1 Sefatia ayịn Matan, Kedalia ayịn Pasọ, Yehukal* ayịn Selemia, ye Pasọ ayịn Malkiya emaekop se Yerimaiya akedọkkọ afịd mbon awo idaha anye akebooho ate, 2 "Ami ado se Abọọñ atañ: ‘Awo akeedodo a-abaaha ke abio ami adiikpa ke akañkañ, akañ me udọñọ nsobo, ado awo akeedodo a-akaaha Babilọn ayaadu uwem. Ammọ eyaebọkkọ ye uwem; ammọ eyaedu uwem.’ 3 Ndin ami ado se Abọọñ atañ: ‘Ke akpanikọ eyaeyaak abio esịn mbon ekọñ adidem Babilọn ke ubọk, a-adiidat anye inie.’ "

4 Akem mme adaaha emaebo adidem ete, "Akpena ewot awo ami. Anye asịn mbon ekọñ se isʌhọ ke abio ye afịd mbon awo mmemidem, akeene mme ikọ se anye atañ anọ ammọ. Awo ami iyemme ufọn ammọ ado ayem iduọ ammọ."

5 Adidem Sedekaiya amaabọọrọ ate, "Anye isịne ndufo ke ubọk, adidem ikemeke adinam ñkpọ ndomokeed adibiọọñọ ndufo."

6 Ndin ammọ emaemʌm Yerimaiya esịn ke ube mmọọñ Malkiya, ayịn adidem, a-akebaaha ke akwere itie mbon ukpeme. Ammọ emaekama udʌk esuuk Yerimaiya esịn ke ube ami; mmọọñ ikisịneke, akedo akpʌk ikpọọñ, ndin Yerimaiya amaabʌhọ ke akpʌk ado.

7 Ado Ebed-Melek, awo Kuus, adaaha ke ufọkubọọñ adidem, amaakop ke emaesuuk Yerimaiya esịn ke ube mmọọñ. Ke ini adidem asʌkkọ atie ke Inuaatob Benyamin, 8 Ebed-Melek amaawuọ akedọkkọ adidem ate, 9 "Abọọñ mmi adidem, ibon ami enam ibak ke afịd se ammọ enam ye prọfed Yerimaiya. Ammọ etop anye esịn ke ube mmọọñ, itie se abiọọñ adiiwot anye ke idaha uyo imiibaaha aba mi ke abio."

10 Akem adidem amaanọ Ebed-Melek awo Kuus uyio ate, "Ben ideen edịb mme duob mi kaa ke dʌt prọfed Yerimaiya sio ke ube mmọọñ mbemiso anye akpa."

11 Ndin Ebed-Melek amaaben mme ideen ami anyʌñ akaa ke ubeed ukañ idak itie unịm akʌk ke ufọkadidem. Anye amaaben ñkaan ntaaha afọñ ye afọñ emaekewaiya anyʌñ akama udʌk ayaak ammọ asuuk anọ Yerimaiya ke ube mmọọñ ado. 12 Ebed-Melek awo Kuus amaabo Yerimaiya ate, "Sịn ñkaan ntaha afọñ ami ye ñwaiya afọñ ke idak ñkpafaha mfo adimʌm udʌk ami ñkama." Yerimaiya amaanam ntoro, 13 ndin ammọ emaedʌt anye ye mme udʌk ami enyʌñ edịppe anye esio ke ube mmọọñ. Ndin Yerimaiya amaaba do ke akwere mbon ukpeme.

14 Akem Adidem Sedekaiya amaadọñ ekekoot prọfed Yerimaiya anyʌñ anam eben anye edi ayọhọ inuausʌñ ita ke tembịd Abọọñ. Adidem amaabo Yerimaiya ate, "Ami ñyaubịp fiin ñkpọ, kundịp miin ñkpọ ndomokeed."

15 Yerimaiya amaabo Sedekaiya ate, "Adieke ami unọọhọ fiin ibọọrọ, nte afo uduñwotto miin? Adieke ami ñkpekunọọhọ fiin item, afo ukpukukpañña utọñ unnọ miin."

16 Ado Adidem Sedekaiya amaanam enwọñọ ami anọ Yerimaiya ke ndịbe ate: "Adaña nte Abọọñ aduuho uwem, anye inọọhọ ñnyịn ibifịk uwem, ami nduuwotto fiin, ndiinyʌññọ uyaak fiin nnọ mbom eyemme aduwot fiin."

17 Akem Yerimaiya amaabo Sedekaiya ate, "Ami ado se Abọọñ Andikponñkan, Abasi Isrel atañ: ‘Adieke afo ayaaha idem anọọ mme adaaha adidem Babilọn, eyaesʌhọ uwem mfo ndin awo idiifọppọ abio ami; afo ye ufọk mfo eyaedu uwem. 18 Ado adieke afo umuuyaaha idem unọ mme adaaha adidem Babilọn, eyaeyaak abio ami esịn ke ubọk mbon Babilọn, ndin ammọ eyaefọp anye enịm ke isọñ; afo ke idem mfo uduubọkkọke ammọ.’ "

19 Adidem Sedekaiya amaabo Yerimaiya ate, "Ndịk annam miin abaña mme Yuu emaekekaa ebịne mbon Babilọn, sia mbon Babilọn ekeme ediñyaak miin nsịn ammọ ke ubọk ndin ammọ eyaemfiomo miin."

20 Yerimaiya amaabọọrọ anye ate, "ammọ iduuyaaka fiin inọ, kop uyio Abọọñ ke adinam se ami ntañ unọọ fiin. Ndin ayaafọn ye afo, ndin eyaenyaaña uwem mfo. 21 Ado adieke afo atreke adiyaak idem mfo nnọọ, se Abọọñ ayaara annọ miin, 22 eyaeben afịd ibaan se isʌhọ ke ufọkubọọñ adidem Yuda enọ mme adaaha adidem Babilọn. Ibaan ado eyaubo fiin ete:

" ‘Ammọ emautịn fiin usʌñ enyʌñ ukan fiin ubọk,

mme nta ufan mfo ado.

Ukod mfo abʌhọ ke akpʌk;

mme ufan mfo efeeñe ukpọñ fiin.’

23 "Eyaekoono afịd ibaan mfo ye nditọ mfo enọ mbon Babilọn. Afo ke idem mfo uduubọkkọke ke ubọk ammọ, ado adidem Babilọn ayaumʌm fiin; ndin eyaefọp abio ami enịm ke isọñ."

24 Akem Sedekaiya amaabo Yerimaiya ate, "Kuuyak awo ndomokeed adiọọñọ abaña nneme ami, imiidooho ntoro afo ayaakpa. 25 Adieke mme adaaha ukara ekoppo ke ami mmaatañ ikọ ye afo, ndin ammọ edi ubịne fiin edibo ete, ‘Idọkkọ ñnyịn se afo aketañ anọọ adidem ye se adidem aketañ unọọ fiin; kuudịp ñnyịn, imiidooho ntoro ñnyịn iyauwot fiin,’ 26 dọkkọ ammọ bo, ‘ami ñkesʌk ñkpeiye adidem mbo ke anye amaana annọọ miin ñka ufọk Yọnatan nọ ñkekpa do.’ "

27 Afịd mme adaaha ukara emaedi ebịne Yerimaiya enyʌñ ebịp anye, ndin anye amaadọkkọ ammọ afịd se adidem akewuuk anye abo atañ. Ndin ammọ ikitañña ikọ mfen aba ye anye, sia awo ndomokeed ikikoppo nneme amọ ye adidem.

28 Ndin Yerimaiya amaaba ke akwere itie mbon ukpeme tutu usen e-ekedikanna Yeruselem.

Naña ekemʌm Yeruselem ado ami: