1 Job nynh bya bua ho zah:

2 "Ka dingnaw kha pawlang

yn riapah leipaw Pachia,

ka hiinnaw kha vawsaw yn pyapaw

Athunghuapaw tuh ahiinpaw

athua thyhte,

3 ka hy tuh ka kya um zah

Pachia thaw tuh ka naduh kya

a um lungkhu balyn,

4 ka mung nynh hynbya ho lan khyh zah,

ka lae nynh lingnaw byaho lan khyh.

5 Nanning na hme oh cipaw bya tuh

ka kyate sawkuh sah;

ka chi makhia ka dingnaw kha

ka vua lan khyh.

6 Ka dingnaw kha tynkaring lan

ka kyngkuh zah ka saw lan khyh;

ka hiin lungkhu balyn

ka thawthaekuh lan khyh.

7 "Ka rhawpaw tuh ccungccaw

hoyleipaw hawte thua sah lah,

kae yn rawsepaw tuh

a ding leipaw hawte thua vae sah.

8 Pachia nynh amaw pawlangria

leipaw kha he a vua te,

Pachia nynh a hiinnaw kha

he a lah te, aning nynh

paw ngaehoinaw mou a hoi ung?

9 Vawsawnaw nynh

a tungvaw he a thuanua te,

Pachia nynh a siaruanaw kha

a thaepah ung cih tou?

10 Aning nynh Athunghuapaw

tungvaw a lungrythua vema?

Accyh takyh kya Pachia kha

ko vema?

11 Pachia rya a lawpaw kong kha

kae hopah cih oh;

Athunghuapaw nynh a paccynpaw kha

ka pheii lan khyh.

12 Nanning balyn nynh

phe na muih vae oh;

pawccemou accakaepaw bya hynh

palei na ho oh?

13 "Pachia nynh ccungccaw

hoyleipaw hanpaw lang a pyapaw,

te tuaasahnaw a raetupaw nynh

Athunghuapaw kyate

a muepaw rho tuh hynh-e nynh thua:

14 A ccaaw hae tuh alung hae zemah,

thaloi te a chih hae;

a ciihan hae tuh looh phe zaw lan

hoi khyh hae.

15 Amaw koute a hiinhy hae paw kha

shethya nynh shawku kya a uh cih hae,

a nomae hae nynh heize

rawhui kho vae khyh hae.

16 Aning nynh ngunphua kha

laenoi hawte a pum zemah

boeiningsungpue kha anglae hawte

a pum zemah,

17 tuh-e boeining hae tuh

miding hae nynh a lawkuh cih hae zah,

ngunphua kha seinaw hoi lei hae paw nynh

a neekuh cih hae.

18 A inn kha pavaw bu hawte sakkuh zah,

misu khokhu a ngawtupaw nynh

a sakkupaw buhang te nynh aloku.

19 Aning tuh hoirumte a ih,

thuasalama tuhcite thua vae lan khyh;

he yn thaekuh tuh, a sisua tuh phe zo vae.

20 Rinaw nynh tui alepaw hawte

phe a phya;

khuazi khe khiccung nynh

a zoukhae.

21 Nithua lang e khisan nynh

zoukhae thung zah,

aning tuh phe a zo;

a umnaw hmin kyate ccaring a zoukhae.

22 Tuh-e khisan nynh thawcci leite

aning kha ccaring a vua;

aning tuh khisan huhan kyate

lue khylan rangkhirangkhaete a ccue.

23 A kuih bianua zah, a umnaw hmin kyate

a roisaw zah a sarya.