1 Tukoute Job nynh a khalang aw zah a pui nin kha thya a law.✝ 2 Job nynh a hopaw tuh:

3 "Ka pui nin tuh roh sah lah,

‘Ccapaw kha poi athua vae,’

a ci hae khuazi kha mah roh sah.

4 Ka pui nin tuh moh sah!

Ahangnaw umpaw Pachia nynh

khah-e nin kha ccung nan sah,

awnaw nynh mah

khah-e nin kya aw nan sah.

5 Ngaethyanaw te marae zipaw

mohnaw nynh khah-e nin kha

kae kya-e nynh thua, ci hae sah;

Maeking nynh khah-e nin kha

zithin sah;

khuadae e mohnaw nynh

khah-e nin kha ri lan umpaw

nin lang tangsah sah.

6 Khah-e khuazi kha marae zipaw

mohnaw nynh phang bong sah!

Kum kya-e nin hae laku kya

a lungtuabua nan sah;

sawpaw rianaw kya mah

umbua nan sah.

7 Khah-e khuazi tuh daetedae sah lah,

lungtuanaw roi mah

thae thua nan sah.

8 Nin kha thya a lawthya hae paw te

Leviathan hupi kha thosahku lan

kaw a pyathya hae paw nynh

khah-e khuazi kha thyalaw hae sah.

9 Khah-e khuazi khua adae takaw e

awsi hae tuh moh hae sah;

awnaw kha ngaehoi salamah

paw sanmah mue nan sah;

awkhua khuadaepaw kha

muih nan sah,

10 pawccecize ka nung vue thuakaw kha

khaw khyh zah, vawsawnaw kha

ka muih khyh nawlan thuruh khyh.

11 "Pawccemou ka pui lyakhe

ka la chi khyh?

Pawccemou vue kyate

ka pou lyakhe ka hy a la thang khyh?

12 Pawccemou ccukharu vawlan

yn la dua hae zah,

matei yn la zusah hae?

13 Khah lyakhe ka la chi lanze,

atu tuh zya ka huekuh vae cih zah

daetedae lan ka um vae cih paw;

zya ka ih vae cih paw;

14 khuapi arohpaw kha mimaw hanlan

a raekuh thui hae paw

laephi siapharan hae te

uktu bawi hae ryte thuasah,

15 mih inn kya sui te ngun

phe a biasah hae paw

bawi hae ryte thuasah

phe ka haeung vae cih.

16 Tuhkhyhze, pawccemou achihte

yn puipaw imua hawte thuasah,

awnaw a muih boi leipaw

nosi hawte thuasah

yn la uu khyh hae?

17 Tuin kya tuh ccungccaw hoylei

hae paw nynh vawsaw pyakunaw

um vae khyh zah,

mih riathae hae paw tuh

a haeung vae hae.

18 Tuin kya tuh thongccah hae paw mah

daebabi lan pynkheihlan a um hae;

ryalaw a nawtu hae paw roi kha

thae vae khyh hae.

19 Tuin kya ccungccaw

adih ale um hae zah,

see hae tuh mih bawi hae

kuih kyate a lue vae hae.

20 "Pawccemou riathaenaw

a teingpaw kha awnaw pya zah,

thinlung ngaethahpaw kha

hiinnaw a pya?

21 Chi a ry hae zemah chinaw nynh

a thuanua lei hae paw,✝

thuruhpaw sisua laeze chinaw

a ryhua hae paw,

22 shawku he a muih hae te,

myaryamaw mih lungtua zah,

mih lungpaw hae paw kha

pawccemou hiinnaw a pya hae?

23 Laanpi a muihkuh kho leipaw,

Pachia nynh phang a

koihkhawpaw kha

pawccemou awnaw pya athua?

24 Pawccecize ka hawkhaekunaw tuh

ka looh hawte thua zah,

ka raw ka khuinaw tuh

tui hawte alua.

25 Ka thinphangpaw uccaw nynh

ka tungvaw yn thuanua zah,

ka ripaw uccaw nynh

yn ccawphu.

26 Ngaengannaw ka hoi khyh,

daebabi lan ka um kho khyh;

thawdangnaw hoi leite

vawsawnaw nynh yn thuanua,"

a ci.