1 Abọọñ abo, "Isrel, adieke adooho afo ayaatịmme anyọñ adi,

ndin nyọñ mbịne miin."

"Adieke afo asioho mme mbubiam ubobodñkpọ mfo afep ke iso mmi

unyʌññọ utịn usʌñ aba,

2 ndin adieke afo anwọñọke ke akpanikọ, unen ye nnekke-nnekke usʌñ

abo, ‘Adaña nte Abọọñ aduuho uwem,’

ndin mme idịd eyaebọ adidiọñ eto ke anye

enyʌñ ekpọ inua ke anye."

3 Ntom ke Abọọñ abo mbon Yuda ye Yeruselem:

"Ikappa isọñ ndufo a-awo imiitọọhọ ñkpọ

ikiinyʌñ itọ ñkpọ iwaak ye mme akpab.

4 Inịm idem ndufo asana inọ Abọọñ,

inam esịd ndufo asana,

ndufo mbon Yuda ye mme andidʌñ ke Yeruselem,

imiidooho ntoro ifiobesịd mmi ayaabịppe anyʌñ asak nte ikañ

ke ntak idiọọkñkpọ a-ndufo enamma,

asak inyʌññọ iba awo se inịme anye.

5 "Nọ etob ke Yuda nyʌñ tañ ke Yeruselem nyʌñ bo:

‘Fịt adukpoñ ke afịd isọñ!’

Tua ke akpọsọñ uyio nyʌñ bo:

‘Iboho itie keed!

Yak ñnyịn ifeeñe ika mme ñkpọsọñ abio!’

6 Inọ idiọọñọ nọ eka Saiyọn!

Ifeeñe iyem uwem ikiibiat ini!

Sia ami ñyaaben afanekọñ nto adoro,

kpa ataa idiọọk nsobo."

7 Ekpe awuọ ato itie nnaa amọ;

andisobo mme idịd adakka isañ.

Anye akpọñ itie amọ

adisobo isọñ ndufo.

Mme abio ndufo eyaeba ke atahade

andidʌñ ibaaha.

8 Ke ntoro sịne afọñikpo,

tua nyʌñ seeme,

sia akpọsọñ iyadesịd Abọọñ

iwọññọke ikpọñ ñnyịn.

9 Abọọñ abo, "Ke usen ado,

adidem ye mme adaaha eyaekop ayeemensia,

mme aku eyaeba ke ñkpaidem,

ndin mme prọfed eyaekpaaña nsa."

10 Ndin ami mmaabo, "Sai, Abọọñ Andikara! Se naña afo abiaña ibon ami ye Yeruselem ataa afịd-afịd ke adibo, ‘Ndufo eyaenie emem,’ ke ini akañkañ abaaha ke itọñ ñnyịn!"

11 Ke ini ado eyaedọkkọ ibon ami ye Yeruselem, "Ufiob-ufiob afịm a-atooho mbiara ñkoñ-ñkoñ itie ke akpautatan afịme abịne mbon mmi, ado idooho adikeñ me adinam asana; 12 afịm a-asọññọ adudu akan ado anto miin. Idahami ami mmenọ mme ubiideikpe mmi ke abaña ammọ."

13 Kap se! Anye asʌk asaña adi nte mme ntọñanyọñ,

mme sariọd amọ edi nte ayobio,

mme enañmbakara amọ esọp ekan mme ntrukpuum.

Ifọnnọ ye ñnyịn! Ñnyịn imitak!

14 Yeruselem, yet ndoom sio ke esịd mfo nyʌñ bọ adinyaaña.

Afo uduunie mme akikere ibak nọ akpeene die?

15 Uyio asʌk ato ke Daan asuan etob,

ato ke mme abod Ifrem atañ abaña nsobo.

16 "Tañ anyem dọkkọ mme idịd,

Nọ etob baña Yeruselem:

‘Udịmekọñ asʌk ato anyan usʌñ idʌñ adi adikanna akʌk,

akpọk ukịbe ekọñ abaña mme abio Yuda.

17 Ammọ ekanna anye ekʌk nte ideen e-ekpemeke inwañ,

sia anye a-asọñ iwuod ye ami,’ "

Abọọñ atañ.

18 "Ido mfo ye mme adinam mfo

edat ami usọk fiin.

Ufen mfo ado ami.

Kop naña anye adoro!

Kop naña anye akịm adʌk esịd!"

19 O, iduọesịd mmi, iduọesịd mmi!

Ami mmemiañña ke ubiak.

O, mbʌññọ esịd mmi!

Esịd mmi aduọ,

ami ñkanna ndop uyio.

Sia ami mmekop uyio adukpoñ;

ami mmekop uyio ñkpoyo ekọñ;

20 Nnananyen akeene nnananyen;

afịd isọñ atahade.

Ke adibọp anyen ntat esobo mme atayad ye

mme itie idʌñ mmi inikeed.

21 Ami ndiikịt afọñidiọọñọ ekọñ nọ akpeene die

ñnyʌñ ñkop uyom adukpoñ?

22 "Mbon mmi edo ndisịme;

ammọ indiọọñọke miin.

Ammọ edo nditọ unanaifiọk;

ammọ inieghe ikike.

Ammọ enie ifiọk adinam idiọọk;

ammọ idiọọñọke adinam eti ñkpọ."

23 Ami mmaase ederimbod,

anye ikinieghe uyai anyʌñ ado ukpọk;

ñnyʌñ nse mme hefịn,

ndin unwana ammọ amaanyọñ.

24 Ami mmaase mme ikpọabod,

ndin ammọ ekesʌk enyeñ;

afịd mme ntək abod ekesʌk enyeeñe.

25 Ami mmaase, ndin mme awo ikibaaha;

afịd inuen ke ikpaanyọñ emaefuurọ enyọñọ.

26 Ami mmaase, ndin nseghe isọñ akedo akpautatan;

afịd mme abio amọ ekeba ke atahade

ke iso Abọọñ, ke iso ufiob iyadesịd amọ.

27 Ntom ke Abọọñ abo:

"Eyaetahade afịd isọñ,

akpesʌkado ami ndiisoboke anye ataa afịd-afịd.

28 Ke ntoro ederimbod ayaafʌhọ,

mme hefịn ke anyọñ eyaekịm,

sia ami mmetañ ndiinyʌññọ ntre,

ami mmebiere ndin ndiitịmmeke edem."

29 Ke uyio mme awad enañmbakara ye mme atobidañ,

afịd abio efeeñe.

Ubaak edọñọ ikọd;

usʌk edọọk anyọñ ikpọ itiad.

E-efeeñe ema ke mme abio;

ibaaha awo se idʌñ ke esịd.

30 Nsoo ke afo anam, afo awo nnananyen?

Nsoo ido nọ asịne afọñ ubọọñ,

anyʌñ asịne mme ñkpọ mbanaidem kold?

Nsoo ido nọ adeppe anyen mfo ye ñkpọ mbanaidem?

Afo abana idem mfo ikpu-ikpu.

Sia mbon ima mfo usọọn fiin;

ammọ eyem aduwot fiin.

31 Ami mmekop ayịd nte ake awonwaan u-uman abiakka,

mmịm nte awonwaan a-amanna akpa ayịn amọ,

ayịd Adiaha Saiyọn a-anweeghe ayem afịm,

a-anyanna ubọk amọ abo,

"Se miin! Mmesʌkkọ;

e-eyaak uwem mmi enọ mme awodawo."