1 Job nynh amaw mitmuihnaw kya ka ding a ciku keiccuze khah-e lu thum hae nynh Job kha byakhung leite zya a dae hae. 2 Tetuh Buz phin, Ram ciihan athuapaw, Barakhel ccapaw Elihu tuh a thinria. Job nynh Pachia laeze amaw kha a dingsahku hua keiccuze Job tungvaw a thinria; 3 Job ban hae lu thum tungvaw mah a thinria, pawccecize minmin nynh Job kha na sei a cipya hae zemah, byakhungnaw nykuh khyh hae. 4 Minmin tuh Elihu laeze a tawccawhua hae keiccuze, aning nynh Job kalan bya hopya lanpaw kha a ngaw. 5 Thuasalama lu thum hae nynh khungru lanpaw bya a nyku khyh hae paw kha he a nyh tuh a thinria.

6 Buz phin, Barakhel ccapaw

Elihu nynh khung hae zah:

"Kae tuh akum nopaw ka thua zah,

nanning tuh kum tang hae paw nynh

na thua oh; tukeiccuze nanning kalan

ka tuanaw ho lan ka rih zah

ka rawthah.

7 ‘Kum tang hae paw nynh ho hae sah,

kum patae mih she sae

vae hae paw nynh tuh

hawnaw kha a la ccangku

lan hae paw nynh thua,’

cite ka ciku.

8 Thuasalama ccungccaw kya

muisaw um zah,

Athunghuapaw hy nynh

nythyanaw kha a pya.

9 A taw hae paw kyalya hynh

a haw hae paw thua khyh hae zah,

kum tang hae paw kyalya nynh

ahmepaw kha nyh khyh hae.

10 Tukeiccuze, ‘Ka bya yn ngaepya tua oh;

ka tuanaw kae hotua hin sah,’

ka cipya hae.

11 "Ho lanpaw bya na tuaku

cciamang lya oh khe,

nae hawnaw bya kha ka ngae zah,

nae bya kha ka ngaw.

12 Pekite ka ngae salamah,

lu kheit nynh sanmah Job kha

bya na ei kho khyh oh zah,

Job bya kha na khung kho khyh oh.

13 Tukeiccuze, ‘Hawnaw

kae muih vae, cih nan oh;

ccungccaw nynh thua leite

Pachia nynh Job kha a tae cih,’

cite ho nan oh.

14 Job nynh kae kha rawsete

byaho khyh,

nanning nynh bya na khung oh hawte

kae nynh tuh ka khung lan khyh.

15 "Minmin tuh mih lungroh zah

byakhungru leite a um hae;

byaho lanpaw hoi vae khyh hae.

16 Minmin nynh khungru leite

phang thadyn hae zah,

bya a ho khyh hae keiccuze

ka ngaw cih hae tou?

17 Kae zemah bya ka khungru cih hae;

ka tuanaw kha ka hobua cih;

18 Pawccecize ho lanpaw bya patae ka hoi;

ka lungkhu e muisaw nynh

byaho lan thawte yn tuhou.

19 Ka thinlung tuh pounaw a hoi

leipaw misutui te lokuh zah,

vyavya pawkhaekuhpaw

misutui-saphuabawng

athawpaw te nynh aloku.

20 Ka lungdae nawlan

ka ho hahe cih;

ka khalang ka aw cih zah

ka khungru cih.

21 Humhung mae mah ka do lan khyh,

humhung kya mah maemuihtangnaw

bya ka ho lan khyh.

22 Pawccecize pawtemou

maemuihtang byaho lan

cipaw ka nykuh khyh,

tuhte ka la cyi lanze,

yn Raetupaw nynh aro mawze

ka ccyh yn thangsah sei cih!