1 Oute Elihu nynh bya po ho zah:

2 "A haw hae paw nanning,

ka bya hynh ngaetua oh,

nythyanaw a hoi hae paw nanning,

nae nakaring kha ka kalan

oun tuaku tua oh;

3 dankhaling nynh looh kha

a taangtua hawte,✝

nakaring nynh bya kha a syntawtua.

4 Byading kha pokuh oh sih lah,

aening laku kya ahoy lante

byapae oh sih.

5 Pawccecize Job nynh,

‘Kae tuh seinaw hoi leipaw nynh

ka thua,

Pachia nynh ka dingnaw kha

ccaring yn lawpya vae;

6 ka la ding zemah mihynpaw lang

ria ka thua vae;

ka la cyisei khyh zemah

ka vaemaw tuh

dansah kho leipaw nynh thua,’ a ci.

7 Job te alokuhpaw hummou a um?

Saryanaw kha tui hawte neih zah,

8 hoyleinaw a rae hae paw ryte

mungkute,

ccungccaw hoylei hae paw ryte

a cceihkheih hae paw tuh hummou?

9 Pawccecize Job nynh,

‘Pachia tungvaw lungrythua tuh

thanenaw um khyh,’ a ci.

10 "Tukeiccuze nythyanaw

a hoi hae paw nanning,

ka bya hynh ngaetua oh,

Hoyleinaw tuh Pachia kyate

sawkuh sah lah,

cyiseinaw tuh Athunghuapaw kyate

sawkuh vae sah.

11 Ccungccaw hae kha

mih cyisahnaw thyhte

a liaru cih hae zah,✝

mih ziazae thyhte mih tungvaw

a ccawsah cih.

12 Thanccingte, Pachia nynh

hoyleinaw kha rae lan khyh zah,

Athunghuapaw nynh dingnaw kyate

maekuh lan khyh.

13 Hum nynh mou laephi hynh

Pachia kya ap zah,

hum nynh mou laephipi hynh

amaw tungvaw a khang?

14 Pachia nynh ccungccaw muisaw kha

amaw kalan lahthui zah,

a hy kha amaw kalan a law lanze,

15 ahysuepaw balyn tuh

marya a roh cih hae zah,

ccungccaw balyn tuh

laenoi kalan a ki cih hae.

16 "Nythyanaw na hoi ze,

e hynh thaetua;

ka hopaw hynh ngaetua.

17 Dingnaw a huatupaw nynh

a uk cih tou?

Adingpaw te athungpaw kha

sei na be cih tou?

18 Aning nynh siapharan kha,

‘Nang tuh na hynpaw!’ ci zah,

uktu hae kha, ‘Ccungccaw hoy lei

hae nanning!’ a cipya hae;

19 bawi hae tungvaw

maedonaw hoi khyh,

ryachi hae kya laeze

mihoi hae tungvaw kya

maedonaw hoi khyh;

pawccecize minmin balyn tuh

Pachia kuih te raepaw nynh thua hae.

20 Sosoh taraw kyakhe a chih hae;

ccungccaw hae tuh ziraccyng khe

thyngkuh hae zah a chih hae,

athung hae paw mah

ccungccaw kuih te

thua leite a zo hae.

21 "Pawccecize Pachia nynh

ccungccaw ccianaw laanpi kha do zah,

mih ccu a kaw hae paw balyn kha a muih.

22 Hoyleinaw a rae hae paw nynh

rekunaw lanpaw mohnaw

um khyh zah,

chinaw mynlyh mah um khyh.

23 Pachia malang byapiakunaw ccyh kha,

ccungccaw hanlan Pachia nynh

khyapah khyh.

24 Athawsae hae paw kha

akaw-aleih khia leite syro hae zah,

mih umnaw kyakhe

mingccang hae kha a nung hae.

25 Tuhcite mih cyisahnaw kha nyh zah,

khuazi khe minmin kha

khulia hae zah a ro hae.

26 Mih hoyleinaw keiccuze

ccungccaw hae muihnaw kyakhe

minmin kha a zia hae,

27 pawccecize minmin nynh amaw kyate

ccanglang maekuh hae zah,

a laanpi miakaw kha

pawlangria khyh hae,

28 tetuh ryachi hae siaruanaw tuh

amaw kya thua zah,

tuaasahkunaw a teing hae paw

siaruanaw kha a thaepya hae.

29 Pachia nynh yccae leite

zya a um zeso, hum nynh mou

amaw kha seibe kho cih?

A mae kha zya a reku ze,

minphuin nynh thuasah,

lukhakheit nynh thuasah,

hum nynh mou amaw kha

a muih kho cih?

30 Tuhteze nynh Pachia nyh lei

hae paw nynh thuasah,

ccungccaw hae kha

kaangsyakhawtu hae nynh thuasah

uk lan khyh hae.

31 " ‘Detahnaw phe ka teing vae;

bua ka sei vae lan khyh;

32 ka ny leipaw kha

beih yn ccangpah;

hoyleinaw kha ka la rae vae lanze,

bua ka rae vae lan khyh,’

cite lukhakheit nynh

Pachia kha a hopya vae khaw?

33 Amaw kha na vua keiccuze,

na rynaw thyhte ae liaru cih tou?

Kae nynh thua leite, namaw nynh

na poku lanpaw nynh thua;

tukeiccuze na nypaw kha hotua.

34 Tuanaw a hoi hae paw nynh

hynhcite yn hopah cih hae zah,

ka bya a thae hae paw

mihaw hae nynh hynhcite

a ho cih hae,

35 ‘Job nynh nythya leite a ho,

a bya tuh hawnaw leite

hopaw bya nynh thua,’

a ci cih hae.

36 Job nynh ccungccaw hoylei

hae paw hawte bya a ho keiccuze

athangnaw cia syntawtua thua vae sah.

37 Pawccecize a seinaw kyakhe

rawsenaw a biachih,

aening laku kya a kuihbia zah,

Pachia rawsenaw bya kha

patae a ho," a ci.