1 " ‘Ke ini ado, Abọọñ amaabo, eyaesiooño akpọ mme ndidem ye mme adaaha Yuda, akpọ mme aku ye mme prọfed, akpọ mbon Yeruselem ke mme udi ammọ. 2 Ayio ye afiọñ ye afịd udịm mme ntantaafiọñ ke mme hefịn a-ammọ ekemaaha enyʌñ enam ñkpọ enọ, e-ekenyʌññọ ekeene enyʌñ enam nduuñọ eto enyʌñ ekpono, eyaemia ammọ. Awo idiikoonoke ammọ idiinyʌññọ ibuuk, ado ammọ ediibono nte mbio ke isọñ. 3 Ini keed akeedodo a-ami ndiibịne ammọ nsio, mme andisʌhọ ke idiọọk abio ami eyaema ñkpa ekan uwem, Abọọñ Andikponñkan atañ.’

4 "Bo ammọ, ‘Ntom ke Abọọñ atañ:

" ‘Ke ini mme awo eduọhọ, ado nte ammọ isidakkake ida?

Awo amaawọññọ akpọñ usʌñ, ado nte isitịmmeke idi aba?

5 Nsoo ndin ido nọ ibon ami ewọññọ ekpọñ usʌñ?

Nsoo ido nọ Yeruselem asʌk asiwọññọ akpọñ usʌñ?

Ammọ eyịre ke abiaña;

ammọ esịn aditịmme ndi.

6 Ami mmenekke ñkpañ utọñ,

ado ammọ itañña se inen.

Ibaaha awo ammọ ndomokeed a-atuaha ñkpọfiọk abaña ibak amọ,

abo, "Nsoo ke ami nnam?"

Ammọ keedekeed edo anie afañ awaak adʌk

nte enañmbakara a-abịmmeke akaa anwan.

7 Akapado ikpañinyañ ke ikpaanyọñ

adiọọñọ ini e-emekke enọ anye,

ñko ibiom, akadañabasi ye akpantaña

ekpeme ini isañ ammọ.

Ado mbon mmi idiọọñọke

se Abọọñ ayem.

8 " ‘Esaña die ebo, "Ñnyịn ido mbon aniọñ,

sia ñnyịn iminie mbed Abọọñ,"

ke ini adooho mme nsu-nsu etoñwed mme awedñwed

ekama anye ke nsu?

9 Eyaesịn mbon aniọñ ke abuud;

idem ayaabọkkọ ammọ enyʌñ emʌm ammọ.

Sia ammọ esịn ikọ Abọọñ,

nsoo utọ aniọñ ke ammọ enie?

10 Ke ntoro ñyaabọ ibaan ammọ ñyaak nnọ ideen mfen edọ,

ñnyʌñ ñyaak mme inwañ ammọ nnọ mme ufa andinie.

Tọọñọ ke andisịb ñkan tutu akesịm andikpon ñkan,

afịd ediọọk itọñ eyem udod;

mme prọfed ye mme aku ukem-ukem,

afịd enam abiaña.

11 Ammọ esọbọ enyʌñ ebọp unan ikọd mmi

nte idooho akpan ñkpọ.

Ammọ ebo, "Emem, emem,"

ke ini emem imiibaaha.

12 Ado nte ammọ ekop abuud ebaña mbubiam adinam ammọ?

Iyoo, ammọ ikoppo abuud ndomokeed;

ammọ inieghe iso abuud ndomokeed.

Ndin ammọ eyaeduọ ke atu mbon eduọhọ;

eyaesuuhọ ammọ ke ini emaenọ ammọ ufen,

Abọọñ atan.

13 " ‘Ñyaakoono idọk ammọ,

Abọọñ atañ.

Kreb idiinwịmme ke fain.

Ndin fik idiinwịmme ke eto,

ndin mme mfañ ammọ eyaeyeeme.

Eyaebọ ammọ

se ami nnọ ammọ.’ "

14 Nsoo ido nọ ñnyịn itie mi?

Iboho itie keed!

Yak ñnyịn ifeeñe ika mme ñkpọsọñ abio

inyʌñ itak do!

Sia Abọọñ Abasi ñnyịn a-abiide ate yak ñnyịn itak,

ndin inọ ñnyịn mmọọñ ñkpa yak inwọñ,

sia ñnyịn iminam idiọọkñkpọ ke iso amọ.

15 Ñnyịn ikidot anyen ke emem,

ado ufọn ndomokeed ibaaha,

ikidot anyen ke ini adikọk,

ado ñkpọ ndịk ikpọọñ aba.

16 Tọọñọ ke Daan

ke ikop naña mme enañmbakara mme asua efiara;

ke naña ñyaara enañmbakara esio uyio,

ndin afịd isọñ anyeeñe.

Ammọ edi adisobo

isọñ ye afịd ñkpọ se isịne ke esịd,

abio ye afịd awo e-edʌñọke do.

17 "Se, ami ñyaadọñ mme ndiọi udʌkikọd ke atu ndufo,

mme ibọm a-awo imiikanna isuuk ide,

ndin ammọ eyaidom ndufo,"

Abọọñ atañ.

18 Afo a-adooho Idọñesịd mmi ke mfʌhọ,

idem ammem miin.

19 Kpañ utọñ kop ntuaña mbon mmi

ke ataa anyan isọñ:

"Ado nte Abọọñ ibaaha ke Saiyọn?

Ado nte Adidem amọ ibaaha do aba?"

"Nsoo ido nọ ammọ edemme iyadesịd mmi ke mme ubobodñkpọ ammọ,

ye mme mbiaña isen ubobodñkpọ?"

20 "Idọk aboiyo,

ndaayio akweeñe,

ndin ñnyịn ikịtte adinyaaña."

21 Sia emaesọnnọ mbon mmi, ensọnnọ miin;

ami mmefʌhọ ndin nnananyen ammʌm miin.

22 Ado nte ufọfiọññọ adan ibaaha ke Kilied?

Ado nte abiaibọk ibaaha do?

Nsoo ido ndin yak ukọk imiibaaha

inọ unan mbon mmi?