1 Ke ini Nebukadnesa adidem Babilọn ye afịd udịmekọñ amọ ye afịd mme abioubọọñ ye mbon awo ke idʌñ a-anye akekarake ekenwanake ye Yeruselem ye afịd mme ñkanñkʌk abio amọ, ikọ ami amaato Abọọñ adisịm Yerimaiya: 2 "Se Abọọñ, Abasi Isrel, atañ ado ami: Kaa bịne Sedekaiya adidem Yuda nyʌñ kedọkkọ anye ate, ‘Se Abọọñ atañ ado ami: Ami ñyaayaak abio ami nsịn adidem Babilọn ke ubọk, ndin anye ayaafọp anye anịm ke isọñ. 3 Afo uduubọkkọke anye, ado eyaumʌm fiin eyaak enọ anye. Afo ayaakịt adidem Babilọn ke anyen mfo, ndin anye ayaatañ ikọ ye afo iso ye iso. Ndin afo ayaakaa Babilọn.

4 " ‘Ado kop enwọñọ Abọọñ u-ubañake fiin, Sedekaiya adidem Yuda. Se Abọọñ atañ ubaña fiin ado ami: Afo uduukpaaha ke akañkañ; 5 afo uduukpa ke emem. Naña mme awo ekebara ikañ ukpono enọ mbọọñ e-eketooho ekara mbemiso afo adidat itie ammọ, ndidem e-ekekarake mbemiso afo, kpa ntoro ke ammọ ediibara ikañ ukpono unọ fiin enyʌñ eseeme, "Sai, eteufọk!" Ami ke idem mmi nnam enwọñọ ami, Abọọñ atañ.’ "

6 Akem prọfed Yerimaiya amaatañ afịd mme ñkpọ ami anọ Sedekaiya adidem Yuda, ke Yeruselem, 7 ke idaha udịmekọñ adidem Babilọn ekesʌkkọ enwana ye Yeruselem ye mme abio Yuda mfen ekesʌkkọ esọọñọ emʌm ekama, Lakis ye Aseka. Ukweeñe ñkpọsọñ abio se ikisʌhọ ke Yuda ekedo ami.

8 Ikọ Abọọñ amaadisịm Yerimaiya ke ini adidem Sedekaiya amaakenam edioomo ye afịd awo ke Yeruselem adikwọrọ uwuọufʌn nnọọ mme ifʌn. 9 Akena nte afịd awo esaana ifʌn Hibru ammọ eyaak, ke ideen ye ibaan; ikinaaha awo ndomokeed asịn emọ-emọ awo Hibru ke ukad. 10 Ndin afịd mme adaaha se ikinyịmme edioomo ami emaebo ke mmimọ iyaisaana ifʌn mmimọ ideen ye ibaan iyaak inyʌññọ isịn ammọ ukad. Ammọ emaenyịmme, enyʌñ esaana ammọ eyaak. 11 Ado akema ammọ emaekpəho akikere enyʌñ etịmme emuum mme ifʌn ammọ e-emaekeyaak enyʌñ emaana esịn ammọ ke ufʌn.

12 Akem ikọ Abọọñ amaadisịm Yerimaiya: 13 "Se Abọọñ, Abasi Isrel, atañ ado ami: Ami mmaanam edioomo ye mme eteete ndufo idahami a-ñkesioho ammọ ke isọñ Iyib, ke isọñ ufʌn. Ami mmaabo, 14 ‘Ke afịd ayọhọ isua itiaba ana ndufo esaana emọ-emọ mbon Hibru ekenyamma idem ammọ nte ifʌn inọọ ndufo eyaak. Ke ammọ emaekedʌñ ye ndufo ke isua itiokeed, ana nte ndufo eyaak ammọ nọ enyọñ.’ Ado mme eteete ndufo ikikoppo se ami ñketañ, ikinyʌññọ ikpañ utọñ innọ miin. 15 Ke mmi-mmi afo amaakappa esịd anyʌñ anam se inen ke iso mmi: Ndufo keedekeed emaenyịmme uwuọufʌn enọ ikọd ndufo. Ndufo emaenam edioomo ke iso mmi ke ufọk a-akereke Anyịñ mmi. 16 Ado idahami ndufo emetịmme esappa anyịñ mmi; ndufo keedekeed emaetịmme eben ifʌn ndufo ideen ye ibaan a-ndufo ekesaanake eyaak ete enyọñọ. Ndufo emenyịk ammọ aditịmme ndo ifʌn ndufo.

17 "Ke ntoro se Abọọñ atañ ado ami: Ndufo ikoppo item mmi; ndufo ikikpọkkọ mbon ndufo iyaak. Ke ntoro ami mmekwọrọ ‘ñkpọkñyak’ inọ ndufo, Abọọñ atañ, ‘ñkpọkñyak’ adikpa ke akañkañ, udọñọ nsobo ye akañ. Ami ñyaanam ndufo edo ñkpọ itekesịd enọ afịd mme idịd ke ederimbod. 18 Mbon e-ekebiatta edioomo mmi, i-imiinyʌññọ inịm mme ewʌhọ edioomo a-ammọ ekenamma ke iso mmi, ami ñyaanam ammọ nte ñyịn enañ a-ammọ ekebakkake iba enyʌñ esaña ke ufọọd mbaak iba ado eboiyo. 19 Mme adadusʌñ ke Yuda ye ke Yeruselem, mme adaaha esob, mme aku ye afịd mme awo ke abio ekesañake ke mbaak iba ñyịn enañ ado, 20 ami ñyaayaak nsịn ke ubọk mme asua ammọ eyemme adiwot ammọ. Mme akpo ammọ eyaekappa ndidia enọ mme inuen ye ndiọi unam.

21 "Ami ñyaaben Sedekaiya adidem Yuda ye mme adaaha amọ nsịn mme asua ammọ eyemme adiwot ammọ ke ubọk, ye udịmekọñ adidem Babilọn, emaeketịmme edem ikpọñ ndufo. 22 Ami ñyaanọ ewʌhọ, Abọọñ atañ, ndin ami ñyaaben ammọ ntịmme ndi abio ami. Ammọ eyaenwana ye anye, eben anye enyʌñ efọp anye enịm ke isọñ. Ndin ami ñyaasobo mme abio Yuda mbaak awo ndomokeed adidʌñ do."