1 Ke ayọhọ isua usʌkkeed ke ukara Sedekaiya adidem Yuda, ke ayọhọ afiọñ duob, Nebukadnesa adidem Babilọn amaanam isañekọñ akaa Yeruselem ye afịd udịmekọñ amọ anyʌñ anam nnaaekọñ akanna Yeruselem akʌk. 2 Ndin ke ayọhọ usen usʌkkeed ke ayọhọ afiọñ inaañ ke isua duob mme keed ke ukara Sedekaiya, ndibene abio amaaduọ. 3 Akem afịd mme adaaha ukara adidem Babilọn emaedidat itie ke Ufọọd Inuaatob: Nekal-Saresa a-atooho Samka, Nebo-Sasekịm ataa ekamba etubom ekọñ, Nekal-Saresa ataa ekamba adaaha ye afịd mme adaaha adidem Babilọn mfen. 4 Idaha Sedekaiya adidem Yuda ye afịd mbon ekọñ ekekịtte ammọ, ammọ emaefeeñe. Ammọ ekesaña ke usʌñ inwañ adidem ewuọ ekpọñ abio akonayio, esaña ke inuaatob ke ufọọd ndibene iba, enyʌñ ekaa ke usʌñ ukañ Araba*.

5 Ado udịmekọñ Babilọn emaebịne ammọ enyʌñ ekesịme Sedekaiya ke unaisọñ Yeriko. Ammọ emaemʌm anye eben esọk Nebukadnesa adidem Babilọn ke Ribla ke isọñ Hamad, ndin do ke anye akebiide ikpe anọ anye. 6 Do ke Ribla adidem Babilọn amaawot nditọ ideen Sedekaiya ke iso amọ anyʌñ awoot afịd mme adaaha ke Yuda. 7 Ndin anye amaakaap Sedekaiya anyen asịññe anyʌñ abọp anye ke ñkpọnọ brọns adiben anye ñnyọñ Babilọn.

8 Mbon Babilọn emaesịn ikañ ke ufọk adidem ye ke mme ufọk mbon awo enyʌñ ewuut ndibene Yeruselem. 9 Nebusaradan, asaña-asaña adaiso ekọñ adidem, amaakoono mbon e-ekesʌhọke ke abio akaa Babilọn, dian ye mbon se ikikaa ibịne anye, ye mbon awo se ikisʌhọ. 10 Ado Nebusaradan adaiso ekọñ amaasʌhọ usʌk mbon uweene ke isọñ Yuda, i-imiikinieghe ñkpọ ndomokeed; ndin ke ini ado anye amaanọ ammọ inwañ fain ye mme ikọd.

11 Idaha ntoro Nebukadnesa adidem Babilọn amaanọ ewʌhọ ami abaña Yerimaiya ato inua Nebusaradan adaiso ekọñ adidem: 12 "Ben anye nyʌñ se ñkpọ baña anye; kuunam anye ibak ado nam nọ anye se adodo a-anye ayemme." 13 Ndin Nebusaradan adaiso ekọñ adidem, Nebusaban ataa ekamba adaaha ukara, Nekal-Saresa ekamba adaaha ukara ye afịd mme adaaha adidem Babilọn mfen 14 emaekaa ekesio Yerimaiya ke itie akwere mbon ukpeme. Ammọ emaeyaak anye enọ Kedalia ayịn Ahikam, ayịn Safan, adiben anye ntịmme ñnyọñ ufọk amọ. Ke ntoro anye akeba ye mbon amọ.

15 Ke idaha Yerimaiya akebaaha ke akwere itie mbon ukpeme, ikọ Abọọñ amaadisịm anye: 16 "Kaa kedọkkọ Ebed-Melek awo Kuus bo, ‘Ami ado se Abọọñ Andikponñkan, Abasi Isrel, atañ: Ami ñyaadinam ikọ mmi asu abaña abio ami, mme ikọ e-ebañake nsobo, idooho uforo. Ke ini ado ammọ eyaewuọ esu ke anyen mfo. 17 Ado ami ñyaunyaaña fiin ke usen ado, Abọọñ atommo; awo iduuyaaha fiin isịn ke ubọk mbon se afo abaak. 18 Ami ñyaunyaaña fiin; afo uduuduọhọ ke akañkañ ado ayaabọkkọ ye uwem mfo, sia afo amebuọt idem ye ami, Abọọñ atommo.’ "