1 Oute Teman minphuinpaw Elifaz nynh khung zah:

2 "Mihawpaw nynh

khivae tahawpaw bya khate

khungru lan accan zawtou?

Nithua lang e khisan khate tou

amaw te amaw kha

phe a biasakuh cih?

3 Athane leipaw bya te thuasah,

hoynaw a thuakhae kho leipaw

bya te thuasah

eiku lan accan zawtou?

4 Nang tuh Pachia rawrinaw kha

na vua zah,

Pachia malang sawsang kha

na kheeku.

5 Na hoyleinaw nynh

na munglae kha ccangpah zah,

thyaruhnaw bya kha na poku.

6 Kae nynh thua leite,

namaw khalang ccaccei nynh

namaw kha sei ae be;

na munglae nynh

nang rawsenawpaw ccaekia

a khan.

7 "Nang hynh ccungccaw kyaze

masaty a puipaw na thua tou?

Mua hae kha rae athua mawze

nang tuh na la pui vae tou?

8 Pachia ryte tungkunaw kya-e

aphiruh bya kha na thae boi tou?

Ccungccaw hawnaw hynh

nang rou tou na hoi?

9 Kae ny leipaw kha

pawmou na ny?

Ccaerarih lan kae thaethya leipaw kha

pawmou na thaethya?

10 Na paaw laeze tawhua hae zah

mih sang a paw hae paw te

mih kum a tang hae paw tuh

kae kya a um hae.

11 Pachia nynh nang ae pyapaw

lungtangnaw bya tuh

eih zya kaesy tou?

nevyalya lan ae hopyapaw bya tuh

eih zya kaesy tou?

12 Pawccemou na thinlung nynh

nang kha ccaring ae cciakhae zah,

na mit te tahrarih lan nae do?

13 Tetuh na thinlung nynh

Pachia kha rawse zah,

tuhcihawpaw bya kha

na khalang kyate a pousah.

14 Ccungccaw tuh paw thua zahte mou

a thyaa kho lanpaw tuh?✝

Nopi nynh a saahpaw tuh

paw thua zahte mou

a ding kho lanpaw tuh?

15 Pachia nynh tuh

a mithyaa hae kha heize

zyn khyh hae,

vaawccungccaw hae heize

amaw malang tuh

thyaa khyh hae;

16 anungsikuhpaw te

a ozia thahpaw,

hoyleinaw kha tui hawte

a neihpaw ccungccaw thathy tuh

holae um vae khyh!

17 "Kae muihsah cih;

yn ngaepya tua;

ka muihpaw kha

kae hopah cih,

18 mihaw hae nynh ho hae zah,

minpaaw hae nynh

a phei lei hae paw bya kha

kae hopah cih,

19 ram tuh minmin kyalya kha

pya hae zah,

minmin laku kya

minphuin ccangpaw umbua khyh.

20 Ccungccaw hoyleipaw tuh

a hiin lungkhu balyn

vawsaw a teing;

thawccinaw a hoi leipaw hanlan

a hiin lungkhu balyn

vawsawnaw kha nungpya athua.

21 Ri lan umpaw roi kha

a nakaring kya accae;

a hoirum lyakhe miruh nynh

a thuanua cih.

22 Mohnaw lungkhu te

lue lanpaw kha ngaehoinaw

hoi khyh,

aning tuh thaloi hanlan

laerui-awde athua vae.

23 ‘Tei vema looh a um?’

cite looh ccungku lan

a khiakuh hae;

mohnaw ccyh tuh

anae vae cipaw a ny hae.

24 Rhawtuk lan a paccynkuhpaw

siapharan hawte,

lungvawsawnaw te

thinphangnaw nynh

amaw kha risah zah a tae.

25 Pawccecize Pachia kha

rawsete a kuih dyngnua zah

Athunghuapaw kha

pawlangria khyh;

26 khawriaphua thaawkalaepaw kha

ccyngkuh zah

lungkhungte Pachia kha

rawsete a ccuenua;

27 a mae kha atho nynh

phang bong zah,

a cce kyakhe atho tuh

a sueluakuh.

28 Thuasalama ccungccaw adaenaw khuapi,

lu kheit nynh sanmah

umnaw lei lanpaw inn hae,

roh zah patae apumkuh lanpaw

inn hae kyakhe aning tuh

a um cih.

29 Aning tuh hoirum lan khyh zah,

a sisua tuh tyn lan khyh,

a hoirumnaw mah

lae vawlan azo cih;

30 mohnaw kyate lue lan khyh;

maeephu nynh atoih thawpaw

a nge kha a rousah cih zah,

khisan nynh a paw kha

ccaring a mung cih.

31 Amaw te amaw lingkute

accakaepaw kha

doliakuh nan sah;

pawccecize accakaepaw kha

a mue cih.

32 A ccyh azaw maw azo cih zah,

a karan tuh hinlalyh lan um lan khyh.

33 Misu ku hawte

athae avoi leipaw kha

a khuasakuh cih zah,

oliv ku hawte apaw kha a khuasakuh cih.

34 Pawccecize Pachia pawlangria

leipaw phu tuh tiin hae zah,

pyaruh te sakpaw

mih inn tuh maee nynh a u.

35 Thyaruhnaw kha ccaaw lang

poi hae zah hoyleinaw kha

ccaaw lang a saah hae,

mih thinlung nynh

hynbya kha a paccyn," a ci.