1 Oute Job nynh khung zah:

2 "Nanning tuh ccungccaw

na thua oh zah,

hawnaw tuh naemaw ryte

a chihbua cih cipaw

lunghiin lan um khyh.

3 Thuasalama nanning hawte

nythyanaw ka hoibua;

kae hynh nanning laeze

ka nyaahua khyh.

Tuhcihawpaw tuh

a nyh leipaw hummou a um?

4 Ka ban hae nynh heize

yn sarya hae;

Kae tuh, Pachia kha

ka ko zah yn thaepyapaw,

a dingpaw te ccaenaw um leipaw,

a sarya hae paw nynh ka thua.

5 Mih thawdang hae paw nynh

vawsaw tung hae paw kha

a theihrya hae,

vyavya khuliakuhpaw kha

a theihrya hae.

6 Miruh hae bu tuh

daenaw kya a um,

mih kuih kya mih pachia kha

ccyngkute

Pachia thin a riasah hae paw tuh

a khyn hae.

7 "Sarangpaw hae te vaawlang e

pavaw hae kha khiakuh oh lah,

ae ccangpah cih oh zah

ae hopah cih oh;

8 laephi kya-e aku hae kha

khiakuh oh lah,

ae ccangpah cih oh,

te rili kya-e ngasaw hae kha

khiakuh oh lah,

ae hopah cih oh.

9 E hae hynh Bawipaw kuih nynh

a raepaw nynh thua cipaw kha

hynh-e hae balyn nynh

ny leite a um hae zawtou?

10 Ahysuepaw miakaw hiinnaw te

ccungccaw miakaw hy tuh

Pachia kuih kya nynh a um.

11 Lae nynh looh kha a taangtua hawte,

nakaring nynh bya kha

a syntawtua khaw?

12 A tawpaw nynh hawnaw hoi zah,

A shesaepaw nynh

nythyanaw a hoi khaw?

13 "Hawnaw te thawzung tuh

Pachia kya a um;

aning nynh tuanaw hoypaw te

nythyanaw kha a hoi.

14 Pachia nynh a phou ze,

humhung nynh mah

sakthui kho vae khyh;

Pachia nynh lukhakheit kha

a khawsung ze,

humhung nynh mah

hungpah kho vae khyh.

15 Pachia nynh tui kha

a tingkhaw zetuh,

karae arou;

tui kha a luasah zetuh,

laephi kha pong avu.

16 Thawzung te hawnaw tuh

Pachia kya a um;

a lingtupaw te a lingpaw tuh

amaw kya-e nynh thua hae.

17 Tuanaw pyatu hae kya-e

hawnaw kha lawpah hae zah,

byapiatu hae kha a ngaeesah hae.

18 Siapharan hae kha phoh hae zah,

thong a saw hae.

19 Ranpibawi hae kha

maethyalah hae zah,

mih thawsaepaw kha

a dawleih hae.

20 Doliaku lan um hae paw kha

byaho kho leite umsah hae zah,

kum tang hae paw kya-e

nythyanaw kha phe a lawpya hae.

21 Uktu hae kha maethyalah hae zah

a thawsae hae paw taeccia kha

a khahpya hae.

22 Mohnaw lungkhu e

byakhupaw kha langsakuh zah,

marae zipaw mohnaw kha

awnaw kalan a thuakhae.

23 Minphuin hae kha

a lesaepaw lang rae hae zah,

phe bua a ro hae;

minphuin hae kha

pungzaesah hae zah,

bua a zyasah hae.

24 Laephi cciakhaetu hae kyate

nythyanaw kha lawpah hae zah,

laanpi um leinaw ramkaw khe

a khiavuisaku hae.

25 Minmin tuh awnaw um leite

mohnaw kyakhe

maemae a zahkuh hae;

a ruipaw hawte tangkitangkae

lante a cciasah hae.