1 Sedekaiya akedo isua edịb mme keed idaha anye akedooho adidem, ndin anye amaakara ke Yeruselem isua duob mme keed. Anyịñ eka amọ akedo Hamutal, ayịn awonwaan Yerimaiya; anye aketo Libna. 2 Anye amaanam idiọọkñkpọ ke iso Abọọñ, kpa naña Yehoiyakịm akenam. 3 Ke ntak iyadesịd Abọọñ akenam afịd mme ñkpọ ami aketịppe ke Yeruselem ye Yuda, ndin ke akpatre anye amaabịne ammọ asio ke iso amọ.

Ndin Sedekaiya amaasọñ iwuod ye adidem Babilọn.

4 Ke ayọhọ usen duob ke ayọhọ afiọñ duob, ke ayọhọ isua ukara Sedekaiya usʌkkeed, Nebukadnesa adidem Babilọn amaanam isañ adʌk Yeruselem ye afịd udịmekọñ amọ. Ammọ emaenam nnaaekọñ ekanna abio enyʌñ ebọp nnaaekọñ ekanna anye ekʌk. 5 Emaekanna abio ekʌk tutu ayọhọ isua duob mme keed ake ukara adidem Sedekaiya.

6 Ke ayọhọ usen usʌkkeed ke ayọhọ afiọñ inaañ, akañ amaakpon ke abio tutu ndidia ikibaaha aba se mbon awo edia. 7 Akem emaewuut ndibene abio, ndin afịd udịmekọñ emaefeeñe. Ammọ ekesaña ke ufañ ndibene iba akekpereke inwañ adidem ewuọ ke inuaatob abio ke akonayio, akpesʌkado mbon Babilọn emaekekanna abio ekʌk. Ammọ emaefeeñe ekaa ukañ Araba, 8 ado udịmekọñ Babilọn emaebịne Adidem Sedekaiya enyʌñ ekebọhọ anye ke ukañ unaisọñ Yeriko. Emaediañña afịd mbon ekọñ amọ ekpọñ anye, ammọ emaenyʌñ esuana, 9 ndin emaemʌm anye.

Emaeben anye esọk adidem Babilọn ke Ribla ke isọñ Hamad, itie a-anye akebiideke ikpe anọ anye. 10 Do ke Ribla adidem Babilọn amaawoot nditọ ideen Sedekaiya anye akịt ke anyen amọ; anye amaanyʌñ awoot afịd mme adaaha ke Yuda. 11 Akem anye amaakaap adidem Sedekaiya anyen asịññe, abọp anye ke ñkpọnọ brọns anyʌñ aben anye akaa Babilọn, itie e-ekesịnne anye ke ufọkñkpakọb tutu akem usen ñkpa amọ.

12 Ke ayọhọ usen duob ke ayọhọ afiọñ ition, ke ayọhọ isua ukara duob mme usʌkkeed ake Nebukadnesa adidem Babilọn, Nebusaradan, adaiso udịmekọñ ukpeme adidem, akenamma utom anọ adidem Babilọn, amaadi Yeruselem. 13 Anye amaasịn ikañ ke tembịd Abọọñ, ufọkubọọñ adidem ye afịd ufọk ke Yeruselem. Anye amaafọp afịd akpan ufọk anịm ke isọñ. 14 Afịd udịmekọñ Babilọn, ke idak ndadusʌñ adaiso udịmekọñ ukpeme adidem, emaewuut afịd mme ndibene e-ekekannake Yeruselem. 15 Nebusaradan, adaiso udịmekọñ ukpeme adidem, amaakoono anyọñ nte ntañnsio ubaak mme akpọikpọi uweene ye mbon se ikisʌhọ ke abio, adiana ye ubaak mbon unam utomusọ ye mbon se ikifeghe ikeene adidem Babilọn. 16 Ado Nebusaradan amaasʌhọ ubaak mme akpọikpọi uweene ke abio ado adinam utom ke mme inwañ fain ye mme inwañ mfen.

17 Mbon Babilọn emaeboom mme adaaha brọns, mme itiad idaha ye Akpainyañ brọns ekebaaha ke tembịd Abọọñ, ndin ammọ emaekoono afịd mme brọns ami enyọñ Babilọn. 18 Ammọ emaenyʌñ ekoono mme ako, mme udọk, mme ufadikañ, mme usan usiime mmọọñ, mme usañ ye afịd ñkpoduoho brọns ekesikamake enam utom ke tembịd. 19 Adaiso udịmekọñ ukpeme adidem amaakoono mme besịn, mme usan udọñ ukañ, mme usan usiime mmọọñ, mme ako, mme udodutuenikañ, mme usan ye mme ntəño bọwịd e-ekesikamake enwọñ ukọd unwọnwọñ uwa, afịd ñkpọ se ekekama ataa kold me ataa silfa enam.

20 Brọns ke mme abai iba ado, Akpainyañ ye ñyaaraenañ brọns duob mme iba ke idak amọ, ye uwewere ñkpọndaha, a-adidem Sọlọmọn akenamma anọ tembịd Abọọñ, amaadoppo akan se ekpekekan edomo. 21 Abai keedekeed akedo kubid duob mme itiaita ke unyọọñ ye kubid duob mme iba ke ekara* amọ, udob ukpa amọ keedekeed, ye ufañ akedoppo ñkpọ nte nnuun inaañ anyʌñ atịkke. 22 Brọns ke unyọọñ abai keed akedo kubid ition* ke ukoñ ñko emaebana anye afịd idem ekanna ke udʌk ye mme pomekrened a-brọns. Abai anye ako, ye mme pomekrened amọ, akedo ukem. 23 Pomekrened anaañ mme duob mme itiokeed ekeba ke mme mbañ amọ; afịd ibad pomekrened se ikiba ikanna akedo ikie.

24 Adaiso mbon ukpeme amaamʌm Seraiya ekamba aku, Sefanaiya udiana ekamba aku ke ndaha ye mme akpeme inuausʌñ awo ita nte mbon ñkpakọb. 25 Ke atu mbon ekesʌkkọ ke abio, anye amaaben etubom ekọñ a-aseeghe ñkpọ abaña mme anwana ekọñ, ye mme anọitem adidem itiaba. Anye amaanyʌñ aben awedñwed a-akedooho etubom akeseeghe ñkpọ abaña edidat mme awo ke abio nsịn ke ekọñ; mbon ekedatta esịn ke ekọñ ke atu mbon e-ekekịtte ke abio ekedo awo ata. 26 Nebusaradan a-akedooho adaiso ekọñ amaakoono afịd ammọ asọk adidem Babilọn ke Ribla. 27 Do ke Ribla ke isọñ Hamad, adidem Babilọn amaanam ewot ammọ.

Ke ntoro Yuda amaadʌk ufʌn, akpọñ isọñ amọ.

28 Ibad mbon se Nebukadnesa akeben anyọñ ado ami:

ke ayọhọ isua itiaba,

mme Yuu tọsịn ita mme edịb mme ita (3,023)

29 ke ayọhọ isua duob mme itiaita ke ukara Nebukadnesa,

awo ikie itiaita mme edịb mme duob mme iba (832) ke Yeruselem;

30 ke ayọhọ isua amọ edịb mme ita,

Nebusaradan adaiso ekọñ ukpeme adidem amaaben mme Yuu ikie itiaba mme aba mme ition (745) akaa asenidịd.

Afịd awo ekedo tọsịn inaañ mme ikie itiokeed (4,600).

31 Ke ayọhọ isua edịb mme duob mme itiaba ake Yehoiyakịn adidem Yuda a-akebaaha ke asenidịd, ke isua ake Awel-Maaduk akekappake ado adidem Babilọn, ke ayọhọ usen edịb mme ition ke ayọhọ afiọñ duob mme iba, anye amaasaana Yehoiyakịn adidem Yuda ayaak, anyʌñ asio anye ke ufọkñkpakọb. 32 Anye amaatañ ikọ emem-emem ye anye anyʌñ anọ anye itie ukpono akekoñño akan ake mme ndidem mfen e-ekebaaha ye anye ke Babilọn. 33 Ndin Yehoiyakịn amaasịññe afọñ ñkpakọb amọ ndin ke afịd ayio uwem amọ akedia ñkpọ ke akpokoro adidem. 34 Ke usen ke usen adidem Babilọn amaanọ Yehoiyakịn akʌk ekpadafọñ ke afịd ayio uwem amọ, tutu akem usen ñkpa amọ.