33 Baiye kaama kaelelamaki: «Ɛpɔkɔsɔ ɛɔtɛ». Ango ko bakɔlɔbɔi batumbisa Yesu waalemba kaama kamɔɔ la bango banto baphee babe: ɔmɔti boleka ba loome ba Yesu la onkinɛ boleka ba loali. 34 Pa Yesu alɔndi: «Phapha, waatikele aliko phaaeye bitakɛɛ bako»!

Pa, bango bakɔlɔbɔi baphakani esende e Yesu o nkɛɛ esiko. 35 Banto baiki bataemala ango batalende. La Bɛkɔta Beayuda baweeloleli la balɔndi nte: «Akakoli bankinɛ: Anɛ aikakole nɛmɛlɛ, iya ndako kole Kilisito*, bosɔnami a Kanamombe»! 36 Bakɔlɔbɔi la bako baanjisa mbooweelolela Yesu ŋango akɔ. Baochweli aliko baɔnywɛshɛ difai ja lokange. 37 La baosimeli nte: «Iya sɔlɔ wɛɛ ko Bɔkɔta Baayuda, wiikakole wɛɛmɛlɛ»!

38 La eliko la bɔtɛ ba Yesu kaiki la lɔbaɔ lɔnɛ laandeki bako aliko la lako nte: «Ɔnɛ ko Bɔkɔta Baayuda».

39 Ɔmɔɔ a bango baphoka baphee bauleyami waalemba, aanjisa ntola Yesu la nɔnda: «Kapha wɛɛ kole Kilisito anɛ, wiikakole wɛɛmɛlɛ, la otokakole la iso ŋango akɔ»! 40 Kinaki ongo onkinɛ aophangweli wiina lande la mboosimela: «Wɛɛ phalawa Kanamombe koonga ŋaanɛ bombo tumbyama wɛɛ ya libweelo kaama kamɔɔ la ɔnɛ onto? 41 Kaso iso tasana tɔnɛ toakola, aliko inɛ ko ngɛlama ya ingo bɛkɛɛki iso. Kinaki ɔnɛ onto ndako koo nkɛɛ koonga bobe bɔmɔɔ».

42 Ɔkɔngɔ la ongo liphoka nsimela wiina lande bingo, asimeli Yesu nte: «Ɛɛ Yesu! Onkanya weeleko eanda wɛɛ wɛɛnte Bɔkɔta». 43 Yesu aosimeli: «Sɔlɔ mbokosimela, lɛlɔ ɛnɛ akondo yala kaama kamɔɔ lami e Paladisɔ*».

33 La saa e isamalo nende saa e libwa wiilima baingeli wooni lalikuli. 34 La saa e libwa Yesu aokomi la nkulu: «Elɔi, Elɔi, lama sabakitani» Ko nɔnda: «Kanamomnbe ami, Kanamombe ami, aliko laanke emosanjiya wɛɛ*»?