1 Se Abọọñ aketañ annọọ miin ado ami: "Kaa kedep ñkpaha linen nyʌñ kpaha anye ke isịn mfo, ado kuuyak anye atuuk mmọọñ." 2 Ndin ami mmaadep ñkpaha, naña Abọọñ akentemme, ñnyʌñ ñkpaha ñkanna isịn mmi.

3 Ndin ikọ Abọọñ amaamaana adinsịm idem ayọhọ akañ iba: 4 "Dat ñkpaha a-afo akedeppe anyʌñ akpaha akanna isịn mfo, ndin kaa Perad idahami nyʌñ dịp anye ke mme mfafaha abaitiad." 5 Ndin ami mmaaben anye ñkaa ñkedịp ke Perad, kpa naña Abọọñ akembo miin.

6 Ke uwak usen emaekeboiyo Abọọñ amambo miin, "Kaa Perad idahami nyʌñ ke ben ñkpaha a-ami ñkebooho yak aben akedịp do." 7 Ndin ami mmaakaa Perad ñnyʌñ ñkedọk ñkpaha nsio ndin mmaaben anye nsio ke itie a-ami ñkedịppe anye, ado idahami anye amaabiara inyʌññọ iba ufọn aba.

8 Ndin ikọ Abọọñ amaadinsịm miin ate: 9 "Ntom ke Abọọñ abo: ‘Ke ukem usʌñ ami ñyaasobo uku Yuda ye ekamba uku Yeruselem. 10 Mbon ibak ami, e-esịnne edikpañ utọñ ñkop mme ikọ mmi, e-ekeeneke nsọñiwuod esịd ammọ enyʌñ ekeene mme abasi mfen edinam ñkpọ ñnyʌñ ñkpono ammọ, ediiba nte ñkpaha ami, ibaaha ufọn ndomokeed! 11 Sia kpa naña ekpaha ñkpaha ekanna isịn, ntoro ke ami ñkpaha mbon Isrel ye afịd mbon Yuda ndian ke idem mmi,’ Abọọñ atañ, ‘adido ñwuọnda mbon mmi ke itooro ye ukpono. Ado ammọ ikpañña utọñ.’

12 "Bo ammọ: ‘Se Abọọñ, Abasi Isrel, atañ ado ami: Akpena edọñ ukọd yak ayọhọ afịd ikịmukọd.’ Ndin adieke ammọ ubooho fiin, ‘Ado nte ñnyịn idiọọñọke ke akpena edọñ ukọd yak ayọhọ afịd ikịmukọd?’ 13 dọkkọ ammọ, ‘Ntom ke Abọọñ abo: Ami ñyaanam afịd awo se idʌñ ke isọñ ami eyọhọ ye inaam ukọd, tutu asịm mme ndidem e-etieghe ke ebekpo Defid, mme aku, mme prọfed ye afịd mbon se idʌñ ke Yeruselem. 14 Ami ñyaaben ammọ ntọ ye emọ-emọ, mme ete ye mme eka ye nditọ, Abọọñ atañ. Ami ndiiyakka udʌk me mbọm me ima añkpan miin adisobo ammọ.’ "

15 Kpañ utọñ nyʌñ kop,

kuukokko idem,

sia Abọọñ atañ.

16 Nọ Abọọñ Abasi mfo ubọọñ

mbemiso anye adat ekịm adi,

mbemiso afo atuak ukod

ke mme ñkịm-ñkịm abod.

Afo adot anyen ke unwana,

ado Abasi ayaakappa anye asịn ke ataa ekịm,

anyʌñ awọññọ anye asịn ke ndobo ekịm.

17 Adieke ndufo imiikpañña utọñ,

ami ñyaatua ke ndịbe

ke ntak ntañidem ndufo;

anyen mmi ayaatua idod-idod ayịd,

mmọọñayịd a-ayọhọ aduọi,

sia eyaekoono udịmedọñ Abọọñ ekesịn ke ukad.

18 Bo adidem ye abọọñanwaan,

"Isọiyọ ito mme ebekpo ndufo idi,

sia mme uyaiya anyanya ndufo

eyaedooño ke iwuod ndufo eduọññọ."

19 Eyaekuuk mme abio ke Nekef,

ndin idiibaaha awo ndomokeed se ikʌkkọ ammọ.

Eyaekoono afịd Yuda esio ekaa asen idịd,

ekoono ataa afịd-afịd.

20 Dịppe anyen ke anyọñ nyʌñ kịt

mbon e-etooho adoro edi.

Mmọ udịmedọñ e-ekeyaaha usịn fiin ke ubọk,

mme edọñ a-afo akekpọọhọ inua abaña?

21 Nsoo ke afo uduutañ idaha A-Abọọñ aduunọ ufen ke adinam nọ mbon

a-afo akedatta nte mme akpan nsaña mfo edukara fiin?

Nte ubiak iduumʌmmọ fiin

nte awonwaan a-abaaha ke ubiakuman?

22 Ndin adieke afo abịppe idem mfo,

"Nsoo ido nọ ñkpọ ami atịppe annọ miin?"

Ato ke ntak mme uwak idiọọkñkpọ mfo

ke ewaak mme ñkpịn mfo esio,

enyʌñ esappa idem mfo.

23 Nte awo Etiopia akeme adikpəho ikpọkidem amọ

me ekpeñkem akeme adikpəho ñkem amọ?

Kpa ntoro afo ukanna unam eti ñkpọ

ke ini unam idiọọkñkpọ amaakumeghe.

24 "Ami ñyaisuan ndufo nte mbio

a-afịm akpautatan asuanna.

25 Udeeme ndufo ado ami,

udeeme a-ami mbiereke inọọ ndufo," Abọọñ atañ,

"sia ndufo ememfre miin

enyʌñ ebuọt idem ke mme nsu-nsu abasi.

26 Ami ñyaadịppe mme ñkpịn ndufo ifʌk ndufo iso

nọ ekịt ndọk ndufo;

27 mme uyom efịbe ye akpọsọñ idiọọk udọñ ndufo,

unana iso abuud akpara ndufo!

Ami mmekịt mme mbubiam ido ndufo,

ke mme abod ye ke mme inwañ.

Adọdiọọk inọ ndufo, Yeruselem!

Adiikpeene die ndufo editre adisana?"