1 Ka thinlung akoi vae,

ka ccyh tuh athang vae,

ka hanlan shawku tuh

phe a umty vae.

2 Yn saryatu hae tuh

ka pepan kya um hae zah,

peku a rypaw mih thinlung kha

ka mit nynh a muih.

3 "Pachia, namaw nynh

aamah yn khanpyaku tua,

ka hanlan aamah yn khanpakuh

lanpaw hummou a um?

4 Nythyanaw a hoi khyh nawlan hae,

mih thinlung kha

na pingsah vae,

tukeiccuze taenaw na pya

vae lan khyh hae.

5 Lasung mue khylan

a ruiban kha a pheepaw tuh

a ccaaw hae mit amoh cih.

6 "Ccungccaw hae nynh

phungtangbya lang mang lante

aning nynh yn rae vae,

kae tuh ccungccaw hae nynh

a malang mih tuing

a thoinua hae paw nynh ka thua.

7 Ngaethyanaw keiccuze

ka mit tuh ccaerarih lan

ngawmuih vae khyh,

ka kuih ka ccu balyn tuh

mynlyh te nynh aloku vae hae.

8 Hynh-e keiccuze miding hae tuh

siikuh hae zah,

seinaw hoi lei hae paw nynh

kae kha Pachia pawlangria

leipaw lang yn ria hae.

9 Tuhzemah miding hae tuh

mih laanpi kya tyn hae zah,

mih kuih a thyaa hae paw tuh

houhouh a lethung hae.

10 Thuasalama nanning,

nae balyn mawte

atu oun kitua oh,

nanning laku kya

a hawpaw lu kheit sanmah

ka muih lan khyh.

11 Ka nin hae tuh alia vae,

ka paccynkunaw hae tuh

aroh vae;

ka thinlung te ka rypaw tuh

phe zo vae.

12 Minmin nynh khuazi kha

khuadae lang a rae hae,

awnaw tuh mohnaw kalan

anaekuh vae, a ci hae.

13 Michi khua tuh ka inn lante

ka ngaehoi ze thuasah,

ka iphae kha mohnaw kya

ka phae ze thuasah,

14 shawku kha, ‘Nang tuh

ka paaw nynh na thua,’

ka cipah zah,

tangkaria kha, ‘Ka nung’ khyhze

‘Ka ccianung nynh na thua,’

ka cipya lanze,

15 ka ngaehoinaw tuh

teimou a um?

Hum nynh mou

ka ngaehoinaw kha a muih cih?

16 Ka ngaehoinaw tuh

michi khua lang

a rungbung cih tou?

Laenoi lungkhu lang

pynkheihlan kae rungbung

cih tou?" a ci.