1 "Dotua, e balyn hynh ka mit nynh

phe muih vae,

ka nakaring nynh mah

thae zah a ny vae.

2 Na ny oh paw balyn kha

ka nybua;

nanning laeze ka nyaahua khyh.

3 Thuasalama Athunghuapaw kalan

ka hopah cih zah,

ka bya hynh Pachia ryte

hoku tua ka ry.

4 Nanning nynh hynbya kha

na lawping oh;

nae balyn mawte ccungkia leipaw

sibawi nynh na thua oh.

5 Yccae leite zya na um oh ze,

tuh-e tuh nae hawnaw athua cih!

6 Ka hopaw bya

akonglang hynh ngaetua oh,

ka mung nynh a hopaw

ngianaw bya hynh ngaetua oh.

7 Pachia hanlan akyh lei lante

na ho cih oh tou?

amaw hanlan hynbya

na ho cih oh tou?

8 Pachia kha maedo na mang

oh tou?

Amaw kha pankhawte

bya na hokhae cih oh tou?

9 Pachia nynh akaw-aleih

he ae do oh te, nae tungvaw

hoynaw a um cih tou?

Lu kheit nynh mingccangpaw kha

a ling hawte amaw kha

na ling kho cih oh tou?

10 Aruh lante maedo na mang

oh ze, Pachia nynh

solei ae thuihei cih oh.

11 A lesaenaw nynh nanning kha

ae risah lan khyh oh tou?

Amaw rawrinaw kha nynh

ae thuanua lan khyh oh tou?

12 Nae phungbya hae tuh

buhhaw phungbya thua zah,

na thungkhawkunaw oh paw tuh

anglae tahawpaw nynh thua.

13 "Yccae leite umtua oh,

ka hobua cih,

pawpaw zemah ka tungvaw

thua vae sah.

14 Ka saw kha ka haw te

ka bou cih zah,

ka hiinnaw kha ka kuih te

ka ccyng cih.

15 Pachia nynh yn theih vae cih,

ngaehoinaw mah ka hoi vae khyh;

thuasalama amaw malang khe

ka seishawkunaw bya kha

ka ho cih.

16 Tuhte ka cyipaw tuh

ka khumnaw athua cih.

Pachia pawlangria leipaw tuh

amaw malang pou ngan lan khyh.

17 Ka bya hynh hoyte

yn ngaepah oh lah,

ka hopaw bya hynh nae nakaring

lungkhu lang tee sah.

18 Ka bya ka than hanlan

ka paccynkuh ccaccing vae;

thyaaccousah ka thua cih

cipaw ka ny.

19 Kae kha rawsete hummou

bya a ho cih?

Tuhte a ho lanze,

zya ka dae cih zah ka chih cih.

20 Uccaw phuin ning kyalya

beih yn ua,

nae ua zetuh na kyate

ka rekuh lan khyh:

21 na kuih kha ka kyate

beih sawsakuh lah,

ri lan na umnaw nynh

ka thin yn phangsah nan sah.

22 Tetuh yn ko lah, kae oi cih;

tuhkhyhze kae nynh

kae hopah ty sah lah,

te yn leihru vae.

23 Ka hoyleinaw te

ka seinaw tuh hohzeihmou acih?

Ka cyiseinaw te ka seinaw kha

beih yn nysakuh.

24 Pawccemou na mitmae

nae retawkuh zah

kae hynh na rhaw lang nae ria?

25 Khisan nynh a mungpaw

thingnaw kha na siisakuh cih tou?

vaekang aroupaw kha so

na deehui cih tou?

26 Pawccecize kae kha

rawsete myarya ccihpaw

seibenaw kong kha na zei zah,

ka di lya-e ka hoyleinaw mee kha nae ruesah.

27 Ka ccu kha sivawrui te nae he zah

ka ccianaw takyh khe

nae buhkhaw;✝

ka ccunoh kya syntawnaw na rae.

28 Aning tuh amawepaw

uccaw hawte thua zah,

ripaw nynh a aepaw

boeining hawte nynh athua.