1 Ntom ke Abọọñ abo: "Kaa ke dep atu mbad to abodabañ. Saña ye mme ñkpisọñ ye mme aku 2 ndin iwuọ ikaa Abedeñ Ben Hinọm, a-akpereke Inuaatob Usiọñ. Ke ndo tañ mme ikọ se udọkkọ fiin, 3 ndin bo, ‘Kop ikọ Abọọñ, ndufo mme ndidem Yuda ye mbon Yeruselem. Ntom ke Abọọñ Andikponñkan, Abasi Isrel abo: Ikpañ utọñ! Ami ñyaadat nsobo nsịn ke itie ami a-adooho ayaanam utọñ afịd awo e-ekoppo ebaña anye aduat. 4 Sia ammọ eñkpọñ miin ndin enam itie ami ado itie mme isen abasi; ammọ efọp insensi enọ mme abasi a-adooho ammọ me mme eteete ammọ me mme ndidem Yuda ikidiọọñọke, ndin ammọ e-enam itie ami ayọhọ ye iyiib mbon i-imiidueghe. 5 Ammọ e-ebọp mme ñkoñ-ñkoñ itie Baal adifọp nditọ ammọ ke ikañ nte uwa nnọọ Baal, ñkpọ a-ami mmeñkewuuhọ, ñnyʌññọ ntatañ, i-imiikinyʌññọ indọdʌk akikere. 6 Ndin ikpeme, Abọọñ abo, ini asʌk adi, a-adooho mme awo idiikoodo itie ami aba Tofed me Abedeñ Ben Hinọm, ado Abedeñ Uwodawo.

7 " ‘Ke itie ami ñyaabiat mme uduak Yuda ye Yeruselem. Ñyaanam ammọ eduọ ke akañkañ ke iso mme asua ammọ, ke ubọk mbon eyemme adiwot ammọ, ndin ami ñyaanọ mme inuen ye ndiọi unamikọd akpo ammọ nte ndidia. 8 Ami ñyaasobo abio ami ñnyʌñ nnam anye ado ñkpọ ndịk ye ñnyọọ; afịd mbon se iboiyo eyaekop ñkpaidem eyaenyʌñ esaha eduọi ato ke afịd mme unan amọ. 9 Ami ñyaanam ammọ eta abʌkidem nditọ ideen ye nditọ ibaan ammọ, enyʌñ eta abʌkidem emọ-emọ sia mme asua ammọ eyaekanna ammọ ekʌk enyʌñ esobo ammọ.’

10 "Ndin bom atu ado idaha a-mbon e-esañake ye afo esʌkkọ ese, 11 ndin bo ammọ, ‘Ntom ke Abọọñ Andikponñkan abo: Ami ñyaabom idịd ami ye abio ami kpa naña atu abodabañ ami abomo ndin awo idiikanna itañ ibok aba. Eyaebuuk mme akpañkpa ke Tofed tutu ufañ ibaaha aba. 12 Ntom ke ami ndiinam ke itie ami ye mbon se idʌñ mi, Abọọñ atañ. Ñyaanam abio ami atie nte Tofed. 13 Eyaesappa mme ufọk ke Yeruselem ye ake mme ndidem Yuda nte itie ami, Tofed, ye afịd mme ufọk a-ammọ ekefọppọ insensi ke anyọñ akọm enọ mme udịm anyọñ enyʌñ eduọk mme enọ ukọd enọ mme abasi mfen.’ "

14 Yerimaiya amaanyọñ ke Tofed, A-Abọọñ akedọññọ anye nọ akesiak ikọ, ndin anye amaadida ke akwere tembịd Abọọñ anyʌñ abo afịd awo, 15 "Ntom ke Abọọñ Andikponñkan, Abasi Isrel, atañ: ‘Ikpañ utọñ! Ami ñyaadat nsobo a-ami ñketañña mbaña nsịn ke abio ami ye ke afịd esịdidʌñ e-ekannake anye ekʌk, sia ammọ esọñ aboditọñ inyʌññọ ikop mme ikọ mmi.’ "