1 Ikọ se ikito Abọọñ idisịm Yerimaiya ke ayọhọ afiọñ duob ke isua ukara Sedekaiya adidem Yuda, a-akedooho ayọhọ isua ukara Nebukadnesa duob mme itiaita ado ami. 2 Udịmekọñ adidem Babilọn emaekanna Yeruselem ekʌk, ndin emaekʌk prọfed Yerimaiya esịn ke akwere mbon ukpeme ufọk ubọọñ Yuda.

3 Idaha ado Sedekaiya adidem Yuda amaasịn anye ke ñkpakọb do, abo ate, "Nsoo inam nọ afo atañ ñkukịd naña afo atañ ado? Afo ate, ‘Se Abọọñ atañ ado ami: Ami ñyaayaak abio ami nsịn ke ubọk adidem Babilọn, ndin anye ayaadat abio ami. 4 Sedekaiya adidem Yuda idiibọkkọke mbon Babilọn, ado eyaeyaak anye esịn adidem Babilọn ke ubọk, ndin ayaaneme nneme ye anye iso ye iso anyʌñ akịt anye ke anyen amọ. 5 Anye ayaaben Sedekaiya akaa Babilọn, itie se anye adiiba tutu ami ndinọmọ anye, Abọọñ atañ. Adieke afo anwanake ye mbon Babilọn, afo uduukanna.’ "

6 Yerimaiya amaabo, "Ikọ Abọọñ amaadinsịm miin: 7 Hanamel ayịn Salum ayịneka ete mfo ayaadi ubịne fiin adibo ate, ‘Dep inwañ mmi adaaha ke Anatod, sia nte ayịnete mmi anekkeke añkpere idem ado unen ye ubiọñutom mfo adidep anye.’

8 "Akem, kpa naña Abọọñ amaaketañ, ayịnete mmi Hanamel amaadi ambịne miin ke akwere mbon ukpeme adibo, ‘Dep inwañ mmi ke Anatod ke efaak ñkañ Benyamin. Sia adooho unen mfo adifakka anye ñnyʌñ ndat anye, dep anye nie nọ idem mfo.’

"Ami mmaadiọọñọ ke uyio Abọọñ akedo ami; 9 ndin ami mmaadep inwañ ado ke Anatod nto ayịnete mmi Hanamel ñnyʌñ ndomo mbaak akʌk sekel silfa duob mme itiaba* nnọ anye. 10 Ami mmaasịn ubọk ñnyʌñ mfiik ubọk ke ñwed isọñ ami, mmaanie ntiense, ñnyʌñ ndomo mme silfa ami ke udomoñkpọ. 11 Ami mmaaben ñwed unyam isọñ, ñwed a-akenieghe idiọọñọ ufiik ubọk a-akedọñọke mme item ye ewʌhọ, adiana ye ñwed a-awo imiikifiike ubọk; 12 ndin ami mmaayaak ñwed isọñ ami nnọ Baruk ayịn Neria, a-akedooho ayịn Maseiya, ke iso ayịnete mmi Hanamel ye ke iso mme ntiense e-emaekesịn ubọk ke ñwed isọñ ami ye afịd mme Yuu se ikitie ke akwere mbon ukpeme.

13 "Ke iso ammọ ami mmaanọ Baruk mme item ami: 14 ‘Se Abọọñ Andikponñkan, Abasi Isrel, atañ ado ami: Ben mme ñwed ami, mme ñwed ekenyamma isọñ se emaekesịn ubọk ye mbon se awo imiisịnne ubọk, nyʌñ sịn ammọ ke ako mbad nọ ammọ eba ekpeene ke anyan ini. 15 Sia se Abọọñ Andikponñkan, Abasi Isrel, atañ ado ami: Eyaetịmme edep mme ufọk, mme ikọd ye mme inwañ fain ke isọñ ami.’

16 "Ke ini ami mmaakeyaak ñwed isọñ ami nnọ Baruk ayịn Neria, ami mmaabọñ akam nnọ Abọọñ:

17 "Aha, Abọọñ Andikara, afo amaabot mme hefịn ye ederimbod ke akwa adudu ye ubọk mfo. Ibaaha ñkpọ se isọñ ukan fiin. 18 Afo awọt mme awo tọsịn ima ado aben ufen idiọọkñkpọ mme ete adot nditọ ke idem. Akwa ye akpọsọñ Abasi, a-anyịñ mfo adooho Abọọñ Andikponñkan, 19 mme uduak mfo ekpoon, mme ubọkutom mfo enyʌñ enie uteeñe. Anyen mfo atara ase usʌñ afịd ubonawo; afo anọ awo keedekeed utịb akeene adinam ammọ ye naña adinam ammọ adot. 20 Afo amaanam mme idiọọñọ ye utịppeñkpọ ke Iyib ñko afo asʌk akaaka iso adinam ammọ tutu usen ami, ke Isrel ye ke atu afịd ubonawo, afo amenyʌñ awuọ etob a-afo asʌkkọ awuọ mfịn ami. 21 Afo amaaben ikọd mfo Isrel asio ke Iyib ye idiọọñọ ye utịppeñkpọ, ke akwa adudu ye akwa ubọk mfo ye ekamba ndịk. 22 Afo amaanọ ammọ isọñ ami a-afo akenwọñọke adinọ mme eteete ammọ, isọñ a-afiọọrọke ye mmọọñeba ye adanakwọọk. 23 Ammọ emaedʌk edi enyʌñ edat isọñ ado enie, ado ammọ ikikoppo item unọ fiin inyʌññọ ikeene mbed mfo; ammọ ikinamma se afo akenọọ ammọ nte ewʌhọ. Ndin afo amaaben afịd mme afanekọñ ami adot ammọ.

24 "Ise naña ebọp ñkpana ubiọọñọ ekọñ adidat mben abio ami. Ke ntak akañkañ, akañ ye udọñọ nsobo, eyaeyaak abio ami esịn ke ubọk mbon Babilọn e-enwanake ye anye. Se afo aketañ atịppe kpa naña afo akịt ke anyen mfo. 25 Akpesʌkado eyaeyaak abio ami esịn ke ubọk mbon Babilọn, afo, Abọọñ Andikara, a-ambo miin, ‘Dep inwañ ami ye silfa nyʌñ nam awo atie ntiense unọ ke ndubeghe ami.’ "

26 Ndin ikọ Abọọñ amaadisịm Yerimaiya: 27 "Ami ndo Abọọñ, Abasi afịd ubonawo. Nte aba ñkpọ ndomokeed se isọñ iñkan miin? 28 Ke ntoro se Abọọñ abo ado ami: Ami ñyaayaak abio ami nsịn ke ubọk mbon Babilọn ye Nebukadnesa adidem Babilọn, ediisịn anye ukad. 29 Mbon Babilọn enwanake ye abio ami eyaedisịn ikañ ke abio ami; ammọ eyaefọp anye enịm ke isọñ, adiana ye mme ufọk a-mme awo ekedịppeke iyadesịd mmi, ke adifọp insensi ke mme akọmufọk nnọọ Baal, ñko ye ke adiduọk ukọd nte uwa nnọọ mme abasi mfen.

30 "Mbon Isrel ye Yuda inamma ñkpọ mfen ikan idiọọkñkpọ ke iso mmi tọọñọ ke uyịn ammọ; ke akpanikọ, mbon Isrel inamma ñkpọ mfen ke imiibọhọke adidịppe iyadesịd mmi ke se ubọk ammọ anam, Abọọñ atañ. 31 Tọọñọ ke usen ekebọppọ anye tutu asịm idahami, abio ami amaadịppe iyadesịd ye ifiobesịd mmi, ke ntak ado ana mben anye mfep ke iso mmi. 32 Mbon Isrel ye Yuda eñyat miin esịd ke afịd se ammọ enam; ammọ, mme ndidem ammọ, mme adaaha ammọ, mme aku ammọ, ye mme prọfed ammọ, mbon Yuda ye mme andidʌñ ke Yeruselem. 33 Ammọ emaekanna edem eñwọt miin, idooho iso ammọ; akpesʌkado a-ami ñkekpeebe ammọ mbañ mbañ, ammọ ikikpañña utọñ inyʌññọ ikop ntʌnọ. 34 Ammọ emaekọọñ mme mbubiam ñkpọ ammọ ke ufọk e-ekoodo edian Anyịñ mmi enyʌñ esappa anye. 35 Ammọ emaebọp mme ñkoñ-ñkoñ itie enọ Baal ke Abedeñ Ben Hinọm, adiwa nditọ ideen ye nditọ ibaan ammọ nnọọ Mọlek, akpesʌkado a-ami mmiikinọọhọ ammọ utọ ewʌhọ ado; ikinyʌññọ indọdʌk miin akikere, nte ke ammọ ekpaenam utọ mbubiam ñkpọ ado enyʌñ enam Yuda anam idiọọkñkpọ.

36 "Afo atañ abaña abio ami, ‘Ke akañkañ, akañ ye udọñọ nsobo eyaeyaak anye esịn ke ubọk adidem Babilọn’; ado se Abọọñ Abasi Isrel atañ ado ami: 37 Ami ñyaakoono ammọ ke afịd mme isọñ se ñkebịne ammọ ndọñ ke akpọsọñ iyadesịd ye ifiobesịd mmi; ami ñyaaben ammọ ñnyọñ ndi itie ami ñnyʌñ nnam ammọ edʌñ ke ifuuro. 38 Ammọ eyaedo ikọd mmi ndin ami ñyaado Abasi ammọ. 39 Ami ñyaanọ ammọ esịd keed ke unañña ñkpọ, mbaak ammọ emfeghe miin afịd ini, ñko nọ afịd ñkpọ afọn ye ammọ ye nditọ ammọ e-ekeeneke ammọ ke edem. 40 Ami ñyaanam nsi-nsi edioomo ye ammọ: Ami ndiitreke adinam eti ñkpọ nnọọ ammọ, ndin ami ñyaademme ammọ ukpọñ nọ embaak miin, mbaak ammọ edikanna edem eñkpọñ miin tutu amama. 41 Ami ñyaakop inemesịd ke adinam nti ñkpọ mfọn nnọọ ammọ, ndin ñyaawuuk ammọ ke isọñ ami ke afịd esịd ye ukpọñ mmi.

42 "Se Abọọñ atañ ado ami: Kpa naña ami ñkeben afịd ikpọ mfịna ami ndot ibon ami, kpa ntoro ke ami ndiinọ ammọ afịd uforo a-ami ñkenwọñọke nnọ ammọ. 43 Ini keed mfen eyaedep mme inwañ ke isọñ ami naña afo abo, ‘Anye ado isọñ emaekesobo, a-awo ye mme unam imiibaaha, sia emaeyaak anye esịn ke ubọk mbon Babilọn.’ 44 Eyaedep mme inwañ ke silfa, enyʌñ esịn ubọk ke ñwed isọñ, efiik ubọk ye ntiense ke ñkañ Benyamin, ke mme esịd idʌñ e-ekannake Yeruselem ekʌk, ke mme abio Yuda ye ke mme anyọñ abio isọñ idʌñ, ke usuuk ntəkabod edem usobutịn ye ke ñkañ Nekef, sia ami ñyaatịmme ndịppe uforo ammọ ndaaha,* Abọọñ atañ."