1 Oute Job nynh khung hae zah,

2 "Ka thinrianaw hynh

akhin sae thua sah lah,

ka vawsawnaw balyn hynh

zawccu te tou thua sah!

3 Rili laesia laeze arihua cih;

tukeiccuze ka bya tuh phe lawesei vae.

4 Pawccecize Athunghuapaw nynh

a kawpaw the nynh yn tung;

tuh-e the asy nynh

ka muisaw kha a ccisah;

Pachia rawrinaw kha

ka malang khe po tarynua

ka thua.

5 Ramkaw e lann tuh lonua

a bouku lya a sia boi tou?

Tangnuapaw so a ae lya

a sia boi tou?

6 Athua leipaw looh kha loi leite

ae kho thua zawtou?

Awtui kya-e arawpaw kha

ae lan athua zawtou?

7 Khah-e looh hae kha

ka kuih te san

ka ty ry khyh zah,

ka hanlan anungsikuhpaw

looh te nynh aloku hae.

8 "Ka ngiapaw hynh

ka mue vae sah,

Pachia nynh ka rypaw kha

yn pya vae sah;

9 Pachia nynh kae hynh

yn roh sah lah,

a kuih kha dyngte kae hynh

thoh yn pae sah!

10 E hynh ka hanlan lungtangnaw

pyakupaw athua cih;

apaekuh leipaw ccinaw kyakhe

ka lungtua paleih cih;

pawccecize Athyaapaw Pachia

bya kha ka ei vae khyh.

11 Ka ngaehoinaw lanpaw

thawzung ka hoi ung zawtou?

Ka hiinnaw athangnaw kha

lungsaete ngaw aho ung zawtou?

12 Ka thawzung tuh

lung thawzung zawtou athua?

ka ngesaw tuh

sohin zawtou athua?

13 Thanccingte ka lungkhu kya

bawmtu ka hoi khyh,

ka thawzung balyn

phe thang vae.

14 "Ruiban tungvaw

ngaethyaumsahnaw

a hoi leipaw tuh

Athunghuapaw tungvaw

rawrinaw a hoi leipaw nynh thua.

15 Ka uno hae tuh

vahungtui hawte

a hynhu hae paw thua zah,

tuihung alua hawte

phe a zo hae,

16 tuh-e tuihung tuh

tuiting ryte mankhaekute

lua zah, atuipaw vuiraw ryte

anuihkhaekuh.

17 Aso ccyh kya vae tuh,

tuh-e tui hae tuh phe azo hae;

he aso vae ze, mih umnaw kya

phe akan hae.

18 Minmin tuh mih laanpi kyate

a cceihsei hae,

ramrou lungkhu lang

tee hae zah a roh hae.

19 Tema khua e ataruinte

a cceih hae paw nynh

tui a ccungku hae,

Sheba khua e

khuaccong hae paw nynh

ngaehoite a ccia hae.

20 A zynku hae keiccuze

mih lungroh;

tuh-e hmin kya thua hae zah

mih maethah.

21 Nanning mah ka hanlan

tuhawte nynh na thua oh;

ka vawsawnaw kha

na muih oh zah na rih oh.

22 ‘Lasung yn pya oh,’ ka ci tou?

Tuhkhyhze, ‘Nae sisua kya-e kha

pyaruh lang yn pya oh,’

ka ci tou?

23 Tuhkhyhze, ‘Rhaw kuih kyate

yn khum oh,’ ka ci tou?

Tuhkhyhze, ‘Tuaasahtu hae kuih

kyate yn shawkhaw oh,’

ka ci tou?

24 "Yn ccangpah oh lah,

daetedae lan ka um cih;

pawtemou ka cyisei cipaw kha

yn nysah tua oh.

25 Ahmepaw bya tuh

pawcih baban mou

a thawsae!

Thuasalama nae thuiheinaw

oh paw bya nynh

akyhpaw pawmou a langsaku?

26 Ngathu-ngaraepaw

ccungccaw nynh a hopaw bya tuh

khivae athua hawte,

ka bya hynh seisah kho lan cite

tou na tuaku oh?

27 Ngawraw hae kha heize

ccungthydungte vawsaw

na pya oh, nae ban hae kha

kungku nawlan na mang oh.

28 "Thuasalama atu kae hynh

yn dotua oh,

nanning malang ka hyn lan khyh.

29 Tuathui hin oh, ka tungvaw

hoyleinaw kha

rae thua nan vae sah.

Tuathui hin oh, ka bya tuh ahme.

30 Ka byaho kya hoseinaw

ccangkhakheit a um tou?

Akyhpaw te akyh leipaw kha

ka nyh kho khyh tou?