1 Oute Job nynh khung zah:

2 "Ka rah ka khui salamah

a kuih tuh myarya ari keiccuze,

atunin mah myarya ka bokhaekuh.

3 Pachia muih khonaw hmin kha

ka nyh ravo nyn,

amaw a umnaw hmin kalan maw

ka thua kho ravo nyn!

4 A malang khe ka byathan kha

ka thaesah cih zah,

ka byathan akonglang kha

hoyte ka hopah cih.

5 Aning nynh bya yn khungpaw kha

ka thae cih zah,

yn hopyapaw kha ka nyhthya cih.

6 Aning nynh a huhan lesaenaw khate

kae kha yn rawse cih tou?

Yn rawse lan khyh; ka bya kha

yn ngaepah cih.

7 Amaw malang khe miding nynh tuh

bya a hokhae kho cih,

te bya yn piatu nynh zungzae luenaw

yn pya cih.

8 "Malang ka ccia ze,

tuin kya Pachia um khyh,

nulang ka sihku ze,

amaw kha ka muih kho khyh;

9 voilang khe a reku ze,

amaw kha ka muih kho khyh;

ranglang ka maekuh zahmah,

amaw kha ka muih khualae khyh.

10 Thuasalama ka zuipaw

laanpi kha aning nynh a ny;

aning nynh he yn syntawtua ze,

sui hawte ka langkuh cih.

11 Ka ccu nynh a laanpi kha

tynkaring lan a zui;

a laanpi kha ka zui zah

ccanglang ka maekuh khyh.

12 A mung kyate a poupaw

kawbya kha ka vua khyh;

a hopaw bya kha ka by kya

ka ccykeku.

13 Thuasalama Pachia tuh

a rulaekuh leipaw thua zah,

hum nynh mou a rulae kho cih?

A rypaw kha pharung a cyi.

14 Ka hanlan yn paccynpyapaw kha

a ccingsah cih;

tuhcihawpaw paccynkunaw patae kha

a thinlung kya a um.

15 Tukeiccuze amaw malang khe

ka siikuh zah,

he ka tua vae ze, amaw kha ka rih.

16 Pachia nynh ka lungthaw

yn zyasah vae;

Athunghuapaw nynh yn risah vae.

17 Mohnaw liate kae hynh

ro ka thua khyh;

Marae zipaw mohnaw kha

ka kyate a thuruh vae.