1 "Pawccemou Athunghuapaw nynh

ccyh kha a khya khyh?

Pawccemou amaw a nyh hae paw nynh

bya a pia nin kha kharouh

a ny khyh hae?

2 Ccungccaw hoyleipaw nynh

ramri kha a nue;

milae tuuphu kha luade zah

amaw hanlan a rinku.

3 Ngawraw hae lann kha

ccaring deepah hae zah,

nomae hae tangnuapaw kha

ponpaw uccaw lante a kyngpya hae.

4 A nyaa hae paw kha laante lang

ccaring tu hae zah,

ram lungkhu e ryachi hae balyn tuh

zya a rekuh hae.

5 Tukeiccuze ryachi hae tuh

mih ccaaw hae hanlan

ramrou kya looh ccungkute,

laesia ram kya um hae paw

ramkaw e lann hae hawte,

ryalawku lan a pou hae.

6 Milae loo kya loohruekuh hae zah,

ccungccaw hoyleipaw

a misu khokhu kya-e

ccamua kha a loku hae.

7 Boeining leite, mih sasete

zidae a ih hae, khuacci lya

thykupaw boei hoi khyh hae.

8 Mua vawlan arahpaw

khuaa nynh pong a ciasah hae,

bu a um khyh keiccuze

lungpi kya a rekuh hae.

9 "A paaw um leipaw nosi kha

a nung matei kyate luade hae zah,

ryachi hae ccaaw kha ponpaw

uccaw lante a lawku hae.

10 Ryachi hae tuh boeining leite,

mih sasete khiakuh hae zah,

mih vuelaw zemah loohku acce kha

a puihpya hae;

11 Milae chitui kha miapah hae zah,

milae misu mianaw khu kya

a supyaku hae zemah,

mih tui ahaw mamin.

12 Vyavya chih hae paw tuh

khuapi lungkhu te hawkhaekuh hae zah,

vaemaw a mue hae paw tuh

bawmnaw mue khylan a sia hae;

tuhzemah Pachia nynh

mih sawsangnaw kha

pawlangriapah khyh hae.

13 "Awnaw kha rawse hae zah

awnaw laanpi kha ny leite,

awnaw laanpi kya a um ry leipaw

ccungccaw a um hae.

14 Ccungccaw theihpaw tuh

ryachi hae te anyaa hae paw kha

chia khylan awkhua takaw te a tho;

khuazi khe miruh hawte a ruh.

15 Milae zu a seikhaepaw nynh tuh

zetepakaw kha a ngaehoi,

Humhung nynh sanmah

yn muih lan khyh, a ciku,

te a mae kha a bongku.

16 Miruh hae nynh khuazi khe

milae inn kha a kiabia hae;

khuadae khe tuh

zya rekuh hae zah,

awnaw kha a sibia hae.

17 Marae zipaw mohnaw tuh

minmin hanlan awkhua ccyh nynh thua;

pawccecize minmin tuh marae zipaw

mohnaw ruiban nynh athua hae.

18 "Minmin tuh tui vawlan

a zawbahae hae;

ram lungkhu e minmin hanpaw tuh

thyalaw athua;

mih misu khokhu lang

cceih khyh hae.

19 Sonaw te khuaakannaw nynh

vuiraw kha phe a zosah;

tuhawte Sheol nynh mah

misei hae kha a zosah hae.

20 Mih nung hae nynh minmin kha

a ning hae;

Tangkaria nynh minmin kha

muihkuh hae zah

myarya thua lante a ae hae;

minmin kha hum nynh sanmah

liathui vae khyh hae;

tukeiccuze hoyleinaw tuh

thingku hawte akhyathya.

21 "Ccungccaw hoyleipaw nynh

ccaaw a saah leipaw nopi kha

vawsaw pya zah,

nomae tungvaw mah hoynaw rae khyh.

22 Tuhzemah Pachia nynh

a huhan liate a thawsaepaw kha a ro;

ccungccaw hae tuh mih hiinnaw hanlan

mih thin he aphang te, a thokuh hae.

23 Pachia nynh minmin kha

khynnaw pya hae zah a bawm hae;

mih cyisahnaw kha

a mit te a rin hae.

24 Ccungccaw hoylei hae paw tuh

sosoh kyalya hangthung athua hae,

tukoute phe azo hae;

minmin tuh ming hae hawte

baleih naan hae zah arou hae;

ccavui si hawte si athua hae.

25 Tuhte athua khyh ze,

kae hynh mihyn nynh ka thua

cipaw hum nynh mou

ccaekia a khan cih?

Ka hopaw tuh accakaepaw nynh

thua cipaw hum nynh mou

a langsakuh cih?" a ci.