1 "Thuasalama atu tuh kamaw laeze

a nohua hae paw nynh

kae kha yn zuenaw hae,

mih paaw hae tuh ka tuuphu

a rintu ui hae phu san

ka umsah lei hae paw nynh thua.

2 Mih thawzung balyn tuh

athang vae keiccuze

mih thawzung kyate

paw thanenaw mou ka mue kho cih?

3 Ryachi te ccakancci keiccuze

minmin nynh arounaw te

ccungccaw um leinaw

ramkaw e kha a bou hae,

4 Mallow haetapaw te thabu kya-e

anaw hae kha ae lan siakuh hae zah,

innphi ku atharui kha a thaeku hae.

5 Minmin kha ccungccaw kyate dee hae zah,

ccungccaw hae nynh mih nulang te

miruh hawkhate a sianua hae.

6 Vahung lungkhu, laekarung te

lungkarung kyakhe a um hae.

7 Thabu lungkhu khe

sarangpaw hawte sia hae zah,

hinpawbu lungkhu khe

a tuh-eihkuh hae.

8 A ngaeepaw, a thethahpaw

ccungccaleipaw thua hae zah,

ram kyate dee athua hae.

9 "Atu vae tuh hlaw te

yn kee hae zah yn sarya hae;

kae hynh tousenawpaw lang

yn mang hae.

10 Yn hua hae zah yn sibia hae;

ka muihnaw kya tuing thoi lan

synkuh khyh hae.

11 Pachia nynh ka li arui kha ccua zah

yn nyaasah vae keiccuze,

ka malang khe mih rythyte

a cyi vae hae.

12 Ka ranglang e keisukeilae

um hae paw nynh thokuh hae zah,

kae kha yn eih hae,

kae kha ro nawlan cite

laanpi a sah hae.

13 Ka laanpi kha roh hae zah,

kae kha ro lan yn zuanuaku hae;

lu kheit nynh sanmah minmin kha

khee khyh hae.

14 Akopaw a ua kyate

oun tee hae zah,

vaekheihmawte yn lungnuaku hae.

15 Rinaw nynh yn thuanua zah,

ka phu-enaw tuh khisan nynh

a mungpaw hawte phe zo zah,

ka hoirumnaw tuh

maeking hawte phe azo.

16 "Atu tuh ka thinlung phe koi;

vawsaw teingnaw ccyh nynh yn thuanua.

17 Khuazi kya ka ru tuh ccih zah

yn reepaw ccinaw nynh

daebabi lan yn umsah thya khyh.

18 Puathote ka boeining khate

yn kyng zah,

ka angkile nging khate

phang yn kyng.

19 Tuiccua lungkhu lang

dae yn vua zah,

kae tuh laenoi te

buhhaw lang phe ka tang.

20 Pou Pachia, na kalan

ka sia zah nae leih khyh;

ka thadyn zah dote kyalya nae do.

21 Ka tungvaw vawsaw pya khylan

nae hawinua zah,

athungpaw na kuih te

nae tuaa nae sah.

22 Nae hangthung zah

khivae kha nae ccisaku,

khise nynh thawte

yn mung bungthung.

23 A hiinpaw ccungccaw balyn hanlan

na nungpaw hmin kalan te

chinaw kalan nae cciakhae cih

cipaw ka ny.

24 "Thanccingte, vawsaw tung zah

bawmnaw mue khylan

a siapaw minyaapaw kha

lukhakheit nynh rawsete

hawilia khyh.

25 Vawsaw a tung hae paw hanlan

ka rah ka khui khyh tou?

Ryachi hae hanlan

ka thinlungccih khyh tou?

26 Thuasalama hoynaw kha

he ka ngaehoi vae ze,

hoyleinaw yn thua;

awnaw kha he ka ngaehoi vae ze,

mohnaw yn thua.

27 Ka thinlung tuh a thinphang zah

kharouh dae khyh;

vawsaw teingnaw ccyh nynh

yn thuanua.

28 Khuanin apaw leinaw

mohnaw kya ka khiavuikuh;

zapi laku ka thadyn zah

bawmnaw mue khylan ka sia.

29 Kae tuh suizaw hae uno

ka thua vae zah,

kalauh pavaw hae ruiban nynh

ka thua vae.

30 Ka ving tuh pong mang zah

akuakuh,

ka ru hae tuh asopaw nynh a u.

31 Ka tintang tuh rawkhuinaw

roi lang tang zah,

ka phyly tuh a rah hae paw

roi lang nynh a tang.