1 Ikọ a-aketooho Abọọñ adisịm Yerimaiya ado ami: 2 "Dakka kaa ufọk abodabañ, ndin ami ñyaunọ etob mmi ke udo." 3 Ndin ami mmaasaña ñkaa ufọk abodabañ, ñnyʌñ ñkekịt naña anye anam utom ke ekara ukwak unuakka aduañ amọ. 4 Ado abañ a-anye akebotto ato aduañ amaabiara anye ke ubọk; ndin abodabañ amaakappa anam anye asịn ke abañ mfen, abot anye naña anye akekịt ke afọn ye anye.

5 Ndin ikọ Abọọñ amaadinsịm miin. 6 Anye amaabo, "Ado nte ami ñkanna nnam ye ndufo, Isrel, kpa naña abodabañ ami anam?" Abọọñ atañ. "Isrel, kpa naña aduañ aba ke ubọk abodabañ, kpa ntoro ke ndufo eba ke ubọk mmi. 7 Adieke ami ntañña ke ini akeedodo ke eyaewịppe, ewuut enyʌñ esobo idịd me abioubọọñ, 8 ndin adieke idịd ado a-ami ñkedʌttọ utọñ akappake esịd akpọñ idiọọkñkpọ amọ, ami ñyaateek ubọk, ñnyʌññọ mben nsobo a-ami ñkeduakka nsọk anye. 9 Ñko adieke ami ntañña ke ini mfen mbo ke eyaebọp enyʌñ esọọñọ idịd me abioubọọñ, 10 ndin adieke anye anamma idiọọkñkpọ ke iso mmi inyʌññọ ikop item mmi, ami ñyaamaana ñkere mbaña eti ñkpọ a-ami ñkeyemme adinam nnọọ anye.

11 "Ke ntoro dọkkọ mbon Yuda ye mbon se idʌñ ke Yeruselem idahami, ‘Se Abọọñ atañ ado ami: Se! Ami mmebeeñe nsobo inọ ndufo ñnyʌñ nduak idiọọk ibaña ndufo. Ke ntoro iwọññọ ikpọñ mme ndiọi usʌñ ndufo, ndufo keedekeed, inyʌñ ineeñe usʌñ ndufo ye mme adinam ndufo.’ 12 Ado ammọ eyaebọọrọ, ‘Ufọn ibaaha. Ñnyịn iyaikaa iso ke se ñnyịn ikiduak; afịd ñnyịn iyaikeene nsọñiwuod idiọọk esịd ñnyịn.’ "

13 Ke ntoro se Abọọñ atañ ado ami:

"Ibịp ke atu mme idịd:

Anie akenam akop utọ ñkpọ ntom?

Ayịn mboppo Isrel

anam ataa mbubiam ñkpọ.

14 Me sino Lebanọn

akeme adisop ke mme itiad-itiad itịkke amọ?

Me ndedeñ mmọọñ amọ a-atooho nsio-nsio ñnyan usʌñ

akeme itre adifiọọrọ?

15 Ado mbon mmi emfre miin;

ammọ efọp insensi enọ mme ubobodñkpọ i-imiibaaha ufọn,

a-anamma ammọ etuak ukod ke usʌñ ammọ,

ke mme usʌñ esed.

Enam ammọ esaña ke mme afañusʌñ,

ke usʌñ a-awo imiidiọññọ.

16 Isọñ ammọ adiido ñkpọ akpọsọñ ndịk

ye ñkpọ ndọk ke nsi-nsi;

afịd awo se iboiyo eyaekpaaña nsa,

ndin eyaefuuñ iwuod ammọ.

17 Kpa nte afịm a-atooho usakkautịn,

ami ñyaasuan ammọ ke iso mme asua ammọ;

ami ñyaakpa edem ñwọt ammọ, ñwọttọ ammọ iso mmi

ke usen nsobo ammọ."

18 Ammọ emaebo, "Idi, yak ñnyịn idʌk idiọọk edioomo ibaña Yerimaiya; sia ukpeeb mbed aku idiitreke, awo aniọñ idiinyʌññọ itre adinọ item, me ikọ item se ito mme prọfed. Ke ntoro idi, yak inwana ye anye ke edeme ñnyịn inyʌñ itre adikpañ utọñ nnọọ se anye atañ."

19 Kpañ utọñ nnọ miin, Abọọñ;

kop se mbon se itañ ikọ imbaaña miin ebo!

20 Me ado se edat idiọọk esio usiene eti ñkpọ?

Kpayeado ammọ edọk ube enịm ennọ miin.

Toiyo ke ami mmaada ke iso mfo,

ñnyʌñ ntañ ikọ ke ufọn ammọ

nọ awọññọ iyadesịd mfo asio akpọñ ammọ.

21 Ke ntoro yak akañ amʌm nditọ ammọ;

saana ammọ yaak nọ adudu akañkañ.

Yak enam ibaan ammọ edo mme ada ye mme ebekpa;

yak ewot mme ideen ammọ,

ewot ñkparawa ammọ ke akañkañ ke ekọñ.

22 Yak ekop uyio ayịd ke mme ufọk ammọ,

ke afo umauben mbon ekọñ ubịne ammọ adiwad-adiwad,

sia ammọ etịppe ube enịm edimmʌm miin,

enyʌñ ekọọk ndịbe afia enọ ukod mmi.

23 Ado afo, Abọọñ, amediọọñọ

afịd uduak ammọ adiñwot miin.

Kuufeen ndiọiñkpọ ammọ,

kuunyʌñ ukwokko ndiọiñkpọ ammọ usio ke anyen mfo.

Yak ekan ammọ ke iso mfo;

nam ammọ ñkpọ ke ini iyadesịd mfo.