1 Se Abọọñ atañ ado ami: "Kaa ke ufọk adidem Yuda nyʌñ kenọ etob ami do: 2 ‘Kop ikọ se Abọọñ adọñ unọọ fiin, adidem Yuda, afo a-atieghe ke ebekpo Defid, afo mme adaaha mfo ye mbon mfo e-esañake edʌk ke mme inuaatob ami. 3 Se Abọọñ atañ ado ami: Nam se inen inyʌñ ifọn. Nyaaña awo eyịppe ñkpọ amọ sio ke ubọk awo ufiik. Kuunam idiọọk, kuunyʌñ unam afai ye asenawo, ayịnakpa me ebekpa, ndin kuuduọk iyiib awo imiidueghe isop ke itie ami. 4 Adieke afo akpemeke adinam mme mbed mmi, mme ndidem e-etieghe ke ebekpo Defid eyaesaña eto ke mme inuaatob ufọk adidem ami edʌk, ewat ke mme sariọd ye ke mme enañmbakara, esaña ye mme adaaha ammọ ye mbon ammọ. 5 Ado adieke afo umuunịmme mme item ami, Abọọñ atañ, ami mmenwọñọ ke idem mmi ke itie ami adiido ndoon.’ "

6 Sia se Abọọñ atañ abaña ufọk adidem Yuda ado ami:

"Akpesʌkado a-ndufo ebaaha nte Kilied ennọ miin,

nte atịñe Lebanọn,

ke akpanikọ ami ñyaanam ndufo eba nte isọñ nsobo,

nte mme abio a-awo imiidʌññọ.

7 Ami ñyaadọñ mbon nsobo inọ ndufo,

anie mme ñkpọ ekọñ amọ anie,

ndin ammọ eyaekpook mme mfọọn asaña-asaña eto abom sida ndufo,

enyʌñ etoomo ammọ edọñ ke ikañ.

8 "Mbon awo eyaeto uwak idịd eboiyo ke abio ami enyʌñ ebịp emọ-emọ ebo, ‘Nsoo ido nọ Abọọñ anam utọ ñkpọ ami ke ekamba abio ami?’ 9 Ndin ibọọrọ adiido: ‘Sia ammọ emaewọññọ edem ekpọñ edioomo Abọọñ Abasi ammọ ndin ekpono enyʌñ enam ñkpọ enọ mme abasi mfen.’ "

10 Ikiitua inọọ adidem a-akpaaha, ikiinyʌñ ifʌhọ ntakudua amọ;

ado, ikap itua idod-idod ayịd inọ anye e-ebenne esio,

sia tutu amama anye idiinyọññọ idi aba,

idiinyʌññọ ikịt isọñ emana amọ aba.

11 Sia ntom ke Abọọñ atañ abaña Salum ayịn Yosaiya, a-akedatta itie ete amọ nte adidem Yuda ado akpọñ itie ami: "Anye idiinyọññọ idi aba. 12 Anye adiikpa ke itie ebenne anye esio ekesịn ukad; anye idiikịtte isọñ ami aba."

13 "Adọdiọọk anọ awo a-abọppọ ufọk adidem ke ukwañido,

mme ubeed anyọñ amọ ke ukwañ ikpe,

anam mbon amọ enam utom ñkaña,

ikpeeghe ammọ akʌk ke utom a-ammọ enamma.

14 Anye ate, ‘Ami ñyaabọp ekamba ufọk adidem nnọ idem mmi

ye mme ñnwaña ubeed anyọñ.’

Ke ntoro anye anam ñkpoon ubenafịm ke esịd,

akama sida akọñ mben ado,

akama ndad-ndad adeppe anye.

15 "Ado nte idiọọñọ udo adidem

ado adinie uwak sida?

Ado nte ete mfo ikinieghe ndidia ye ukọd?

Anye amaanam se inen ye se ifọn,

ndin afịd ñkpọ amaafọn ye anye.

16 Anye amaanwana anwan iwuod mbon uweene ye mbon unana,

ndin afịd ñkpọ amaafọn ama.

Nte idooho se adindiọọñọ miin awuọñọ adodo?"

Abọọñ atañ.

17 "Ado anyen mfo ye esịd mfo,

ewʌhọ ke idiọọk udod ikpọọñ,

ke adiduọk iyiib awo i-imiidueghe

ye ke adifiik ñnyʌñ ndat ke ñkanubọk."

18 Ke ntoro se Abọọñ atañ abaña

Yehoiyakịm ayịn Yosaiya adidem Yuda ado ami:

"Ammọ idiifʌhọke ibaña anye:

‘Sai, ayịneka mmi awodeen! Sai ayịneka mmi awonwaan!’

Ammọ idiifʌhọke ibaña anye:

‘Sai, eteufọk mmi! Sai, uku amọ!’

19 Ediibuuk anye nte ebuuk dọñki,

edʌt anye esio etop eduọọk

ke mme anwa inuaatob Yeruselem."

20 "Dọọk kaa Lebanọn nyʌñ tua uyio asọñ,

yak ekop uyio mfo ke Basan,

tua sọñ uyio ke Abarim,

sia esobo afịd mbon nsaña mfo.

21 Ami mmaudʌt fiin utọñ idaha a-afo akebaaha ke ifuuro,

ado afo amaabo, ‘Ami ndiikpañña utọñ!’

Eduuwem mfo ado ami tọọñọ ke uyịn mfo;

afo ukoppo ikọ unnọ miin.

22 Afịm ayaaben afịd mme akpemeedọñ mfo asio,

eyaekoono mbon nsaña mfo esio ekaa idịd mfen.

Ndin afo ayaadia ndọk anyʌñ abọ asuenne

ke ntak afịd ibak mfo.

23 Afo a-adʌññọ ke ‘Lebanọn,’

a-adʌññọ ke inem ke mme ufọk e-edatta sida ebọp,

ayaamịm mmịm ke ini ubiak amausịm fiin,

ubiak nte ake awonwaan a-abaaha ke ubiakuman!

24 "Adaña nte ami nduuho uwem," Abọọñ atañ asọọñọ ate, "akpọkọm ado afo, Yehoiyakịn* ayịn Yehoiyakịm adidem Yuda, akedo ñkpannuun idiọọñọ ke ubọk nnasia mmi, ami ñkpesʌk usosio fiin mfep. 25 Ami ñyauyaak fiin nsịn ke ubọk mbon e-eyemme aduwot fiin, mbon a-afo abaaha, kpa Nebukadnesa adidem Babilọn ye mbon Babilọn. 26 Ami ñyautop fiin ye eka a-akumanna fiin nsịn ke idịd mfen, a-adooho ndufo ndomokeed ikimanake do, ndin ndufo awo iba ediikpa do. 27 Ndufo idiitịmmeke idi isọñ a-ndufo enyieghe udọñ adinyọñ ndi aba."

28 Ado nte awo ami, Yehoiyakịn, ado awo ndọk, usiọñ,

ñkpọ se awo ndomokeed imiiyemme?

Nsoo ido nọ ediitop anye ye nditọ amọ iduọọk,

edọñ ke isọñ a-ammọ imiidiọọñọke?

29 O isọñ, isọñ, isọñ,

kop ikọ Abọọñ!

30 Se Abọọñ atañ ado ami:

"Wet baña awodeen ami nte anana ayịn,

awodeen i-imiidiiforoke ke ayio uwem amọ,

sia ayịn amọ ndomokeed idiiforoke,

ndomokeed idiitieghe ke ebekpo Defid,

inyʌññọ ikara aba ke Yuda."