1 Oute Teman minphuinpaw Elifaz nynh byakhung zah:

2 "Bya kaw kheit kae hopya ze,

na thinria vema?

Thuasalama byaho leite

hum nynh mou a um kho cih?

3 Dotua, ccungccaw patae kha

na thuihei vae hae;

a thawzyapaw kuih hae kha

mih thaw na saesah vae hae.

4 Na bya nynh vyavya khuliakuh

hae paw kha bawm hae zah,

nang nynh a thawzyapaw

ccukharu hae kha na tynsah hae.

5 Thuasalama atu tuh

vawsawnaw nynh

he ae thuanua te,

na thindyn zah na lungroh.

6 Pachia raw na rinaw kha

na zynkunaw thua khyh tou?

Na hiinzia a ccingnaw kha

na ngaehoikunaw thua khyh tou?

7 "Atu tuatua, ccaenaw um leipaw kha

ro athua boi tou?

Miding kha vua athua boi tou?

8 Ka la muih vae hawte,

hoyleinaw loo kha pho hae zah,

vawsawnaw ccacii

a tu hae paw nynh tuh

hoyleinaw te vawsawnaw kha

a rue hae.

9 Minmin tuh Pachia hy keiccuze

roh hae zah, maee lang ruapaw

a thinrianaw keiccuze a chih hae.

10 Chindeih siaruanaw,

chindeih arepaw roi dae zah,

chindeih taraw a haw tuh

khya athua.

11 Tei lanpaw saw a um vae khyh

keiccuze athungpaw

chindeih tuh chih zah,

chindeih pinung a taw hae tuh

phiariphiarae a um hae.

12 "Aruh lante ka kalan

bya yn thua zah,

ka nakaring te zyazya lante

ka thae.

13 Ccungccaw hae tuh thuhbabu lan

he a ihtheih hae te,✝

khuazi vizin te ka muihpaw kha

ka tua lyakhe,

14 rinaw te thyngkunaw nynh

ka tungvaw yn thuanua zah,

ka ru balyn pong athyngkuh.

15 Muisaw nynh ka malang khe

yn zuake zah zyazyate a cceih;

ka ripaw ka ming phe tho.

16 Tuh-e muisaw tuh

phang a thadyn ung,

thuasalama a muinsan kha

ccaerarih lan ka muihthya khyh.

Oute ka malang khe

muinsan ccangkheit ka muih;

daekakinpaw kya-e

roi roikheit kha ka thae:

17 ‘A chih khopaw ccungccaw hynh

Pachia malang a ding kho tou?

Ccungccaw hynh a Raetupaw

malang a thyaa kho tou?

18 Pachia nynh a ryalahtu hae kha

heize zyn kho khyh hae,

a vaawccungccaw hae kha heize

cyiseinaw a muihpya hae;

19 tuhte athua lanze laephi-inn kya

um zah, yn thotakawnaw tuh

laenoi athuapaw,

laehaw hawte miade azoipaw

ccungccaw kha tuh hohcihmou

houh zyn lan khyh.

20 Awkhua te zete laku mawkhe

a rohthya hae;

humhung nynh mah ny leite

a chihthya he hae.

21 Mih ryabu-rui kha mih laku kyate

thoh paepya thua zah,

hawnaw hoi leite a chih hae.’