1 Oute Job nynh khungru zah:

2 "Hohseciamou vawsaw

nae pya ung cih oh zah,

bya te palae tui lan

nae khya ung cih oh?

3 Vae haw cia ka tungvaw

nae seisah vae oh;

ka tungvaw seisah lan

nae maethah khyh tou?

4 Ka la mesei ze heize

ka meseinaw tuh

kamaw te nynh aseku.

5 Nanning nynh kae kha

rawsete nae poonuakuh oh,

maethyanaw ka ingpaw hynh

a seinaw keiccu nynh

thua nae ci oh ze,

6 Pachia nynh meseinaw kya

yn nung zah,

a kaang te yn koihlu

cipaw nyh oh.

7 ‘Ccungccaw chia nynh thua!’

cite ka sia zemah,

hum nynh sanmah

yn khungru khyh;

thawte ka sia zemah

dingnaw umlae khyh.

8 Ka ccia kho khyh nawlan,

pang yn thungkhaw zah,

ka ccianaw kya mohnaw kha

a nung.

9 Ka phu-enaw kha

poh yn khahpah zah,

ka lu kyate bawilukhung kha

yn lawpya vae.

10 Voikheit voikheit langte

yn bua zah phe ka zo vae,

ka ngaehoinaw kha

thingku hawte poh a phoh vae.

11 A thinrianaw kha

maee lang yn ruasah nua zah,

a rhaw lante yn ria vae.

12 A rhawkaw hae nynh

yn ccianua hae zah,

laekarung kha thaekute

ka bu po voilu lan

ryahmin yn tahnuaku hae.

13 "Ka uno hae kha ka kyate

sawsakuh hae zah,

kae nyhkuh hae paw tuh

ka kyate a phiakuh vae hae.

14 Ka puizia hae te

ka ruiban hoy hae nynh

yn cciataw vae hae;

15 ka inn a thua boi hae paw

ka mikhia hae nynh

yn ning vae hae;

ka ryalahtu nopi hae nynh

mikhia lang yn ria hae;

minmin mitmuihnaw kya

ramccangpaw lang nynh

ka tang vae.

16 Ka ryalahtupaw kha ka ko zemah

yn khung vae khyh;

ngiakute nynh ka soihbiaku vae.

17 Ka hysue tuh ka zu hanlan

nungsikuh zah,

kae puikheihpaw

ka uno hae hanlan

anungsikuhpaw nynh

ka thua vae.

18 Imua taraw hae nynh

heize yn theihrya hae;

he ka thoku vae ze,

yn sarya hae.

19 Ka ruiban hoypaw balyn nynh

yn hua hae,

ka sungsah hae paw nynh

yn rawse vae hae.

20 Ka ru hae tuh ka ving te

ka saw kya bekuh zah,

ka hanin kyalya te me ka lue.

21 Pou ka ruiban hae,

ngaethya yn umsah oh,

ngaethya yn umsah oh;

pawccecize Pachia kuih nynh

yn hae vae!

22 Pawccemou Pachia nynh

yn deehui hawte nae deehui oh?

Pawccemou ka ngesaw kha

aete kharouhmaw

nae lungryachi khyh?

23 "Ka bya hynh zei thua vae sah!

ccauh kya zei thua vae sah!

24 Sivaw ccaccung te kuee khate

zungzae atyn lante

lungphe vawlan zei thua vae sah!

25 Pawccecize kae yn Shawkhawtu tuh hiin zah,

nyathyakou kya laephi vawlan

yn thadyn cih cipaw ka ny;

26 ka ving tuh phe aro vae zemah

e ka ngesaw maw hynhte

Pachia kha ka muih cih,

27 ka kalan a panpaw amaw kha

ka muih cih,

milae nynh thua leite

kamaw ka mit ccaccei nynh

a muih cih.

Ka lungkhu kya

ka lungthawthang!

28 ‘Pawtepei amaw kha

vawsawnaw ah pya cih oh!

E vawsawnaw athonaw tuh

amaw kya nynh muih athua,’

cite na hoku oh ze,

29 thaloi rhaw kha rih oh,

pawccecize Pachia thinrianaw nynh

thaloi te detahnaw kha

a thuakhae,

tetuh byapianaw a um cipaw kha

na nyh cih oh," a ci.