1 Oute Naamath minphuinpaw Zofar nynh khung zah:

2 "Bya patae hynh khungru leite tou

um athua cih?

A byalungpaw kha thyaaccousah

athua cih tou?

3 Kathuhkaleih na hopaw bya hynh

nynh mingccangpaw kha

zya a daesah cih tou?

he na sarya vae ze, maethya leite

hummou a um cih?

4 Pawccecize nang nynh,

‘Ka hopaw tuh ahme,

Pachia mitmuihnaw kya

athyaapaw nynh ka thua,’ na ciku.

5 Thuasalama Pachia nynh

ae hopah vae sah,

nang kha bya ae khungru vae sah,

6 hawnaw akhupaw kha

ae hopah vae sah!

Pawccecize hawnaw tuh

aphuin patae a hoi.

Na cyiseinaw te atekuhpaw laeze

azyahua lante Pachia nynh

ae ngiapaw kha nyku tua.

7 "Pachia kya-e akhupaw

uccaw hae kha na muih kho tou?

Athunghuapaw huhan

adianaw kha na muih kho tou?

8 Tuh-e tuh vaawlui laeze

ahanghua—nang nynh

pawmou na cyih kho cih?

Sheol laeze akhuhua—

nang nynh pawmou

na cyih kho cih?

9 Pachia lesaenaw tuh

laephi pynpi laeze saehua zah,

rili laeze akohua.

10 Pachia nynh thong ae sah zah

byapianaw lang ae cciakhae ze,

hum nynh mou amaw kha

a khee kho cih?

11 Pawccecize Pachia nynh

ccungkia leipaw

ccungccaw hae kha a ny hae;

hoyleinaw kha he a muih vae ze,

tua leite a um cih tou?

12 Thuasalama ramkaw e

lann taraw tuh ccungccaw lang

he yn than te,

mingaee tuh a haw cih.

13 "Na thinlung kha hmerarih lan

na nung zetuh,

na kuih kha Pachia kalan

na dyng cih.

14 Na kuih kya hoyleinaw a um ze,

asawnaw langkhe ccaring

la nung, hoyleinaw kha

na bu lungkhu umsah nan.

15 Tetuh na maesue kha

ccaenaw um lei lante

na langsakuh cih;

na khyn cih zah, na rih lan khyh.

16 Na riathaenaw kha

na ning cih zah,

po alua vae paw tui hawte

na tua vae cih.

17 Te na hiinnaw tuh

ninthuccynglyn laeze

a awhua cih;

a mohnaw tuh awkhua hawte

athua vae cih.

18 Ngaehoinaw a um keiccuze

ngaengante na um cih;

thungkhaw na thua cih zah,

khyndadyh lan na haeung cih.

19 Na ih cih zah humhung

nynh mah ae sii vae lan khyh;

ccungccaw patae nynh

na kya maehoynaw

ccou a ry cih hae.

20 Thuasalama ccungccaw

hoylei hae mit tuh

a thawzya cih;

minmin hanlan luenaw

laanpi azo cih zah,

mih ngaehoinaw tuh

nyathyakou hy a sue

lan hae paw kha nynh thua," a ci.