1 Ke Nebukadnesa adidem Babilọn amaakekoono Yehoiyakịn* ayịn Yehoiyakịm adidem Yuda ye mme adaaha amọ, nta mme anam utomusọ ye mbon udomutịm asio ke Yeruselem, Abọọñ amañwọt miin mme akpasa fik iba ekenịmme ke iso tembịd Abọọñ. 2 Akpasa keed amaadọñọ ataa nti fik, nte mbon ekebakka edat; akpasa anye ako amaadọñọ ataa ndiọi fik, ediọi tutu idooho se ekan edia ammọ.

3 Ndin Abọọñ amambịp miin, "Yerimaiya, nsoo ke afo akịt?"

Ami mmaabọọrọ "Mme fik. Mbon se ido nti enekke efọọn, ado mbon se ido ndiọi ediọi tutu idooho se edia."

4 Ndin ikọ Abọọñ amaadinsịm miin ate: 5 "Se Abọọñ, Abasi Isrel, atañ ado ami: ‘Nte mme nti fik ami, ke ndat nte nti mbon a-ami ñkesioho nto Yuda nọ eka isọñ Babilọn. 6 Anyen mmi ayaakpeme ammọ ke ufọn ammọ, ndin ami ñyaaben ammọ ntịmme ñnyọñ ndi isọñ ami. Ami ñyaabọp ammọ ndin ndiiwuudo ammọ; ami ñyaatọ ammọ ado ndiiwịppeke ammọ. 7 Ami ñyaanọ ammọ esịd adindiọọñọ miin, ke ami ndo Abọọñ. Ammọ ediido mbon mmi, ndin ami ñyaado Abasi ammọ, sia ammọ eyaenyọñ embịne miin ke afịd esịd ammọ.

8 " ‘Ado kpa nte ndiọi fik, e-enyʌmmọke tutu idooho se edia,’ Abọọñ abo, ‘kpa ntoro ke ami ndiinam ye Sedekaiya adidem Yuda, mme adaaha amọ ye mbon se isʌhọ e-eketooho Yeruselem enyọñ edi, me ammọ eba ke isọñ ami me edʌñ ke Iyib. 9 Ami ñyaanam ammọ edo ñkpọ itekesịd ye iyadesịd enọ afịd mme idịd ke ederimbod, ñkpọ ndọk ye ufiid, isuuñọ ye ñkpọ nsaha, ke itie akeedodo a-ami mbịnne ammọ nọ eka. 10 Ami ñyaadọñ akañkañ, akañ ye udọñọ nsobo nnọ esọk ammọ tutu esobo ammọ afịd esio ke isọñ a-ami ñkenọọhọ ammọ ye mme eteete ammọ.’ "