1 "E kong keiccuze ka bung sohkuh zah,

a umnaw hmin kyate a thohkuh.

2 Kholungthyhpaw Pachia roi te

a khalang kyate yn ccaepaw

roi kha ngaetua oh.

3 Vaawlui zakaw balyn kya

kholungthyhsah zah,

laephi apaki hae kyacia

a khozaw kha a laesahku.

4 Tukoute Pachia roi accae;

alesaepaw a roi kha

kholung lang thyhsah zah,

a roi thae athua lyakhe

khozawlaekunaw kha khee khyh.

5 Pachia nynh ngaeangthua lan

um lante a roi kha

kholung lang a thyhsah;

aening nynh ah ny kho lei oh paw

uccaw myarya lepaw kha a rae.

6 Pawccecize aning nynh vuiraw kha,

‘Laephi vawlan ccah,’ a cipya;

pharyphary rahpaw khuaa kha,

‘Myarya ccan lan rah,’ a cipya.

7 A raepaw ccungccaw balyn nynh

a ryalaw kha a ny nawlan hae,

ccungccaw miakaw mih ryalaw kha

a haeungsah hae.

8 Tetuh sarangpaw hae tuh

mih karung lungkhu lang tee hae zah,

tuin kyakhe zya a um hae.

9 Alia langte khiccung tuh yn khia,

palung lang e khisan nynh

akyaapaw kha yn thuakhae.

10 Pachia hy nynh tuiting kha umsah zah,

kobalaepaw tui tuh tuiting lang a tang.

11 Maeking phang zipaw kyakhe

tuihu kha nung zah

maeking hae nynh a awnaw kha

a pazaesaku hae.

12 Pachia nynh kaw a pya hae thyhte,

laephi pynpi vawlan a um nawlan hae,

amaw khuakhannaw thyhte

voilute a nuekuh hae.

13 Thuihei nawlan tou, athua khyhze

a ram hoy nawlan tou, athua khyhze

a sungsahnaw langsaku nawlan tou,

Pachia nynh tuh-e tuh a cyisaku.

14 "Pou Job, e bya hynh thaetua;

zya um lah, ngaeangthua lan umpaw

Pachia ryalawnaw hae kha tuatua.

15 Pachia nynh minmin tungvaw

pawtemou kawpya hae zah,

a maeking kya-e awnaw kha

pawtemou a awsah cipaw na nyh tou?

16 Maeking hae nynh

a umthya hae paw kha na nyh tou?

a thyahawnaw phe ccingpaw

Pachia ryalawnaw ngaeangthua lan

um hae paw kha na nyh tou?

17 Alia lang e khisan keiccuze

laephi tuh he aso vae ze,

na boeining hae kha pawtemou

aso cipaw na nyh tou?

18 Laeepaw muinsado hawte

atangpaw vaawlui kha

Pachia nynh a dawsaku hawte

na dawsakuh kho tou?

19 Amaw kalan kae ho lanpaw kha

oun ccangpya tua;

kae thinlung amoh keiccuze

kae byathan kya ho lanpaw

kae nykuh kho khyh.

20 Ka ho rypaw bya kha Pachia kalan

hopya lan accan zawtou?

Po laangku lan a rypaw

a um boi zawtou?

21 Khisan nynh po zaw zah

vaawlui kha he a thyaasah te,

vaawlui kya-e awnaw kha

humhung nynh mah do ngan khyh.

22 Palung langte sui awnaw yn langkuh,

Pachia tuh sawtua lan umpaw

lesaenaw te phe abeih.

23 Athunghuapaw kha aening nynh

ah muih kho khyh oh;

aning tuh huhan te thuasah,

byading te thuasah myarya

alesaepaw nynh thua,

myarya a dingpaw thua zah

ccungccaw tungvaw reisakuh lan khyh.

24 Tukeiccuze ccungccaw hae nynh

amaw kha a ri hae;

lysakute a hawsakuh hae paw miakaw kha

pawlangria khyh hae," a ci.