* 1 O, akpekapado iwuod mmi akedo idịm mmọọñ,

anyen mmi ñko akpekapado idịm mmọọñayịd!

Ami ñkpaatua uweemeayio ye akonayio

nnọ mbon mmi ewotto.

2 O, akpedo ami mmenie itie nduọkadudu

ke akpautatan nnọ mme akaisañ,

nọ ami ñkpekpọñ mbon mmi

ñnyʌñ ndakka ñkpọñ ammọ;

sia afịd ammọ edo mme asịn efịbe,

ye atutu mbon abiaña.

3 "Ammọ ebeeñe edeme ammọ enịm

nte utịgha, aditịgha mme nsu;

idooho ke akpanikọ

ke ammọ ekan ke isọñ.

Ammọ ewuọ ke idiọọkñkpọ keed edʌk mfen;

ammọ indiọọñọke miin,"

Abọọñ atañ.

4 "Ikpeme idem ye mme ufan ndufo;

ikiibuọt idem ke awo ndomokeed ke ekpək ndufo.

Sia ammọ keedekeed edo mbon abiaña,

ndin afịd ufan edo abiadawo.

5 Ufan abiaña ufan,

ibaaha atañ akpanikọ.

Ammọ ekpeep edeme ammọ adisʌhọ nsu;

idem amem ammọ anọ adinam idiọọkñkpọ.

6 Ndufo* edʌñọ ke ufọọd abiaña;

ke abiaña ammọ, ammọ esịn adindiọọñọ miin."

Abọọñ atañ.

7 Ke ntoro ntom ke Abọọñ Andikponñkan atañ:

"Se, ami ñyaanekke nnam ammọ efọn ñnyʌñ ndomo ammọ idomo,

sia nsoo mfen ke ami ñkpekan nnam

ke ntak idiọọkñkpọ mbon mmi?

8 Edeme ammọ ado idañ ñkpa;

anye atañ abiaña.

Ke inua, ammọ etañ nneem ifuuro ikọ ye mme mbọhọidʌñ ammọ,

ado ke esịd ammọ, ammọ ekọọk afia enọ mbọhọidʌñ ammọ.

9 Nte ikpinaaha ami mmia ammọ ufen ke adinam ami?"

Abọọñ atañ.

Nte ikpinaaha nsio usiene

ye utọ idịd ami?

10 Ami ñyaatua ñnyʌñ nseeme ke ntak ikpọabod,

ñnyʌñ nnam eseeme mbaña isọñ mbid ke anaan ikọd.

Ammọ enaa ukpọk, awo isañake ke esịd,

awo inyʌñọ ikop uyio enañ.

Mme inuen efeeñe afịd,

mme unam enyʌñ enyọñọ.

11 "Ami ñyaanam Yeruselem ado adiono nsobo,

itie ndidia mme ewaikọd;

ndin ami ñyaasobo mme abio Yuda

mbaak awo ndomokeed adikan adʌñ do."

12 Anie awo anie aniọñ akem se ñkpọ ami anwaña anye? Anie ke Abọọñ atemme anye nọ akan atañ nọ anwaña? Nsoo ido ntak i-isọñ atakka ndin esobo anye nte akpautatan ake awo ndomokeed imiikanna ikaaña?

13 Abọọñ amaabo, "Ado sia ammọ ekpọñ mbed mmi, a-ami nnịmme ammọ ke iso; ammọ ikoppo ikọ mmi, inyʌññọ ikeene mbed mmi. 14 Utu ke ado, ammọ ekeene ntịdutọñ esịd ammọ; ammọ ekeene mme Baal, naña mme eteete ammọ ekekpeep ammọ." 15 Ke ntoro ntom ke Abọọñ Andikponñkan, Abasi Isrel abo: "Se, ami ñyaanam ibon ami edia idod-idod ndidia enyʌñ enwọñ mmọọñ esịnne ibọk ñkpa. 16 Ami ñyaasuan ammọ ke atu mme idịd a-adooho ammọ ye mme eteete ammọ idiọọñọke, ndin ami ñyaabịne ammọ ye akañkañ tutu ami nnam utịd ammọ adi."

17 Ntom ke Abọọñ Andikponñkan atañ:

"Ikere idahami! Ikoot ibaan utua ayịd nọ edi;

idọñ nọ ekoot mbon enekkeke ediọọñọ utua ayịd ke atu ammọ.

18 Yak ammọ esọsọp edi,

enyʌñ editua ke ntak ñnyịn

tutu anyen ñnyịn ayọhọ ye mmọọñayịd,

ndin mmọọñ adịt ato ñkpọkanyen ñnyịn.

19 E-ekop uyom ntuaña eto Saiyọn:

‘Se naña isobo ñnyịn!

Se naña ndọk ñnyịn akpon!

Ana ñnyịn ikpọñ abio ñnyịn,

sia mme ufọk ñnyịn eduọ.’ "

20 Idahami, ndufo ibaan, ikop ikọ Abọọñ;

itat utọñ ndufo ikop mme ikọ e-etooho inua amọ.

Ikpeep nditọ ibaan ndufo naña etua ayịd;

ikpeep emọ-emọ aseeme.

21 Ñkpa adọọk adʌk ato ke mme ubenafịm ñnyịn,

enyʌñ edʌk ñkpọsọñ itie ñnyịn;

anye a-akoono nditọ asio ke mme efaak

anyʌñ asio mme ñkparawa ke mme afe mbono.

22 Bo, "Ntom ke Abọọñ abo:

" ‘Mme akpo awo eyaebono

nte mbio ke anwa,

nte abakpa e-ekpịkkeke ke edem adọkidọk,

ibaaha awo se ikoono ammọ.’ "

23 Ntom ke Abọọñ atañ:

"Yak mbon aniọñ ekuukpọọ inua ebaña aniọñ ammọ,

mme akop uko ekuukpọọ inua ebaña adudu ammọ

mme imọ awo ekuukpọọ inua ebaña imọ ammọ,

24 ado yak andikpọ inua akpọ abaña anyem:

ke ammọ e-enie ikike adindiọọñọ miin,

ke ami ndo Abọọñ, a-awọttọ mfọnido,

unen ye adinenido ke ederimbod,

sia ami mmekop inem ke mme ñkpọ ami."

Abọọñ atañ.

25 "Mme usen esʌk edi," Abọọñ atañ, "a-ami ndiimia afịd mbon enịmme ikpọkidem ammọ kpọd asana ufen, 26 Iyib, Yuda, Edọm, Amọn, Mọb ye afịd mbon se idʌñ ke anaan ke mme anyan itie. Sia afịd mme idịd ami edo mbon emmiinịmme idem ammọ asana inọ Abọọñ, ukem ado ñko, kpa afịd ufọk Isrel inịmme esịd ammọ asana inọ Abọọñ."