1 "Atu kotua hae;

nang ae oi cih paw

hum san um vema?

Mithyaa hae kyaze hummou

na ngaehoikuh cih?

2 Thinrianaw nynh mingaee kha

theih zah,

eiungnaw nynh tuanaw

a zyapaw kha a chia.

3 Mingaee nynh atharui

a phohpaw kha ka muih,

thuasalama vaekheihmawte

a umnaw kha thya ka law.

4 A ccaaw hae tuh khyn khyh hae,

byapiazung kya

phe shung hae zah,

minmin kha a luesah lan hae paw

hum sanmah um khyh.

5 Aning nynh a ruepaw looh kha

mih vuelaw hae paw nynh

a ae hae, hinpaw laku e heize

a lawku hae; tuihawpaw nynh

a sisua kha phe a lua.

6 Pawccecize riathaenaw tuh

laenoi kyate yn thua khyh zah,

vawsawnaw tuh laephi kyate

yn po khyh;

7 maee-ia apeihpaw tuh

aluki lang apia hawte,

ccungccaw tuh vawsawnaw

tung khylan nynh yn pui.

8 "Kae tuh Pachia kha

ka ccung cih zah,

ka tynre balyn kha

Pachia kya ka ap cih.

9 Pachia nynh alesaepaw uccaw,

nythya kho um leipaw te

riatae um leipaw ngaeang lan

umpaw uccaw hae kha a rae.

10 Laephi vawlan khuaarawsah zah,

loo kya tui a luasah;

11 zakawsangsakuh hae paw kha

ahangnaw kya nung hae zah,

a rah a khui hae paw kha

khynnaw kalan a hangthung hae.

12 A thyaruh hae paw tuh

mih ryalaw kya mih laan mih sui

a ua khyh nawlan,

mih khuakhannaw kha

a ropya hae;

13 Mihaw hae kha mimaw

thyaruhnaw toulou khate

kyng hae zah,

thyaruh hae khuakhannaw kha

alakawpaw lang a tangsah.✝

14 Minmin tuh ninthu khe

mohnaw te tungkuh hae zah,

ninthuccynglyn khe

khuazi hawte zahkute a cceih hae.

15 Thuasalama khah-e hae munglae

kya-e thaloi kyate thuasah,

a thawsae hae paw kuih kyate thuasah

ryachi hae kha a khum hae.

16 Tukeiccuze ryachi hae nynh

ngaehoinaw hoi hae zah,

dingleinaw tuh a mung a myh.

17 "Pachia nynh a thuiheipaw tuh

pawcih baban mou

lungtuapaw athua;✝

tukeiccuze Athunghuapaw nynh

thuiheikunaw kha

pawlangria leite um nan.

18 Pawccecize aning nynh

vaemaw a muesah zemah,

tuh-e vaemaw kha a heepya;✝

aning nynh a zia zemah,

a kuih te a dansah.

19 Aning nynh vawsawnaw

ccangtaruh kyate

ae khum cih zah,

ccangsari kya mah

hoyleinaw pawpaw nynh mah

ae ty lan khyh.

20 Ccakancci ze chinaw kyate

ae thungkhaw cih zah,

rhawtuk aso ze thaloi rhaw kyate

ae thungkhaw cih.

21 Thanthya hokunaw kyate

ae luesah cih zah,

ronaw rhaw yn thua zemah

na rih lan khyh.

22 Ronaw te ccakanccinaw

apui zemah na nuin cih zah,

laephi loramsaw raw kha

na rih lan khyh.

23 Pawccecize loo lungkhu e

lungpyng hae te

na hokheihthya cih oh zah,

loramsaw hae te

na ccawkuh cih oh.

24 Na ryabu tuh akhyn cipaw

na nyh cih,

na sahiinkhia kha

na do cih zah zo lan khyh.

25 Na ciihan tuh patae acih cih zah,

laephi kya-e lonua zeih

a ci hae paw kha na muih cih.

26 Accyh azaw te tinnaw hmin kya

a thuakhae hae paw

ccathae hawte, myarya na taw te

na shawku kalan na thua cih.

27 Dotua, e hynh kae do mamia zah

akyhpaw nynh thua.

Ngaetua, namaw hanlan

byaccing nynh thua

cipaw nytua," a cipya.