1 Oute Job nynh khungru zah:

2 "Hynhcihawpaw bya hynh

patae ka thae vae;

nanning balyn tuh lungtangnaw

mang nae pya oh zemah,

lungriathaenaw yn pyatu hae

nynh na thua oh.

3 Accakaepaw bya hae tuh

thang khyh tou?

Apaekuh lei lan byaho lante

paw nynh mou bya ae tou oh?

4 Kae ka umnaw kya

na la um lanze,

nang hawte kae mah

bya ka ho kho;

nang kha bya kae khungru

kho cih zah, ka lu mah

kae henua kho cih.

5 Ka khalang te thawzung

kae pya kho cih zah,

lungtangsahnawpaw

ka bya nynh na ccinaw kha

ae dansah hua cih.

6 "Ka ho zemah ka ccinaw

danhua lae khyh,

ho leite ka um zemah

ccinaw nynh yn cciataw lae khyh.

7 Atu, Pachia nynh ka thaw

yn bangsah ccaccing vae;

kae mungkuh hae paw balyn kha

a maemih vae hae.

8 Kae kha nae khiide vae,

tuh-e tuh nae rawsenawpaw

ccaekia nynh thua.

Ka ngethyanaw nynh

yn thonuakuh zah,

kae kha rawsete ccaekia a khan.

9 Pachia nynh thinriate

thoh yn pae zah yn hua vae;

a haw yn zynua vae;

kae yn rhawtupaw nynh

a mit rehahan lante yn do.

10 Ccungccaw hae nynh

mih khalang yn awnua hae;

dothatheihte ka mae yn bia hae;

kae kha rawsete pynkheihlan

yn pumnuaku hae.

11 Pachia nynh amaw pawlangria

lei hae paw kalan khe yn ap zah,

ccungccaw hoylei hae

kuih kalan yn vua.

12 Daebabi lan zya ka um salamah

aning nynh ccangning lang

thoh yn khya;

ka nging te yn kyng zah

palae tui lan yn deihnaw;

themuing lang yn tawkuh zah,

13 thekawthyapaw a ccungccaw hae nynh

yn koihlu hae.

Thawccinaw hoi leite,

ka kin hae kha yn kaw hae;

ka nyngkhaw tui kha

laephi vawlan a lae hae.

14 Kae kha avae patae yn pae zah,

rhawkawpaw hawte

rangsakute yn kaw.

15 Ka ving bongku lanpaw

buriboei kha ka huikuh zah,

ka thawzung kha vuiping kya

ka kalouh vae.

16 Ka rawnaw ze ka mae tuh se zah,

ka mitteky kya azipingpaw

mohnaw a um,

17 thuasalama ka kuih kya

puathonaw um leite,

ka sawsangnaw tuh athyaa.

18 "Pou laephi, ka chiise kha

thei nan;

ka siaruanaw hynh dae nan sah.

19 E konglang ka ccaekia tuh

vaawram kya a um,✝

yn nykhaetu tuh

ahangnaw kya a um.

20 Ka ban hae nynh yn sarya hae;

Pachia malang khe

ka mitphi alua.

21 Lukhakheit nynh

a ruiban hanlan a ngiapya hawte,

Pachia kalan kae ka hanlan

yn ngiapahpaw um ravo nyn.

22 Pawccecize kum beihtaraw

aro mawze,

kithui ci a um leinaw

laanpi lang ka cceih vae cih.