1 Te Bawipaw nynh Job kyakhe,

2 "Pachia kha seinaw a ccungpahtupaw nynh

Athunghuapaw kha bya ei lan

accan zawtou?

Pachia ryte bya a eikuh hae paw nynh

bya a khungru cih," a ci.

3 Oute Job nynh Bawipaw kha

khungru zah,

4 "Kae tuh hosyn leipaw nynh ka thua;

nang kha pawtemou kae khungru kho cih?

Ka kuih te ka khalang kha ka huku.

5 Vae kheit phe ka ho vae zah

kae khungru vae lan khyh;

vae ning ka ho vae zah

ka ho vae lan khyh," a cipya.

6 Tetuh Bawipaw nynh Job kha khiccung lungkhu te khungru zah:

7 Pise hawte na taevoiboei kha voiku tua;

Bya kae khia cih zah nae khungru cih.

8 Kae hynh na sei nae ci ngan cih tou?

Nang tuh thyaaccou na thua nawlan,

kae hynh sei nae be cih tou?

9 Pachia kuih te alokuhpaw kuih

na hoi tou?

Pachia roi te alokuhpaw roi khate

khozaw na laesakuh kho tou?

10 Lesaenaw te sawtua ccounaw khate

ccaanku tua;

phu-enaw te minthaannaw kha

boeining lang lawku tua.

11 Na thinrianaw kha pousah tua,

a lysakuhpaw balyn kha do hae lah,

nyaasah bung hae.

12 A lysakuhpaw balyn kha do hae lah,

akaw lang sangsah hae;

ccungccaw hoylei hae paw kha

mih thadynnaw kyakhe syde hae.

13 Minmin kha laenoi kya

pynkheihlan marya thuruh hae;

minmin kha laephi akaw langkhe

heede hae.

14 Tetuh na ranglang kuih nynh

taenaw ae pya kho cipaw

kae nynh mah kae nykhae cih.

15 Nang kae rae hawte ka raebuapaw

Behemoth kha dotua;

aning tuh tangnuapaw hawte

lonua kha a ae.

16 A thawzung tuh a tae kya um zah,

a huhan tuh a vue tharui kyakhe nynh a um.

17 A leihmae kha sidar thing hawte he zah,

a phae tharui hae tuh

pynkheihlan a um hae.

18 A ru hae tuh sohin ccong te

lokuh hae zah,

a kuih a ccu hae tuh

sivaw ccong te nynh aloku hae.

19 "Tuh-e tuh Pachia nynh

a raepaw kyaze masaty nynh thua;

amaw a Raetupaw kyalya nynh

thaloi te amaw kalan a naekuh kho.

20 Loramsaw balyn a paeenaw hae mua nynh

amaw hanlan looh kha a pousah.

21 Hinpawbu kaw khe a rya,

phaeku kaw te tuinoh kyakhe a rekuh.

22 Hinpawbu nynh mynlyh

a um lante dawpah zah,

vawkhu kin e aedu ku hae nynh

a koihlu hae.

23 Vawkhu e tui tuh alethung zemah

a thinphang khyh;

Jordan vaw nynh a khalang kyacia

a suh zemah daebabi lan a um.

24 Lukhakheit nynh tuh-e tuh

bawnawpaw te a kyng kho tou?

A naduh kya a napaw a tho kho tou?