1 Ami ndo awodeen a-akịtte ukuud

ato ke ikpa iyadesịd Abọọñ.

2 Anye ambịne miin asio, anyʌñ anam ami nsaña

ke ekịm utu ke unwana;

3 ke akpanikọ, anye amaakanna ubọk amọ amfʌnnọ miin

ndin-ndin, afịd usen.

4 Anye a-anam ikpọkidem ye abʌkidem mmi ekaana

anyʌñ abʌñ mme akpọ mmi.

5 Anye ammʌm miin, anyʌñ añkanna miin akʌk

ke idod ye akpọsọñ ufen.

6 Anye anam ami ndʌñ ke ekịm

nte mbon ekekpaññake ke anyan ini.

7 Anye a-abọp ndibene ansịn miin mbaak ami ndikan mbọkkọ;

anye a-amfiik miin anịm ye mme akpọnọ.

8 Akpekọm ke ini ami ñkoodo me nseemeke ñyem unwam,

anye abet usʌñ abaha akam mmi.

9 Anye a-afiọk usʌñ mmi ke mme eboho itiad;

anye a-anam usʌñ mmi akwaña.

10 Kpa nte amọnikọd a-anaaha abet,

nte ekpe ke ndịbe

11 anye amandʌt miin ke usʌñ anyʌñ antịm,

anyʌñ adakka añkpọñ miin, nnieghe unwam.

12 Anye amaadʌt utịgha amọ,

anyʌñ añket miin ke mme idañ amọ.

13 Anye amaakịm esịd mmi

ye mme idañ e-etooho ekpad idañ amọ.

14 Ami mmekappa ndo ñkpọ nsaha nnọ afịd mbon mmi;

afịd usen ammọ ensak miin nsaha ke ikwọ.

15 Anye a-añyʌkkọ miin ye idod-idod mfañ,

anyʌñ annọ miin atidod nọ ñnwọñ.

16 Anye a-ambeek miin eded ke ñkwaitiad;

anye a-ansọnnọ miin anịm ke ntọñ.

17 Emaembọ miin emem;

ami mmefre se uforo ado.

18 Ke ntoro ami mbo, "Uku mmi ibaaha aba

ye afịd se ami ñkedot anyen nto Abọọñ."

19 Ami mmetoiyo ukuud mmi ye ndutịn mmi,

idod-idod ikọñ ye atidod.

20 Ami mmenekke ntoiyo ammọ,

ndin ukpọñ mmi afʌhọ ke esịd idem mmi.

21 Ado ami anam ami ntoiyo;

ke ntoro ami mmenie idodanyen.

22 Ke ntak akwa ima Abọọñ, ñnyịn itakka

sia mbọm ammọ ikpuuho.

23 Anye ado ufa afịd ubakusen;

mfọn mfo akpon eti-eti.

24 Ami mbo ke idem mmi, "Abọọñ ado udeeme mmi;

ke ntoro ami ñyaabet anye."

25 Abọọñ afọn ye mbon e-edotto anyen ke anye,

anọ awo ayemme anye;

26 afọn adidodop ntie mbet

adinyaaña Abọọñ.

27 Afọn awo adiyọ ukuud

ke ini uyịn amọ.

28 Yak anye atie ikpọọñ ke ndobuyio,

sia ado Abọọñ adot anye ke idem.

29 Yak anye akʌp iso amọ ke ntọñ,

akeme ido idodanyen ayaaba.

30 Yak anye ayaak mbañ amọ anọ awo ayemme adisiak anye ufia,

yak anye anyʌñ ayọhọ ye abuud.

31 Sia Abọọñ iduọhọ awo ndomokeed

ke nsi-nsi.

32 Akpesʌkado a-anye abenne mfʌhọ adi, anye ayaatua mbọm,

sia akwa ima amọ idiitreke.

33 Sia anye ikoiyokoi iben ukuud

me mfʌhọ isọk awo ndomokeed.

34 Adisọnnọ afịd mbon ñkpakọb ke ederimbod

ke idakikpad,

35 adisịn adinọ mme awo unen ammọ

ke iso Andikoñ Ñkan Abasi,

36 aditre adinọ ammọ unen;

nte Abọọñ idiikịtte utọ ñkpọ ado?

37 Anie akeme aditañ ndin anye atịppe

adieke Abọọñ imiinịmme nte ewʌhọ.

38 Nte itooho ke inua Andikoñ Ñkan Abasi

ke idiọọk ye nti ñkpọ eto ewuọ?

39 Nsoo ido ntak a-mme aduuwem ekpeseemeke

ke ini emiaha ammọ ufen ke idiọọkñkpọ ammọ?

40 Yak ñnyịn iduuñọ mme usʌñ ñnyịn inyʌñ idomo ammọ ise,

yak ñnyịn inyʌñ itịmme ikeene Abọọñ.

41 Yak ñnyịn ibenne esịd ñnyịn ye ubọk ñnyịn

inọ Abasi ke anyọñ, inyʌñ ibo:

42 "Ñnyịn iminam idiọọk inyʌñ isọñ iwuod

ndin afo ufeene.

43 "Afo ameben iyadesịd afʌk idem mfo anyʌñ ibịne ñnyịn;

afo amewot utuaha mbọm.

44 Afo ameben ntọñanyọñ afʌk idem mfo,

mbaak akam ndomokeed adiboiyo.

45 Afo amenam ñnyịn ikappa ido ifịm ye mbio

ke atu mme idịd.

46 "Afịd mme asua ñnyịn enwañña inua ammọ

enịm inwañ ibaña ñnyịn.

47 Ñnyịn imibọ ufen ito akpọsọñ ndịk ye ndedịbe unọmọ,

ñwuudo ye nsobo."

48 Idịm mmọọñayịd awuọ ke anyen mmi,

sia esobo mbon mmi.

49 Mmọọñayịd idiitreke adiwuọ ke anyen mmi,

adiisʌk ikaka iso iwuọ,

50 tutu Abọọñ asuuk anyen ase

ke hefịn anyʌñ akịt.

51 Se ami ñkịt a-aben mfʌhọ asọk ukpọñ mmi,

ke ntak afịd ibaan ke abio mmi.

52 Mbon e-ekedooho mme asua mmi ke unana ntak

eduñbịnne miin nte inuen.

53 Ammọ emaedomo ukeme adiñwot miin ke ube,

enyʌñ etoomo itiad entọọñ;

54 mmọọñ amaatọ afʌk iwuod mmi,

ndin ami mmaakere ke ñyaatak.

55 Abọọñ, ami ñkekoot anyịñ mfo,

ke ntotəño esịd ube.

56 Afo amaakop ñkpeubọk mmi, "Kuusiit utọñ mfo

ubaha ntuaña mmi."

57 Afo amaasịkke akpere ke ini ami ñkukoodo fiin,

ndin afo amaabo, "Kuufeghe ndịk."

58 Abọọñ, afo akekpe ikpe mmi;

afo akefak uwem mmi.

59 Abọọñ, afo amekịt idiọọk e-enamma ye ami.

Ben ikpe mmi kpe!

60 Afo amekịt utọ usiene a-ammọ edinsioho miin,

afịd se ammọ eduak embaña miin.

61 Abọọñ, afo amekop afịd mme usọñanyen ammọ,

afịd se ammọ eduak embaña miin,

62 se mme asua mmi etañ ke adu enyʌñ edukuunọ

embaña miin afịd usen.

63 Tat anyen mfo se ammọ! Ke etieghetie me ke edaahada,

ammọ ensak miin esaha ke ikwọ ammọ.

64 Abọọñ, nọ ammọ utịb a-adotto ye ammọ,

ke se ubọk ammọ enam.

65 Fʌk esịd ammọ ke ufʌkñkpọ,

ndin yak isuuñọ mfo adoro ammọ!

66 Dat iyadesịd mfo bịne ammọ Abọọñ

nyʌñ sobo ammọ fep ke idak mme hefịn.