1 Ke idaha Yerimaiya akesʌkkọ aba ke esịd akwere mbon ukpeme, uyio Abọọñ amaadisịm anye ayọhọ akañ iba: 2 Se Abọọñ abo ado ami, anye a-akebotto ederimbod, Abọọñ a-akebotto anye anyʌñ awuuk anye, Abọọñ ado anyịñ amọ: 3 "Ñkoot miin ndin ami ñyauyie fiin ñnyʌñ udọkkọ fiin mme ikpọ ye ntotəño ñkpọ a-afo umuudiọọñọke." 4 Sia se Abọọñ, Abasi Isrel, atañ abaña mme ufọk ke abio ami ye mme ufọk ubọọñ ke Yuda ewuudo ediben ammọ ñnwana mme ndibene ubiọọñọ ye akañkañ 5 ke anwan ammọ ye mbon Babilọn ado ami: Ammọ ediiyọhọ ye akpo mbon awo se ami ndiiwot ke iyadesịd ye ifiobesịd mmi. Ami ñyaadịp abio ami iso mmi ato ke ntak afịd ibak ammọ.

6 Kpayeado, ami ñyaaben nsọñidem ye ukọk nsọk anye; ami ñyaakọk ikọd mmi ñnyʌñ nnam ammọ enie ayọhọ emem, mfọn ye ukpeme. 7 Ami ñyaaben Isrel ye Yuda nto isọñ ukad ndi, ñnyʌñ mmaana nnam ammọ eba naña ekeba akpa. 8 Ami ñyaakwokko afịd idiọọkñkpọ a-ammọ ekenamma nsio, ñyaanyʌñ mfeen afịd idiọọkñkpọ nsọñiwuod a-ammọ ekenamma ye ami mfep. 9 Ndin abio ami ayannọ miin itooro, idaara, ekọọm ye ukpono ke iso afịd mme idịd ke ederimbod e-ekoppo afịd nti ñkpọ se ami nnam nnọ ammọ; ndin ammọ eyaeba ke ñkpaidem enyʌñ edịkke ebaña akpọmiọk uforo ye emem a-ami nnọọhọ anye.

10 "Se Abọọñ atañ ado ami: ‘Afo ametañ abaña isọñ ami, Anye ado ñwuudo ukpọkisọñ, mbon awo ye mme unam ibaaha ke esịd.’ " Ado ke mme abio Yuda ye mme efaak ke Yeruselem a-mme awo emaekekpọñ, mbon awo me mme unam inyʌññọ idʌñọ ke esịd, eyaetịmme ekop uyio ammọ 11 mme uyom idaara ye inemesịd, uyio anwaanndọ ye ebendọ, ndin ye uyio mbon ebenne uwa ekọọm edi ke ufọk Abọọñ, ebo ete,

"Nọ Abọọñ Andikponñkan ekọọm,

sia Abọọñ afọñ;

ima amọ aba ke nsi-nsi."

Sia ami ñyaamaana ndemme mme uforo isọñ ami naña akeba ke akpa, Abọọñ atañ.

12 "Se Abọọñ Andikponñkan atañ ado ami: ‘Ke isọñ ami, a-anaaha ukpọk, mme awo ye unam ibaaha, ke afịd mme abio amọ, nseghe ayaatịmme aba anọ mme akpemeedọñ adinọ udịmedọñ ammọ nduọkadudu. 13 Ke mme abio isọñ idʌñ, ke usuuk ntəkabod edem usobutịn ye ke ñkañ Nekef, ke ñkanñkʌk abio Benyamin, ke mme idʌñ Yeruselem ye ke mme abio Yuda, mme ufene eyaemaana esaña eboiyo ke ubọk mbon e-ebatta ammọ,’ Abọọñ atañ.

14 " ‘Mme usen esʌk edi,’ Abọọñ atañ, ‘a-ami ndiinam mme nti enwọñọ ami ñkenamma nnọ mbon Isrel ye Yuda esu.

15 " ‘Ke mme usen ado ye ke ini ado,

ami ñyaanam adinen Ñkọk atịppe ato aduuk Defid;

anye ayaanam se inen inyʌñ ifọn ke isọñ.

16 Ke mme usen ado Yuda ayaabọkkọ

ndin Yeruselem ayaadʌñ ke ifuuro.

Anyịñ se ediikoot anye ado ami:

Abọọñ Adinen Andinyaaña Ñnyịn.’

17 Sia se Abọọñ abo ado ami: ‘Defid idiitreke adinie awodeen se itie ke ebekpo Isrel, 18 me mme aku Lifai editre edinie awodeen se ida ke iso mmi afịd ini inọ ufọfọb uwa, adiwa uwa mfịd ñnyʌñ nnam mme uwa.’ "

19 Ikọ Abọọñ amaadisịm Yerimaiya: 20 "Se Abọọñ abo ado ami: ‘Adieke afo akemeke adibiat edioomo mmi ke uweemeayio anyʌñ abiat edioomo mmi ke akonayio, tutu uweemeayio ye akonayio idiighe aba ke akemini ammọ, 21 ndin edioomo mmi ye isʌñutom mmi Defid, ye edioomo mmi ye mme Lifai e-edooho mme aku e-enamma ñkpọ ennọọ miin, ekeme edibiara ndin Defid idiinieghe awo ke ubon amọ adiikara ke ebekpo amọ. 22 Ami ñyaanam ubon isʌñutom mmi Defid ye mme Lifai e-enamma ñkpọ ennọọ miin ewak nte udịm ntantaafiọñ ke ikpaanyọñ anyʌñ ananaibad nte ntan ke mben inyañ.’ "

23 Ikọ Abọọñ amaadisịm Yerimaiya ate: 24 "Nte afo ukịtte ke ibon ami esʌk ebo, ‘Abọọñ a-asịn mme abioubọọñ* iba a-anye akemekke’? Ke ntoro ammọ ese ikọd mmi ke ndek inyʌññọ ibat ammọ nte idịd aba. 25 Se Abọọñ atañ ado ami: ‘Akpedo ami ñkinamma edioomo mmi ye uweemeayio ye akonayio ñnyʌñ ñwuuk mme mbed mbaña hefịn ye ederimbod, 26 ndin ami ñyaasịn ubon Yekọb ye Defid isʌñutom mmi ndin ndiimekke keed ke atu nditọ amọ adikara ubon Ebraham, Aisik ye Yekọb. Sia ami ñyaatịmme ndemme uforo ammọ ñnyʌñ ñkop mbọm mbaña ammọ.’ "