1 Oute Naamath minphuinpaw Zofar nynh khungru zah:

2 "Hoyte ngaetua!

Ka lungriathae keiccuze,

nang kha khungru khylan

ka thinlung nynh yn tuhou.

3 Ka tungvaw saryate

seibenaw bya kha

ka thae zah,

ka thinlung nynh

nang khungru lanpaw kha a ny.

4 Langmawlya, laephi vawlan

ccungccaw la um takaw lya mawte,

5 ccungccaw hoyleipaw

a lungtuanaw ccyh tuh

dyn zah,

Pachia pawlangria leipaw

a lungtuanaw tuh

sosoh kyalya nynh thua

cipaw na nyh khyh tou?

6 Aning tuh vaawlui cia

hang zah, a lu nynh

maeking phe a phya ze heize,

7 amaw ia hawte zungzae

a roh cih;

amaw a muih hae paw nynh,

‘Teipei a um?’ a ci cih hae.

8 Aning tuh maan hawte

azo cih zah, muih kho

um vae lan khyh;

khuazi e vizin hawte

azo cih.

9 Amaw kha a la muihpaw

mit nynh muih vae lan khyh,

a la umnaw hmin nynh

amaw kha muih vae lan khyh.

10 A ccaaw hae nynh

ryachi hae kya-e

a ru hae paw sisua kha

mimaw kuih te a kii cih hae.

11 Thawzung te phe abeihpaw

ano ungpaw a pyn tuh

amaw ryte laenoi kya

a ih cih hae.

12 "Hoyleinaw tuh

a khalang kya e zah,

a lae kaw khe

zya a thuruh zemah,

13 tuh-e tuh zosah ry leite,

a khalang kya

phang a mung zemah,

14 a vue lungkhu khe

a looh tuh rulaekuh zah,

a lungkhu kya

huparepaw sy lang a tang.

15 Hoirumnaw kha

po laang zah, bua a lua;

Pachia nynh a vue lungkhu te

phe a pousah.

16 Aning nynh huparepaw

sy kha zu zah,

huparepaw lae nynh

amaw kha a theih cih.

17 vawpi hae, mateitui te

khoilutui a luapaw

vaw hae kha muih lan khyh.

18 A ryalaw mee athae kha

due mang leite

bua a kii cih hae;

kung a kunaw mee amia khate

lungtuanaw mue lan khyh.

19 Pawccecize ryachi hae kha

tuaasah hae zah pawlangria khyh hae,

amaw nynh a sak leipaw

inn kha a luade hae.

20 "A rylenaw vue tuh

beih kho boi khyh zah,

a karankunaw kya

pawpaw mah zuasah khyh.

21 A ae koute pawpaw mah

umlae vae khyh;

tukeiccuze a hoirumnaw tuh

tyn lan khyh.

22 Rythy azaw lan a hoi lya hae khe,

lungvawsawnaw a tung cih hae;

lungriathaenaw aphuinphuin nynh

a thuanua cih hae.

23 A vue phe so lan

ae ccaleih sah!

Pachia nynh a thinrianaw kha

a sawnua cih,

tuh-e a thinrianaw tuh

looh hawte a tungvaw kya

khuaa lang a rawsah cih.

24 Sivaw zunghe kyate

a ccue zemah,

sohin the nynh po a thuing cih.

25 Tuh-e the kha a pyn kyate

phoh thua zah,

phaephae akpaw the adung tuh

a nynkhaw kyate yn toikuh;

tetuh aning tuh a rih vae.

26 A sisua balyn tuh

mohnaw kya azo,

ccungccaw nynh tuaa leipaw

maee nynh amaw kha a u cih;

a bu kya a umpaw balyn kha

a u cih hae.

27 Aning a hoyleinaw kha

vaawlui nynh a phy cih zah,

laephi nynh mah rawsete

a thonuakuh cih.

28 A inn umpaw hoirumnaw

miakaw kha azo cih zah,

Pachia a thinria nin vae tuh

phe azo cih.

29 E tuh ccungccaw

hoyleipaw nynh Pachia kyate

a ccou lanpaw a hanpaw nynh thua,

Pachia nynh aning hanlan

a nungpyapaw rho nynh thua," a ci.