1 Ke ini aku Pasọ ayịn Imaa, adaaha a-akeseeghe ñkpọ abaña tembịd Abọọñ, akekoppo naña Yerimaiya atañ mme prọfesi ami, 2 Pasọ amaanam emia prọfed Yerimaiya enyʌñ esịn anye ke ñkpakọb ke Anyọñ Inuaatob Benyamin ke tembịd Abọọñ. 3 Edem usen, ke Pasọ amaakesio anye ke ñkpakọb, Yerimaiya amaabo anye, "Anyịñ A-Abọọñ unọọhọ fiin idooho Pasọ, ado Akpọsọñ Ndịk ke Afịd Itie. 4 Sia se Abọọñ abo ado ntom: ‘Ami ñyaanam afo ado ñkpọ ndịk anọ idem mfo ye afịd mme ufan mfo; afo ayaakịt ke anyen mfo naña ammọ ekpañña ke akañkañ mme asua ammọ. Ami ñyaayaak afịd Yuda nsịn ke ubọk adidem Babilọn, anye ayaakoono ammọ anyọñ Babilọn me idooho awoot ammọ ke akañkañ. 5 Ami ñyaayaak afịd inie abio ami nsịn ke ubọk mme asua ammọ, afịd ñkpọ ammọ, afịd mme nti ñkpọ ye mme ñkpọuto mme ndidem Yuda. Ammọ eyaekoono enyọñ Babilọn nte mbịme. 6 Ndin afo, Pasọ, ye afịd awo se idʌñ ke ufọk mfo eyaekaa isañufʌn ke Babilọn. Do ke afo uduukukpa enyʌñ ubuuk do, afo ye afịd mme ufan mfo a-afo aketañña mme nsu-nsu prọfesi anọọ.’ "

7 Afo amambiaña miin, Abọọñ, ndin emaembiaña miin;

afo amañkan ubọk anyʌñ akan.

Ennọ miin ndọk afịd usen;

afịd awo enduọi miin.

8 Ini akeedodo a-ami ntañña ikọ, ami ntua,

ntañ afai ye nsobo.

Ndin ikọ Abọọñ adat

usọñanyen ye emiom ansọk miin afịd ini.

9 Ado ñkpebo, "Ami ndiisiaha ikọ amọ aba,

ndiinyʌññọ ntañ ikọ ke anyịñ amọ aba,"

ikọ amọ asịne ke esịd mmi nte ikañ,

ikañ e-efʌttọ esịn ke mme akpọ mmi.

Añkak miin adimʌm anye ñkama;

ke akpanikọ ñkanna.

10 Ami mmekop naña mbon awo edọñọ adu,

"Ndịk ke afịd itie!

Isua inọ anye! Yak ñnyịn isua inọ anye!"

Afịd mme ufan mmi

eda ebet nọ ami mfiọnnọ, ete,

"Akemeido eyaebiaña anye;

ndin ñnyịn iyaikan anye

inyʌñ isio anye usiene."

11 Ado Abọọñ mmọdo aba ye ami nte ekamba awo ekọñ;

ke ntoro mbon eñkọbọke miin eyaefiọnnọ inyʌññọ inie adikan.

Ammọ eyaekpu enyʌñ ekịt asuenne;

awo idiifreke ndọk ammọ.

12 Abọọñ Andikponñkan, afo a-aduuñọke adinen awo

anyʌñ akịt esịd ye akikere,

yak ami ñkịt usiene mfo ke idem ammọ,

sia ami mmeyaak mfịna mmi usịn fiin ke ubọk.

13 Kwọ nọ Abọọñ!

Nọ Abọọñ itooro!

Anye a-afak uwem awo unana

asio ke ubọk mbon ibak.

14 Adọdiọọk anọ usen ami ñkemanake!

Yak usen se eka mmi akemman miin akuufọn!

15 Adọdiọọk anọ awo a-akedatta etob ado asọk ete mmi,

a-akenamma esịd amọ anekke anem, ate,

"Ayịn amana unọ fiin, ayịn awodeen!"

16 Yak awodeen ado aba nte mme abio

A-Abọọñ akesoboke ikoppo mbọm ibaña.

Yak anye akop ntuaña ke ubakusen,

ñkpoyo ekọñ ke ufọọd uweemeayio.

17 Sia anye ikiñwotto miin ke ntʌñidịb,

inyʌñ inam eka mmi nte udi mmi,

idịb amọ atịd ke nsi-nsi.

18 Nsoo ido ntak a-ami ñkewuọhọ ke idịb

ndikịt mfịna ye ukuud,

nọ mme usen uwem mmi anyʌñ aditre ke abuud?