1 Kap se naña Abọọñ akefʌk Adiaha Saiyọn

ye ntọñ iyadesịd amọ!

Anye amaanwịn uku Isrel

ke anyọñ aduọọk ke isọñ;

anye ikitoiyoke udodukod amọ

ke usen iyadesịd amọ.

2 Ke unana mbọm Abọọñ amaasobo

afịd mme itieidʌñ Yekọb;

ke ifiobesịd amọ anye amaawuut

mme ñkpọsọñ itie Adiaha Yuda abon.

Anye amaasuuhọ abio adidem ye nditọ ideen abọọñ amọ

adisịm isọñ ke asuenne.

3 Ke ikañ-ikañ iyadesịd anye amaakpịkke

afịd nnʌk* Isrel asio.

Anye amaadʌt ubọk nnasia amọ asio

ke ini asañake akpere asua.

Anye amaasak ke Yekọb nte edemeikañ

a-ataaha afịd ñkpọ se ikpere anye.

4 Anye a-adʌt utịgha amọ nte asua;

ubọk nnasia amọ aba ke mbeeñeidem.

Nte asua a-anye awotto

afịd mbon se anye anem esịd abaña;

anye amaanwañña iyadesịd amọ nte ikañ

afʌk ke atayad Adiaha Saiyọn.

5 Abọọñ atie nte asua;

anye a-aben Isrel amen.

Anye a-amen afịd mme ufọk ubọọñ amọ

anyʌñ awuut mme ñkpọsọñ itie amọ.

Anye a-anam mfʌhọ ye eseeme atọt

anọ Adiaha Yuda.

6 Anye a-anam itieidʌñ amọ akappa aba nte inwañ;

anye a-awuut itie mbono amọ.

Abọọñ anam Saiyọn afre

mme ndimek usọrọ amọ, mme usen Sabad amọ;

ke ikañ-ikañ iyadesịd amọ anye a-asịn

adidem ye aku.

7 Abọọñ a-asịn akpokoro uwa amọ

anyʌñ awuọ akpọñ adisana itie amọ.

Anye a-aben mme ndibene akwere amọ

asịn asua amọ ke ubọk;

ammọ ebenne uyio ebọñ ñkpo ke ufọk Abọọñ

nte ke usen e-enamma adimek usọrọ.

8 Abọọñ amaabiide adiwuut

ndibene a-akannake Adiaha Saiyọn akʌk.

Anye amaasio udʌk udomoñkpọ anyan

inyʌññọ imʌm ubọk amọ ke adisobo.

Anye amaanam mme akọ ye ndibene eseeme;

ammọ eyeeme atọ keed.

9 Inuaatob amọ amaatịkke adʌk isọñ,

eto usịn usʌñ ammọ anye amaabʌñ anyʌñ asobo.

Adidem amọ ye nditọ ideen abọọñ amọ emaekaa asen idịd nte ifʌn,

mbed ibaaha aba,

mme prọfed amọ inyʌññọ ikịt

ñkukịd aba ito Abọọñ.

10 Mme ñkpisọñ Adiaha Saiyọn

etie ke isọñ ke ndobuyio;

ammọ esiime ntọñ ke iwuod ammọ,

enyʌñ esịne afọñikpo.

Mme ubọikpa Yeruselem

esuuk iwuod ammọ ke isọñ.

11 Anyen mmi akịm anọ utua ayịd,

ami mba ke akpọsọñ ukuud;

esịd mmi awuọ aduọkkọ ke isọñ,

sia esobo mbon mmi,

sia ntəkayịn ye mme nsek nditọ esʌkkọ

ke mme efaak ke abio.

12 Ammọ ebo mme eka ammọ,

"Mmọ uyo ye ukọd?"

naña ammọ ekop mmemidem nte mbon edatta unan

ke mme efaak ke abio,

naña uwem ammọ asʌk aboiyo afep

ke ubọk mme eka ammọ.

13 Nsoo ke ami mbo ntañ unọ fiin?

Nsoo ke ami mbo ndat ndomo ye afo,

Adiaha Yeruselem?

Nsoo ke ami mbo ndat ndomo ye afo,

nọ ami ñkeme adunọọ fiin idọñesịd

Abọikpa Saiyọn?

Unan mfo atəño nte akpainyañ.

Anie ikeme adukọk fiin?

14 Mme ñkukịd mme prọfed mfo

ekedoñño nsu, inyʌññọ iwuọñọ ñkpọ;

ammọ ikiyaarake idiọọkñkpọ mfo

nọ etre aduben ñnyọñ ke ntañmfeb.

Mme ñkukịd se ammọ ekunọọ fiin

ekedoñño nsu, enyʌñ udat etịn usʌñ.

15 Afịd mbon e-esañake eboiyo ke efaak mfo

unọ fiin ñnyọọ;

ammọ esaha enyʌñ enyeghe iwuod

ebaña Adiaha Yeruselem:

"Nte abio ekekoodo

ataa uyai,

inemesịd afịd ederimbod ado ami?"

16 Afịd mme asua mfo enwañña inua ammọ

nọ atara ubaña fiin;

ammọ esaha enyʌñ ekwaaha eded ammọ,

enyʌñ ebo, "ñnyịn imiben anye afre imen.

Ami ado usen a-ñnyịn ikitieghe ibet;

ñnyịn imidu uwem ikịt anye."

17 Abọọñ anam se anye akeduak;

anye a-anam ikọ amọ asu,

a-anye aketañña ke anyan ini.

Anye utop fiin asio ituaha mbọm,

anye anam asua mfo adat esịd ubaña fiin,

anyʌñ adịppe nnʌk mme asua mfo.

18 Esịd mbon awo

etua enọ Abọọñ.

Afo ndibene Adiaha Saiyọn,

yak mmọọñayịd mfo afiọrọ nte inyañ

ke uweemeayio ye akonayio;

kuunọọ idem mfo nduọkadudu,

kuuyak mmọọñayịd mfo atre.

19 Dakka da, tua ayịd ke akonayio,

ke ini ukpeme akonayio amaatọọñọ,

nwañña esịd mfo nte mmọọñ

ke iso Abọọñ.

Benne ubọk mfo nọ anye

baña uwem nditọ mfo,

e-esʌkkọke ke ntak abiọọñ

ke afịd ibiọññọ efaak.

20 "Abọọñ, se nyʌñ kere baña:

Anie ke afo anam ntom akpa?

Nte ibaan ana eta nditọ ammọ,

nditọ a-ammọ ebọọkọ?

Ana nte ewot aku ye prọfed

ke adisana itieukpono Abọọñ?

21 "Ntəkayịn ye ñkaan awo enaa itie keed

ke ntọñ ke mme efaak;

ñkparawa ye ubọikpa mmi

emaekpañña ke akañkañ.

Afo amaawoot ammọ ke usen iyadesịd mfo;

amaawoot ammọ utuaha mbọm.

22 "Naña afo akoot ke usen usọrọ,

kpa ntoro ke afo akoot ndịk annọ miin ke afịd usʌñ.

Ke usen iyadesịd Abọọñ

awo ndomokeed ikibọkkọke inyʌññọ idu uwem;

mbon a-ami ñkekamake ñnyʌñ mbọọk

asua mmi asobo."