1 Ikọ Abọọñ se ikidisịm prọfed Yerimaiya ke abaña mbon Filistia mbemiso Fero akenwana ammọ ke Kasa ado ami:

2 Se Abọọñ atañ ado ami:

"Se naña mme mmọọñ edakka ke ukañ adoro;

ammọ eyaekappa edo atọadibeghe akpa.

Ammọ eyaetọ ebọhọ adaña isọñ ye afịd ñkpọ ke esịd,

mme abio ye mbon se idʌñ ke esịd.

Mbon awo eyaetuaha;

afịd mbon se idʌñ ke isọñ eyaebọñ ñkpo

3 ke adikop uyom mme ukod enañ naña ewat edi,

ke uyom aditịm mme sariọd mbon usua

ye ndukwaaha mme wiil ammọ.

Mme ete ye eka idiikannake anyen adinwam nditọ ammọ;

ubọk ammọ ayaatọ atekke.

4 Sia usen a-adikem

adisobo afịd mbon Filistia,

adinyʌñ nsio afịd mbon se ibọkkọ

ekemekke adinwam Tai ye Sidọn.

Abọọñ aba ke mbeeñeidem adisobo mbon Filistia,

mme nsʌhọ e-etooho mben inyañ Kaftọ*.

5 Kasa ayaakwaat ided amọ ke mfʌhọ;

Askelọn idiisioho uyio.

Ndufo mme ñyọhọnsʌhọ ke unaisọñ,

adiikpeene die ndufo edika iso ñkpeeñe idem ndufo?

6 " ‘Sai, akañkañ Abọọñ,

adiikpeene die mbemiso afo aduọk adudu?

Tịmme dʌk efọk mfo;

tre nyʌñ dop da.’

7 Ado anye adiikeme die adiduọk adudu

ke ini Abọọñ amaanọ anye ewʌhọ,

ke ini Abọọñ amaanọ anye uyio

adinwana ye Askelọn ye mbon mben inyañ?"