1 Oute Job nynh khung zah:

2 "Huhan a hoi leipaw ccungccaw kha

pawcih baban mou na la bawm!

Thawzung a hoi leipaw kuih kha

pawcih baban mou na la bawm!

3 Hawnaw a hoi leipaw

ccungccaw kha pawcih baban mou

tuanaw na pya zah, ahoypaw

hawnaw patae kha na pya!

4 Hum kya-e bawmnaw te mou

e bya hynh na ho?

Hum muisaw mou na kyate

yn langkuh?

5 Akawlan khe michi hae muisaw tuh

tui te tui lungkhu um hae paw ryte

a thyngkuh hae.

6 Sheol tuh Pachia malang khe

khaleih lang zah

Abaddon tuh bongnawpaw

ahu hoi khyh.

7 Pachia nynh vaawlui kha

accakaepaw vawlan khe

tharae daw zah, laephi kha

accakaepaw vawlan khe a sae.

8 Varyng zipaw a maeking kyakhe

tui kha lungde zah,

tui keiccuze maeking tuh

seiikuh khyh.

9 Sawpaw sahpynglyn kha

phang bong zah, sawpaw luki khe

a maeking kha tharae a daw.

10 Mohnaw te awnaw laku

umpaw ramri kya, tui vawlan khe

apyngpaw syntawnaw kha a nung.

11 A pe hae keiccuze

vaaw atung hae tuh hy hae zah

a siikuh hae.

12 A huhan khate rili kha a daesah;

a thyanaw te Rahab kha a chia.

13 A hy khate vaawlui kha

thyaasah zah,

a ccue cciamangpaw hupaw kha

a kuih te a thuing.

14 E hae hynh a ryalaw

langsakunaw sasaw nynh athua ung;

amaw kong ah thae oh paw hynh

pawcih baban mou azya!

A huhan kholungthyhpaw thathy kha tuh

hum nynh mou a thaethya kho cih?" a ci.