1 Abọọñ, Afịd ini afo ado adinen,

ke ini ami mbenne ikpe ndi iso mfo.

Kpayeado ami ñyem aditañ ikọ mbana unen mfo:

Nsoo ido nọ usʌñ idiọọk awo aseghe?

Nsoo ido nọ mbon abiaña eba ke ifuuro?

2 Afo ametọ ammọ, ndin ammọ enie ñkam;

ammọ ekọt enyʌñ enwịm mfịd.

Afo aba ke inua ammọ afịd ini,

ado anyọọñ usʌñ akpọñ esịd ammọ.

3 Kpayeado, Abọọñ, afo amendiọọñọ miin;

afo ameñkịt miin anyʌñ adomo mme akikere mmi u-ubañake fiin.

Dʌt ammọ sio nte edọñ eyemme edikiwot!

Sio ammọ nịm nọ usen ediwot ammọ!

4 Isọñ adiina nsaad ikpeene die,

ñko mbid ke afịd inwañ adiiyeeme ikpeene die?

Sia mbon se idʌñ ke esịd edo mbon ibak,

mme unam ye mme inuen etak.

Ñko, mbon awo ebo ete,

"Anye idiikịtte se itịppe inọọ ñnyịn."

5 "Adieke adooho afo amefeghe ke ukod ye mme awo,

ndin ammọ enam afo akpa mba,

die ke afo uduukan udomo idem ye mme enañmbakara?

Adieke afo afʌmmọke ke ifuuro isọñ,

uduunam die ke ñkpukọọmọ mben Yọdan?

6 Ubon mfo, mbon esịdufọk mfo,

ammọ ñko u-ubiaña fiin;

ammọ ekap esio ñkpo ubaña fiin.

Kuunie mbuọdidem ke idem ammọ,

akpekọm a-adooho ammọ etañ eti ikọ ubaña fiin.

7 "Ami ñyaakpọñ ufọk mmi,

nsịn udeeme mmi;

ami ñyaayaak anye a-ami mmaaha

nsịn ke ubọk mme asua amọ.

8 Udeeme mmi aba annọ miin

nte ekpe ke akai.

Anye añkuun miin;

ke ntoro ami mmesua anye.

9 Ñkọ udeeme mmi ikappake iba innọ miin,

nte ekpaekpañ inuen akịm inuen

a-mme inuen mfen ekannake ekʌk enyʌñ enwana?

Ikaa ikikoono afịd mme ndiọi unam ikọd;

iben ammọ idi yak edita.

10 Uwak mme akpemeedọñ eyaesobo inwañ fain mmi,

enyʌñ esọnnọ inwañ mmi;

ammọ eyaekappa inwañ inemesịd mmi,

esịn ke mbiadaisọñ nsobo.

11 Eyaenam anye akappa ado mbiadaisọñ,

asaat, anyʌñ anaa ukpọk ke iso mmi;

afịd isọñ ayaabiaña

sia ibaaha awo se ise anyen.

12 Ke afịd ukpọk abod ke akpautatan,

mme andisobo eyaeyọhọ,

sia akañkañ Abọọñ ayaasobo

tọọñọ ke mbeñ isọñ keed tutu awuọ mbeñ uko;

ibaaha awo a-adiibọkkọ.

13 Ammọ eyaetọ abakpa ado edọk mbaraekpe;

ammọ eyaewa idem ado ikịtte udod ndomokeed.

Ammọ eyaekop abuud ebaña mbunwịm ammọ,

ke ntak akpọsọñ iyadesịd Abọọñ."

14 Ntom ke Abọọñ atañ: "Amaado afịd mme ibak mbọhọidʌñ mmi e-ekoonoke udeeme a-ami ñkenọọhọ mbon mmi Isrel ke ñkanubọk, ami ñyaawịppe ammọ nsio ke isọñ ammọ ñnyʌñ ñwịppe mbon Yuda nsio ke atu ammọ. 15 Ado ke ami mmaawịppe ammọ mma, ami ñyaamaana ñkop mbọm mbaña ammọ, ñnyʌñ mmaana mben ammọ ntịmme ndinọ udeeme ammọ ye idịd ammọ. 16 Ndin adieke ammọ enekkeke ekpeep mme usʌñ mbon mmi enyʌñ enwọñọ ke anyịñ mmi, ete, ‘Adaña nte Abọọñ aduuho uwem’ kpa naña ammọ ekekpeep mbon mmi edinwọñọ ke Baal; ammọ eyaenie iwuuk ke atu mbon mmi. 17 Ado adieke idịd ndomokeed imiikpañña utọñ, ami ñyaawịppe anye ataa afịd-afịd ñnyʌñ nsobo," Abọọñ atañ.