1 Ndin ikọ Abọọñ amaadinsịm miin idem ate: 2 "Inaaha ndufo edọ ndọ enyʌñ enie nditọ ideen me nditọ ibaan ke itie ami." 3 Sia se Abọọñ atañ abaña nditọ ideen ye nditọ ibaan e-emanna ke isọñ ami ye mme eka ye mme ete ammọ ado ami: 4 "Ammọ ediikpa ito ndiọi udọñọ. Awo idiifʌhọke ñkpa ammọ, idiinyʌññọ ibuuk ammọ, ado ediitie nte uduañ ke isọñ. Ediisobo ammọ ke akañkañ ye akañ, ndin akpo ammọ ediido ndidia inọ mme inuen ye mme ndiọi unam."

5 Sia se Abọọñ atañ ado ami: "Kuudʌk ufọk se ndidia ufọkikpo aba; kuukaa ukufʌhọ me adikiseeme, sia ami mmaaben adidiọñ mmi, ima mmi ye mbọm mmi nsio ñkpọñ ibon ami," Abọọñ atañ. 6 "Ñkpoon ye ntək eyaekpañña ke isọñ ami. Awo idiibuuho ammọ, idiinyʌññọ ifʌhọ ammọ, ndin awo ndomokeed idiikpịkkeke idem ammọ me adifat ided ammọ ke ntak mme akpañkpa. 7 Awo ndomokeed idiinọọhọ ndidia adidọñ mbon se ifʌhọ mme akpañkpa esịd; akpọkọm ado ete me eka, awo ndomokeed idiinyʌññọ inọ ammọ ukọd adidọñ ammọ esịd.

8 "Kuunyʌñ udʌk ufọk e-enamma usọrọ usuuk utie udia unyʌñ unwọñ. 9 Sia se Abọọñ Andikponñkan, Abasi Isrel, atañ ado ami: Ke iso mfo ye ke ayio uwem mfo, ami ñyaatre mme uyom inemesịd ye idaara ye mme uyio anwaanndọ ye ebendọ ke itie ami.

10 "Ke ini afo adọkkọke ibon ami afịd ñkpọ ami ndin ammọ ubịp fiin, ‘Nsoo ido ntak yak Abọọñ abiide utọ ekamba afanekọñ ami inọọ ñnyịn? Nsoo ke ñnyịn idue? Nsoo idiọọkñkpọ ke ñnyịn inam ke iso Abọọñ Abasi ñnyịn?’ 11 bo ammọ, ‘Ado sia mme eteete ndufo emaeñkpọñ miin,’ Abọọñ atañ, ‘enyʌñ ekeene mme abasi mfen enyʌñ enam ñkpọ enọ ammọ enyʌñ ekpono ammọ. Ammọ emaeñkpọñ miin inyʌññọ inịm mbed mmi. 12 Ado ndufo emenam ibak ekan mme eteete ndufo. Se naña afịd ndufo ekeene nsọñiwuod ibak esịd ndufo utu ke ndufo ekop item mmi. 13 Ke ntoro ami ñyaitop ndufo nsio ke isọñ ami ñkesịn ke isọñ a-adooho ndufo me mme eteete ndufo idiọọñọke, ndin do ke ndufo ediinam ñkpọ inọ mme abasi mfen uweemeayio ye akonayio, sia ami ndiifọnnọ mfọn ye ndufo.’

14 "Kpayeado, mme usen esʌk edi," Abọọñ atañ, "a-awo imiidibooho aba, ‘Adaña nte Abọọñ aduuho uwem, a-akesioho mbon Isrel ke Iyib,’ 15 ado ediibo, ‘Adaña nte Abọọñ aduuho uwem, a-akesioho nditọ Isrel ato ke isọñ adoro ye ke mme afịd idịd a-anye akesuanna ammọ akebon.’ Sia ami ñyaamaana nnọ ammọ isọñ añkenọọhọ mme eteete ammọ.

16 "Ado idahami ami ñyaadọñ ekoot uwak mme akọiyak," Abọọñ atañ, "ndin ammọ eyaemʌm ammọ. Ke ado amaaboiyo, ami ñyaadọñ ekoot mme uwak atautob, ndin ammọ eyaefịt ammọ esio ke afịd ikpọabod ye ntək abod ye ke mme abaitiad. 17 Anyen mmi asʌk ase afịd usʌñ ammọ; ammọ idịbeke ke anyen mmi, idiọọkñkpọ ammọ ñko idịbeke ke anyen mmi. 18 Ami ñyaasio ammọ usiene akañ iba ke mme ibak ye ndiọiñkpọ ammọ, sia ammọ esappa isọñ mmi ye mme ubobodñkpọ ammọ i-imiinieghe uwem enyʌñ eyọhọ udeeme mmi ye mme mbubiam ubobodñkpọ ammọ."

19 Abọọñ, adudu mmi ye akpọsọñ itie mmi,

itie udịbe mmi ke ini ukuud,

mme idịd eyaedi ubịne fiin,

eto ke mme utịd ederimbod enyʌñ ebo,

"Mme eteete ñnyịn ikinieghe ñkpọ ndomokeed ikan mme nsu-nsu abasi,

mme ukpọk ubobodñkpọ i-imiikinamma ufọn ndomokeed inọ ammọ.

20 Ado nte mme awo enam mme abasi ammọ?

Ii, ado ammọ idooho mme abasi!"

21 "Ke ntoro ami ñyaakpeep ammọ;

ke ini anyem ami ñyaakpeep ammọ

adudu ye ukeme mmi.

Ndin ammọ eyaediọọñọ

ke anyịñ mmi ado Abọọñ."