28 Tukoute Jesu nynh atu tuh pawpaw balyn marya accing vae cipaw nyh zah, Ccathyaa kya a umpaw kha accing nawlan, "Tui ka haw," a ci.✝ 29 Tuin kya misutui ariapaw phe beihpaw lungre zung kheit a um, minmin nynh boeipuepaw kha misutui ariapaw lungkhu lang dung hae zah hyssop ku aran kya heede hae zah Jesu mung kya a nungde hae. 30 Jesu nynh misutui ariapaw kha a neih koute, "Athang vae," a ci; tukoute a lu ting zah a hy athang.

23 Rhawkaw hae nynh Jesu kha vaelantung kya a khiade kou hae te, a boeining hae kha lawkuh hae zah zung pali lang seii hae zah lu kheit ze zung kheit ccite a neeku hae, akaw-angki kha mah a khah hae; tuh-e akaw-angki tuh ahuikunaw a um lei lante alu te alia cia a kua hae paw nynh thua. 24 Tukeiccuze minmin nynh, "E tuh seii nan oh sih, hummou a ccou cih cipaw ny nawlan ccungthydung oh sih," cite lu kheit te lu kheit a hoku hae. Tuh-e tuh Ccathyaa kyaze,

"Minmin nynh ka boeining hae kha

a neeku hae, ka angki hanlan

ccungthy a dung hae,"

cite a hopaw kha accing nawlan nynh thua. Tuhcite rhawkaw hae nynh a cyi hae.✝

25 Tuh ccyh lyakhe Jesu a vaelantung pe khe Jesu a nung te a nung neitawnung athuapaw Klopas zu Mary te Mary Magdalin tuh a thadyn hae. 26 Tukeiccuze Jesu nynh a nung te a sungsahpaw a zuitupaw a thadyn hae paw kha he a muih tuh, a nung kha, "Nopinung, khah-e kha na ccapaw," a cipya. 27 Tukoute a zuitupaw kha, "Khah-e kha na nung," a cipya. Tuin ccyh kyate tuh-e zuitupaw nynh Jesu nung kha a inn lang a cciakhae.

33 Kalvari a ci hae paw hmin kya a thua hae tuh, tuin kyakhe Jesu tuh vaelantung kya khiade hae zah, misei hae lu ning kha a ranglang lu kheit, a voilang lu kheit a khiade bua hae. 34 Jesu nynh, "Apang, minmin hynh ngaethya hae; pawccecize paw nynh kae cyi cipaw nyh khyh hae," a ci. Minmin nynh ccungthydung hae zah a boeining kha a neeku hae.✝ 35 Ccungccaw hae nynh thadyn hae zah phang a do hae; uktu hae nynh sarya hae zah, "Aning nynh ming hae kha a khum hae; aning tuh Pachia nynh a popaw Messiah athua lanze amaw te amaw kha khumkuh sah!" a ci hae.✝ 36 Rhawkaw hae nynh mah a saryabua hae, amaw kha oun ccianua hae zah misutui ariapaw kha pya hae zah, ✝ 37 "Judah hae Siapharan na thua ze, namaw te namaw kha khumku tua!" a ci hae. 38 A luki khe, "E paw tuh Judah hae Siapharan nynh thua," cite a zei hae paw ccawkhia kha a taw hae.

39 Vaelantung kya a sae hae paw misei hae lu ning kyaze lu kheitpaw nynh sarya zah, "Messiah na thua ze namaw te namaw kha khumkuh lah, kaening hynh mah yn khumbua!" a cipya. 40 Thuasalama lukheitpaw nynh tuh-e paw tuh pe zah, "E paw te alokuhpaw detahnaw kha mang na ing pite Pachia raw na rih khyh tou? 41 Aening tuh ah cyisahnaw thyhte angaekuh lante hmerarih lan ah teingpaw nynh thua; thuasalama e paw tuh a cyiseipaw pawpaw mah um khyh," a cipya. 42 Te aning nynh, "Jesu, na peenaw lungkhu lang he na thua te, kae hynh yn ning nan vae ii," a cipya. 43 Jesu nynh, "Byaccaccing kae hopya, atunin nang tuh kamaw ryte Paradis kya na umbua vae cih," a cipya.

33 Ninthuccynglyn kyate zete suimilan ccangthum cia ram balyn tuh pong amoh. 34 Zete suimilan ccangthum ccyh kyakhe Jesu nynh, "Eloi, Eloi, lama sabakthani?" cite thawte a sia. Asuilan tuh, "Ka Pachia, ka Pachia, pawccemou nae vua?" cipaw nynh thua.✝

51 Tuh ccyh lyatuin beikinn lungkhu a zo hae paw boei tuh alu te alia cia zung ning lang aseiikuh. Innrysuekuh zah lungpi hae akoi.✝ 52 Shaw hae hungkuh zah a ih hae paw mithyaa hae pyn patae tuh a thoo hae. 53 Jesu a thoothui koute shaw hae kyate oun pou hae zah khua thyaapaw lungkhu lang tee hae zah ccungccaw patae kya a langkuh hae. 54 Jesu a rin hae paw rhawbawipaw te a umkheih hae paw nynh innry asuekupaw te acyihkuhpaw balyn kha he a muih hae tuh myarya rih hae zah, "E paw tuh Pachia Ccapaw ccaccing nynh thua," a ci hae.

5 Thuasalama aening cyiseimenaw keiccuze

aning tuh vaemaw mue zah,✝

aening hoyleinaw keiccuze

ziaku buakunaw kha a teing;

aning tungvaw accahpaw detahnaw nynh

aening kha accingpaw lang oun rae zah,

a vaemaw liate aening tuh ah dan oh.

6 Aening balyn tuh azopaw

tuu hawte nynh ah thua vae oh;✝

aening balyn tuh ahmaw laanpi raveih kalan

ah maekuh vae oh,

tukeiccuze Bawipaw nynh

aening hoyleinaw balyn kha

aning tungvaw khe a khang vae.

7 Aning tuh tuaasahkunaw te

riathaenaw kha a teing zemah

a mung kha a myh;✝✝

saw theihtupaw kalan

a cciakhae hae paw

tuutaw hawte thuasah,

a ming a ngotu malang sia leite

a umpaw tuu hawte thuasah

aning tuh a mung kha a myh.

16 Ui hae nynh yn koihlu hae;

Ccungccaw hoylei hae paw phu nynh

kae kha yn koihlu hae.

Ka kuih te ka ccu kha yn bou hae.

17 Ka ru balyn kha phe ka ria kho,

Yn do hae zah mih lungrythuakhaekuh;

18 ka boeining kha neekuh hae zah,

ka boeining kha ccungthykhyate a dung hae.✝

7 Yn muihpaw balyn nynh yn sarya hae;

mih mung yn sunua hae zah,

mih lu yn henua hae;✝

8 "Aning tuh Bawipaw kha

a doliaku;

Bawipaw nynh khum vae sah,

Bawipaw nynh a lungrythuapaw

ccungccaw kha khum sah!" a ciku hae.✝

13 Ccungccaw lu kheit nynh a ban hae hanlan a hiinnaw pyakupaw sungsakunaw laeze ale huapaw sungsakunaw tuh hum nynh sanmah hoi khyh.

16 "Pawccecize Pachia nynh laephi hynh eih a sungsah keiccuze a Ccapaw lu kheit kyalyapaw kha oun pya; tukeiccuze amaw a zynpaw miakaw tuh chih vae lan khyh zah zungzae hiinnaw a hoi cih.

10 Pawccecize aening tuh Pachia rhaw hae ah thua lya oh khe, a Ccapaw chinaw liate Pachia te ah ccawkuthui vae oh, tuhte ccawkuthuinaw ah mue vae oh paw aening tuh a hiinnaw liate khum ah thua vae cih oh.

16 Khri nynh a hiinnaw kha aening hanlan a pyaku; tuhcite aening nynh Pachia sungsahnaw kha ah nythya oh; aening mah ah uno hae hanlan ah hiinnaw kha pyaku lan accan.

2 Aning tuh aening seinaw hanlan seishawnaw silawnawpaw nynh thua; aening seinaw hanlan kyalya thua leite, laephi ccungccaw hae balyn mih seinaw hanlan mah athua.

8 Ccungccaw muinsan lante

yn langkuh zah zakawsangsakute

chinaw kyacia—

vaelantung kya chi ciate heize

kaw a ngae.

9 Pawccecize Khri tuh a chih hae paw kyate thoosah thua vae zah, bua chih vae lan khyh; chinaw nynh amaw kha uk vae khyh cipaw ah ny oh. 10 Pawccecize Khri nynh a chipaw tuh seinaw hanlan chih zah zungzae hanlan vaekheit rou nynh a chi, thuasalama a hiinpaw tuh Pachia hanlan nynh a hiin.

3 Jesu Khri kya baptisma ah in vae oh paw aening balyn tuh a chinaw kya baptisma phe ah in vae oh cipaw na nyh khyh oh tou? 4 Tukeiccuze a chinaw kya baptisma ah in oh liate aening tuh amaw ryte uukheih ah thuabua vae oh. Tuhcite Khri tuh Paaw phu-enaw liate chinaw kyate thoosahthui athua hawte, aening mah hiinnaw thawpaw kya ah hiin cih oh.✝

27 Ccungccaw hae hanlan vaekheit chi lanpaw tuh laerui-awdepaw thua zah tuh-e koute byapianaw a um hawte, 28 Khri nynh ccungccaw patae seinaw kha phu khylan vaekheit kyalya a pyaku. Amaw kha ngaehoite a ngawpaw ccungccaw hae kha khum khylan aning tuh seinaw te asekuh lei lante vaeningnaw bua yn langkuh ung cih.✝

22 Israel ccungccaw hae, ka bya hynh ngaetua oh: naemaw nynh mah na ny oh hawte, Nazareth khuapaw Jesu tuh nanning laku kya Pachia nynh nawccawkhaepaw ccungccaw nynh thua, Pachia nynh amaw liate nanning laku kya ngaeang lan umpaw ryalaw hae, khuaruarunaw hae te muihsahnaw hae kha a langsaku. 23 Pachia kya-e nytynaw te paccyn typaw khuakhannaw thyhte Jesu tuh nae kuih kalan pya athua, nanning nynh na kyng oh zah kawbya zui lei hae paw kuih te vaelantung kya na khiade oh zah phe na chia oh. 24 Thuasalama Pachia nynh chinaw kyate thoosah zah chinaw kyate a luesah vae, pawccecize amaw tuh chinaw huhan nynh kyngde kho khyh.

11 "Kae tuh tuurin hoypaw nynh ka thua. Tuurin hoypaw nynh tuh a hiinnaw kha tuu hae hanlan a pyaku.

26 Pawccecize nanning nynh hynh-e sanlou na ae takyh oh te hynh-e banang na nia takyh vae oh ze, Bawipaw a chinaw kong kha amaw yn thua mawlaezung na phy oh paw nynh thua.