1 Te Shuh minphuinpaw

Bildad nynh khungru zah:

2 "E bya hae hynh hohseciamou

na ho ung cih?

Na khalang kya-e bya tuh

hohseciamou khise hawte

athua ung cih?

3 Pachia tuh byading kha

a paleih boi tou?

Tuhkhyhze Athunghuapaw nynh

akyhpaw kha a paleih boi tou?

4 Na ccaaw hae nynh

amaw rawsete a sei hae ze,

mih cyiseinaw lungkhu langkhe

minmin kha a phung hae.

5 Pachia kha na ccung zah,

Athunghuapaw kha

na ngiaku lanze,

6 nang tuh na thyaa zah

na ding lanze,

aning tuh na hanlan

yn thokuh cih zah,

ahmepaw na umnaw kya

ae umsah thui cih.

7 Na thotakawnaw tuh

dih salamah,

nyalang tuh myarya ale cih.

8 "Alia vae paw she kya-e

ccungccaw hae kong kha

akaw-aleih khia hae lah,

mih minpaaw hae nynh

a la muih hae paw kha tuatua;

9 aening tuh inkhawnin

ccungccaw hae ah thua oh zah,

pawpaw mah ah nyh khyh oh,

laephi vawlan aening ccyh tuh

mynlyh nynh hung athua.

10 Minmin nynh a ny hae paw kha

ccangpyate ae hopah lan khyh hae tou?

11 "Tuiccua a um leinaw kya

papairas ku tuh a lethung

kho zawtou?

Tui a um leinaw kya

phaeku tuh a lethung

kho zawtou?

12 Apaw paw cciamang zah,

nge athua mawkhe,

ccangpaw aku anaan mawze

phe arou.

13 Pachia a ningpaw balyn tuh

tuhawte nynh athua hae;

Pachia pawlangria lei hae paw

kya-e ngaehoinaw tuh aroh cih.

14 Mih zynkunaw tuh ro zoi zah,

mih doliakunaw tuh

mungrue bu hawte nynh athua.

15 A inn kya a ngeiku lanze,

a inn tuh thadyn kho khyh;

a kuih te a kyng zemah

tyn lan khyh.

16 Ccungccaw hoylei hae paw tuh

khuaninpaw kya

thingku hae hawte

hinlalyh lan um hae zah,

atoih thawpaw ange hae tuh

khokhu kya a pazaekuh hae.

17 Mih tharui hae nynh

lung apumkuhpaw kha ve hae zah

lungpi hae laku khe a hiin hae.

18 Mih umnaw hmin kyate

ro athua hae lanze,

tuh-e hmin nynh, ‘Nanning hynh

papin kae muih boi khyh oh,’

a cipah cih hae zah,

minmin kha a vua cih hae.

19 Dotua, minmin mih lungtuanaw

laanpi tuh tuhcihawpaw thua zah,

tuh-e laephi kyate

mingccangpaw hae tuh

thingku hawte a po cih hae.

20 "Dotua, Pachia nynh

ccaenaw um leipaw kha

vua lan khyh,

hoyleinaw a rae hae paw kha tuh

bawm lan khyh hae.

21 Na khalang kha nuinnaw te

a biasah cih zah,

na munglae kha lungtua

siaruanaw te a biasah cih.

22 Nang ae hua hae paw tuh

maethyabong athua cih hae zah,

ccungccaw hoylei hae bu tuh

um vae lan khyh," a ci.