1 Anam die nọ abio a-mme awo ekeyọhọke ke esịd,

akappa ana ukpọk!

Anam die nọ anye atie nte ebekpa,

anye a-akedooho akpọsọñ ke atu mme idịd!

Anye a-akedooho abọọñanwaan ke atu mme esiin idịd

akappa ado afʌn idahami.

2 Anye atua ndod-ndod ayịd ke akonayio,

mmọọñayịd adiaat anye ke mfʌk.

Ke atu afịd mbon ima amọ

ndomokeed ibaaha se idọñ anye esịd.

Afịd mme ufan amọ ebiaña anye;

ammọ ekappa edo mme asua amọ.

3 Ke ukuud ye akpọsọñ utom emaeboiyo,

Yuda adakka akaa asenidịd.

Anye adʌñ ke atu mme idịd;

anye ikịtte itie nduọkadudu.

Afịd mbon e-ebịneke anye eboiyo ekpọñ anye

ke ufọọd ukuud amọ.

4 Mme akpọusʌñ e-ekaaha Saiyọn efʌhọ,

sia awo ndomokeed idiighe mme ndimek usọrọ amọ.

Afịd mme usʌñ inuaatob amọ enaa ñwuudo,

mme aku amọ eseeme,

mme ubọikpa amọ efʌhọ,

ndin anye aba ke idod-idod ntaeded.

5 Mme asua amọ ekappa edoñño mme eteufọk amọ;

mme asua amọ eba ke emem.

Abọọñ aben mfʌhọ anọ anye,

ke ntak uwak idiọọkñkpọ amọ.

Ntəkayịn edʌk ufʌn,

mbon ntañmfeb ke iso asua.

6 Afịd uku amaakpọñ

Adiaha Saiyọn.

Mme akpanabọọñ amọ etie nte edob

imiikịtte mbid se eta;

ke mmemidem, ammọ efeeñe

ke iso andibịne.

7 Ke mme usen ukuud ye ndutịn amọ

Yeruselem atoiyo afịd ñkpọuto

e-ekedooho ake amọ ke mme usen edem.

Ke ini mbon amọ ekeduọññọke ke ubọk mme asua,

awo ndomokeed ikibaaha adinwam anye.

Mme asua amọ emaese anye,

enyʌñ esaha ke nsobo amọ.

8 Yeruselem amaanam idiọọkñkpọ ekamba-ekamba,

ndin ke ntoro anye isanake.

Afịd mbon e-ekekponoke anye ese anye ke ndek,

sia afịd ammọ emaekịt ifed amọ;

anye ke idem amọ amịm

anyʌñ atịmme edem.

9 Mbad amọ ayịre anye ke afọñ,

anye ikikereke ibaña ini iso amọ.

Iduọ amọ akedo ñkpọ ñkpaidem;

awo ndomokeed ikibaaha adinọ anye idọñesịd.

"Abọọñ, se ñkpọ baña ukuud mmi,

sia asua akan."

10 Asua amaadot ubọk

ke afịd ñkpọuto amọ;

anye amaakịt mme idịd i-imiidiọọñọke Abasi

naña edʌk adisana itie amọ,

mbon a-afo akekpanna

adidʌk ke esob mfo.

11 Afịd mbon amọ eseeme

naña ammọ eyem ndidia;

ammọ ekpuuño mme ñkpọuto ammọ ebọ ndidia

nọ ammọ edu uwem.

"Abọọñ, se nyʌñ kere baña,

sia ense miin ke ndek."

12 "Nte idooho ñkpọ inọ ndufo, afịd ndufo e-esañake eboiyo?

Kanna anyen mfo nyʌñ se.

Aba ufen a-atieghe nte ufen mmi

e-ekebenne endot miin ke idem,

A-Abọọñ akebenne andot miin

ke usen ikañ-ikañ iyadesịd amọ?

13 "Anye adọñ ikañ ato ke anyọñ,

adọñ asọiyọ adidʌk mme akpọ mmi.

Anye atat iyịre anịm anọ ukod mmi,

anyʌñ anam ami ntịmme edem.

Anye anam ami mba ke nsobo,

ñkpamba afịd anyan usen.

14 "Emaetobo idiọọkñkpọ mmi esịn ke akpọnọ*;

akedat ubọk amọ adọk ammọ adian itie keed.

Emaeben ammọ eñwañ miin ke itọñ,

ndin Abọọñ anam inweek imbaaha aba.

Anye añyaak miin asịn ke ubọk

mbon se ami ndiikanna ñnwana anwan.

15 "Abọọñ asịn

afịd mbon uko ke atu mmi;

anye akoot udịmekọñ nọ enwana ye ami

nọ ewoot ñkparawa mmi.

Ke ukwak unyịmme ukọd amọ Abọọñ asọnnọ

Adiaha Yuda.

16 "Ntak a-ami ntuaha ayịd ado ami,

anyen mmi anyʌñ afiọrọ ye mmọọñayịd.

Awo ndomokeed ibaaha ikpere se indọñ miin esịd,

awo ndomokeed ibaaha aditịmme idemme sịbidịd mmi.

Nditọ mmi edo mbon unana

Sia asua a-akan."

17 Saiyọn asio ubọk amọ anyan,

ado ibaaha awo se inọ anye idọñesịd.

Abọọñ anịm mbed anọ Yekọb,

nọ mme mbọhọidʌñ amọ ekappa edo mme asua amọ;

Yeruselem akappa ado

ñkpọ i-imiisanake ke atu ammọ.

18 "Abọọñ ado adinen,

kpayeado ami mmaasọñ iwuod ye ewʌhọ amọ.

Ikpañ utọñ, afịd mbon awo;

ise ufen mmi.

Ñkparawa ye ubọikpa mmi

ekaa asen idịd ekedʌk ufʌñ.

19 "Ami mmaakoot mme ufan mmi,

ado ammọ emaembiaña miin.

Mme aku ye ñkpisọñ mmi

emaekpañña ke abio

ke ini ammọ ekeyemme ndidia

se edat edu uwem.

20 "Abọọñ, se naña ukuud ammʌm miin!

Ami mba ke ndutʌhọ ke esịd idem mmi,

mmenyʌñ ñkop mfịna ke esịd mmi eti-eti,

sia ami ñkedo ataa awo nsọñiwuod.

Ke anwa, akañkañ asịn ntuaña;

ke esịd ufọk, ñkpa kpọd aba.

21 "Mme awo emaekop eseeme mmi,

ado ibaaha awo se indọñ miin esịd.

Afịd mme asua mmi emaekop ebaña ukuud mmi;

ammọ edaara ebaña se afo anam.

Afo akpekap aben usen a-aketañña abaña adi,

nọ ammọ ekappa etie nte ami.

22 "Yak afịd ndiọi ido ammọ adi ubịne fiin;

nam ye ammọ

naña afo akenam ye ami

ke ntak afịd ndiọiñkpọ mmi.

Mme mmịm mmi ewak

ndin esịd mmi akpa mba."