1 Nebukadnesa adidem Babilọn amaanam Sedekaiya ayịn Yosaiya adidem ke Yuda; anye akekara ke itie Yehoiyakịn* ayịn Yehoiyakịm. 2 Anye, me mbon utom amọ, me awo ndomokeed ke isọñ abio ikinọọhọ ñkpañutọñ ke mme ikọ se Abọọñ aketañ ato inua prọfed Yerimaiya.

3 Ado Adidem Sedekaiya amaadọñ Yehukal ayịn Selemia ye aku Sefanaiya ayịn Maaseiya utom anọ prọfed Yerimaiya ye etob ami: "Mbọk bọñ akam nọ Abọọñ Abasi ñnyịn inọ ñnyịn."

4 Ke ini ntom Yerimaiya amaanie unen adisaaña ke atu awo, sia awo ikisịnne anye diin ke ufọk ñkpakọb. 5 Udịmekọñ Fero emaesaña ewuọ ke Iyib, ndin ke ini mbon Babilọn e-ekekannake Yeruselem ekʌk ekekoppo etob ebaña ammọ, ammọ emaewuọñọ ke Yeruselem.

6 Akem ikọ Abọọñ amaadisịm prọfed Yerimaiya: 7 "Ami ado se Abọọñ, Abasi Isrel, atañ: Dọkkọ adidem Yuda, a-akudọññọ fiin abo adibịp ñkpọ anto miin ate, ‘Udịmekọñ Fero e-ekesañake ewuọñọ edi adunwam fiin eyaetịmme enyọñọ isọñ ammọ ke Iyib. 8 Ndin mbon Babilọn eyaetịmme edi edinwana abio ami; ammọ eyaekan anye enyʌñ efọp anye enịm ke isọñ.’

9 "Ami ado se Abọọñ atañ: Ikiibiaña idem ndufo, ikere ibo, ‘Ke akpanikọ mbon Babilọn eyaikpọñ ñnyịn.’ Ammọ idiikpọññọ! 10 Akpekọm ndufo ekpaekan afịd udịmekọñ mbon Babilọn e-ediighe edinwana ndufo ndin ado ideen se idat unan ikpọọñ esʌhọ ke atayad ammọ, ammọ eyaewuọ edifọp abio ami enịm ke isọñ."

11 Ke ini mbon ekọñ Babilọn emaekewuọñọ ke Yeruselem ato ke ntak mbon ekọñ Fero, 12 Yerimaiya amaatọọñọ adiwuọ ke abio Yeruselem ñkaa edem ukañ Benyamin adibọ udeeme ñkpọ amọ do. 13 Ado ke anye amaakewuọ Inuaatob Benyamin, adaiwuod ukpeme, a-anyịñ amọ akedooho Iriya ayịn Selemia, ayịn Hananaiya, amaamʌm prọfed Yerimaiya abo, "Afo ayem adifeghe ñkaa ukañ mbon Babilọn!"

14 Yerimaiya amaabo ate, "Idooho ntoro! Ami mfegheke ñkpọñ mi mbịne mbon Babilọn." Ado Iriya ikikpañña utọñ inọ anye; utu ke ado anye amaamʌm Yerimaiya anyʌñ aben anye asọk mme adaaha. 15 Mme adaaha emaeyat esịd ye Yerimaiya enyʌñ enam emia anye enyʌñ esịn anye ke ñkpakọb ke ufọk Yọnatan awedñwed, a-ammọ ekekappake enịm nte ufọk ñkpakọb.

16 Ekesịn Yerimaiya ke ebuka ñkpakọb ke ubeed esịdisọñ, ndin anye amaaba do ke anyan ini. 17 Akem adidem Sedekaiya amaadọñ ekekoot anye anyʌñ aben anye adi ufọk ubọọñ, do ke akebịp anye ke ndịbe ate, "Nte aba ikọ se ito Abọọñ?"

Yerimaiya amaabọọrọ ate, "Ii, eyauyaak fiin esịn ke ubọk adidem Babilọn"

18 Akem Yerimaiya amaabo adidem Sedekaiya ate, "Nsoo idiọọk ke ami unam fiin me mbon utom mfo, me idịd ami, nọ afo ansịn miin ke ufọk ñkpakọb? 19 Mmọ mme prọfed mfo e-eketañña prọfesi unọọ fiin ebo, ‘Adidem Babilọn idiinwanake ye afo me ye isọñ ami’? 20 Ado idahami, abọọñ mmi ye adidem mmi, mbọk kop. Yak ami mben ñkpeubọk mmi ndi iso mfo: Kuumaana unnọọ miin ñka ufọk Yọnatan awedñwed, imiidooho ntoro ami ñyaakekpa do."

21 Akem Adidem Sedekaiya amaanọ uyio ate enịm Yerimaiya ke akwere itie mbon ukpeme enyʌñ enọ anye idem uyo keed ke usen ke usen ato itie mbon unam uyo ke efaak tutu afịd uyo ke abio akweeñe. Ndin Yerimaiya amaakaa iso aba ke akwere itie mbon ukpeme.