1 Ke ayọhọ afiọñ ition kpa ke isua ado, ayọhọ isua inaañ, ke ntọọñọ ukara Sedekaiya adidem Yuda, prọfed Hananaiya ayịn Asọọ, a-aketooho Kibiọn, amambo miin ke ufọk Abọọñ ke iso mme aku ye afịd mbon awo ate: 2 "Se Abọọñ Andikponñkan, Abasi Isrel atañ ado ami: ‘Ami ñyaabuuñ akpọnọ adidem Babilọn. 3 Ke ufañ isua iba ami ñyaatịmme ñkoono afịd mme ñkpọufọk Abọọñ a-Nebukadnesa adidem Babilọn akekoonoke ato mi anyọñ Babilọn ñnyọñ ndi. 4 Ñko ami ñyaatịmme mben Yehoiyakịn* ayịn Yehoiyakịm adidem Yuda ye afịd mbon se ekekoono ke ntañmfeb eto Yuda e-ekekaaha Babilọn ñnyọñ ndi itie ami,’ Abọọñ atommo, ‘sia ami ñyaabuuñ akpọnọ adidem Babilọn.’ "

5 Ndin prọfed Yerimaiya amaabọọrọ prọfed Hananaiya ke iso mme aku ye afịd awo e-ekedaaha ke ufọk Abọọñ. 6 Prọfed Yerimaiya amaabo, "Amen! Abọọñ akpekap anam ntoro! Yak Abọọñ anam ikọ amọ a-afo atañña prọfesi abaña mme ñkpọ ufọk Abọọñ ye afịd mbon se etañ nte ifʌn eka Babilọn asu. 7 Kpayeado, kpañ utọñ kop se ami nnie aditañ inọọ ndufo ye afịd mbon mfen. 8 Tọọñọ ke aditọọñọ ini mme prọfed e-ekibemme ndufo ye ami iso eba emaetañ prọfesi ebaña ekọñ, nsobo ye udọñọ nsobo ke uwak idʌñ ye mme ikpọ abioubọọñ. 9 Ado ediidiọọñọ prọfed a-atañña ñkukịd emem nte ata adinen a-atooho Abọọñ adieke ñkukịd amọ awuọhọ asu."

10 Akem prọfed Hananaiya amaakọññọ akpọnọ ado asio ke itọñ prọfed Yerimaiya anyʌñ abuuñ anye, 11 ndin Hananaiya amaabo ke iso afịd mbon awo ate, "Se Abọọñ atañ ado ami: ‘Kpa ke ukem usʌñ ado ami ñyaabuuñ akpọnọ Nebukadnesa adidem Babilọn ke itọñ afịd mme idịd ke ufañ isua iba.’ " Ke adikop ami, prọfed Yerimaiya amaadakka akaa uwa amọ.

12 Ke prọfed Hananaiya amaakebuuñ akpọnọ asio ke itọñ prọfed Yerimaiya, ikọ Abọọñ amaadisịm Yerimaiya, ate: 13 "Kaa kedọkkọ Hananaiya bo, ‘Se Abọọñ abo ado ami. Afo amebuuñ akpọnọ eto, ado ke itie amọ afo ayaanie akpọnọ ukwak. 14 Se Abọọñ Andikponñkan, Abasi Isrel atañ ado ami: Ami ñyaakọọñ akpọnọ ukwak ke itọñ afịd mme idịd ami nọ ammọ enam ñkpọ enọ Nebukadnesa adidem Babilọn, ndin ammọ eyaenam ñkpọ enọ anye. Ami ñko ñyaanyʌñ nnọ anye ukeme adikara kpa mme unam ikọd.’ "

15 Ndin prọfed Yerimaiya amaabo prọfed Hananaiya ate, "Hananaiya, kpañ utọñ! Abọọñ udọññọ fiin, ado afo amekpak idịd ami nọ ebuọt idem ke nsu. 16 Ke ntoro se Abọọñ atañ ado ami: ‘Ami ñyausio fiin mfep ke iso isọñ. Kpa ke isua ami afo ayaakpa, sia afo amaakwọrọ nsọñiwuod adian Abọọñ.’ "

17 Ke ayọhọ afiọñ itiaba kpa ke isua ado, prọfed Hananaiya amaakpa.