn e-ebaaha ke mbuọdidem.

Yak mfọn Abasi aba ye afịd ndufo.